ຜູ້ຕິດເຊື້ອໄຂ້ຍຸງລາຍເພີ່ມເປັນ 2.600 ກວ່າກໍລະນີແລ້ວ
ວັນທີ 7 ກໍລະກົດນີ້, ກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ລາຍງານໃຫ້ຮູ້ວ່າ: ມາຮອດປັດຈຸບັນທົ່ວປະເທດມີຜູ້ຕິດເຊື້ອໄຂ້ຍຸງລາຍ (ໄຂ້ເລືອດອອກ) ເພີ່ມເປັນ 2.618 ກໍລະນີແລ້ວ ແລະ ເສຍຊີວິດເປັນ 8 ກໍລະນີ, ຫລາຍກວ່າໝູ່ແມ່ນນະຄອນຫລວງວຽງຈັນມີເຖິງ 606 ກໍລະນີ, ຖັດລົງມາແມ່ນແຂວງບໍລິຄຳໄຊມີ 331 ກໍລະນີ, ແຂວງວຽງຈັນ 321 ກໍລະນີ, ອັດຕະປື 238 ກໍລະນີ ແລະ ສະຫວັນນະເຂດ 233 ກໍລະນີ, ໃນນັ້ນ ຢູ່ນະຄອນຫລວງວຽງຈັນມີຜູ້ເສຍຊີວິດ 3 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ, ໄຊຍະບູລີ 1 ຄົນ ແລະ ແຂວງຊຽງຂວາງ 1 ຄົນ.
ຕໍ່ສະພາບການດັ່ງກ່າວ, ກະຊວງສາທາລະນະສຸກ ໄດ້ຮຽກຮ້ອງໃຫ້ທຸກຄົນຈົ່ງພ້ອມໃຈກັນ ປະຕິບັດມາດຕະການ 5ປ ໃຫ້ເປັນປະຈຳ ຈຶ່ງຈະສາມາດທຳລາຍແຫລ່ງເພາະພັນຂອງຍຸງລາຍໄດ້ຕາມຄຳຂວັນທີ່ວ່າ: “ບໍ່ມີໜອນນ້ຳຍຸງລາຍ ກໍບໍ່ມີຍຸງລາຍ ແລະ ບໍ່ມີໄຂ້ເລືອດອອກ”. ຖ້າເປັນໄຂ້ໃຫ້ຮີບຮ້ອນໄປພົບແພດໝໍດ່ວນ, ຫາກທຸກຄົນປະຕິບັດໄດ້ຕາມມາດຕະການ 5ປ ດັ່ງກ່າວກໍຈະສາມາດຫລຸດຜ່ອນ, ປ້ອງກັນການເຈັບເປັນ ແລະ ສະກັດກັ້ນການແຜ່ລະບາດຂອງເຊື້ອພະຍາດໄຂ້ຍຸງລາຍໄດ້.
