ອູຮັ່ນ ຈັດຕະຫຼາດນັດຫາວຽກເຮັດງານທຳໃຫ້ນັກສຶກສາຫຼັງໂຄວິດ-19.
ຕະຫຼາດນັດຫາວຽກເຮັດງານທຳໃຫ້ນັກສຶກສາຮຽນຈົບໃໝ່ ໄດ້ຈັດຂຶ້ນໃນວັນທີ 1 ມີຖຸນາທີ່ຜ່ານມາ ຢູ່ທີ່ມະຫາວິທະຍາໄລ ຈຽງຮັ່ນ ຂຶ້ນກັບນະຄອນ ອຸຮັ່ນ ບ່ອນທີ່ເກີດພະຍາດລະບາດ ໂຄວິດ-19.
ສຳນັກຂ່າວ ຊິນຫົວ ໃຫ້ຮູ້ວ່າ: ນີ້ແມ່ນຕະຫຼາດນັດຈັດຫາງານຄັ້ງທຳອິດໃຫ້ນັກສືກສາຮຽນຈົບໃໝ່ຈາກມະຫາວິທະຍາໄລໃນ ອູຮັ່ນ ນັບແຕ່ມີພະຍາດເກີດຂຶ້ນເປັນຕົ້ນມາ. ຊຶ່ງມີຫຼາຍກວ່າ 80 ຫົວໜ່ວຍທຸລະກິດເຂົ້າຮ່ວມງານຄັ້ງນີ້.
ຜູ້ອຳນວຍການໃຫ່ຍຂອງສູນບໍລິການຄວາມສາມາດຂອງນະຄອນ ອູຮັ່ນ ທ່ານ Xiong Jun ກ່າວວ່າ: ປັດຈຸບັນໃນນະຄອນ ອູຮັ່ນມີມະຫາວິທະຍາໄລ ແລະ ວິທະຍາໄລທັງໝົດ 83 ແຫ່ງ, ມີນັກສຶກສາປະມານ 317.000 ຄົນທີ່ຮຽນຈົບອອກໃໝ່ໃນປີນີ້, ເພີ່ມຂຶ້ນ 9,3% ທຽບໃສ່ປີ 2019. ພ້ອມດຽວກັນນີ້, ອຳນາດການປົກຄອງ ນະຄອນ ອູຮັ່ນ ຍັງຈະສືບຕໍ່ເປີດງານຕະຫຼາດນັດແບບນີ້ຂຶ້ນອີກ ເພື່ອໃຫ້ນັກສຶກສາທີ່ຈະຮຽນຈົບອອກໃໝ່ໃນໄວໆນີ້ໄດ້ເຂົ້າຮ່ວມ ແລະ ຊອກວຽກເຮັດງານທຳ, ຊຶ່ງຈະລວມມີທັງຂະແໜງການ ອຸດສາຫະກຳການບໍລິການທັນສະໄໝ ຫຼື ຂະແໜງການເງິນ.
ນອກຈາກນັ້ນ, ອຳນາດການປົກຄອງ ອູຮັ່ນ ຍັງຈະເຮັດດ້ວຍຫຼາຍວິທີທາງຕື່ມອີກເພື່ອໃຫ້ນັກສຶກສາຮຽນຈົບໃໝ່ໄດ້ເຂົ້າຮ່ວມເພື່ອຊອກຫາວຽກເຮັດງານທຳໃຫ້ຫຼາຍຂຶ້ນ.
ຂ່າວ: ລູກເມືອງພວນ(ແຫຼ່ງຂ່າວ vietnamnet)
