ຜູ້ຊ່ຽວຊານ UN ເຕືອນພະຍາດຕິດເຊື້ອຈາກສັດສູ່ຄົນ ເພີ່ມຂຶ້ນຕໍ່ເນື່ອງ ໂດຍບໍ່ມີການປ້ອງກັນ
ໂຄງການສິ່ງແວດລ້ອມຂອງສະຫະປະຊາຊາດ ແລະ ສະຖາບັນວິໄຈສັດສາກົນ ເຜີຍແຜ່ລາຍງານ ເຕືອນອັນຕະລາຍຂອງພະຍາດຕິດເຊື້ອຈາກສັດສູ່ຄົນ (Zoonotic Diseases) ທີ່ກຳລັງເພີ່ມຂຶ້ນຢ່າງຕໍ່ເນື່ອງ ໂດຍປາສະຈາກການດຳເນີນງານໃດໆເພື່ອປ້ອງກັນ.
ເນື້ອໃນລາຍງານລະບຸວ່າ: ປັດໄຈທີ່ເຮັດໃຫ້ພະຍາດຕິດເຊື້ອຈາກສັດສູ່ຄົນເຊັ່ນ: ພະຍາດໂຄວິດ-19, ອີໂບລາຫລື ພະຍາດຊາຣ໌ສ ມີເພີ່ມຂຶ້ນ ເນື່ອງຈາກປະລິມານຄວາມຕ້ອງການບໍລິໂພກໂປຣຕິນຈາກສັດ ແລະ ການຜະລິດກະສິກຳແບບບໍ່ຍືນຍົງ ຕະຫລອດຈົນສະພາບອາກາດປ່ຽນແປງ.
ການເພີ່ມຂຶ້ນຂອງພະຍາດຕິດເຊື້ອຈາກສັດສູ່ຄົນນີ້ ມີແຮງຂັບເຄື່ອນຫລັກຈາກການເຊື່ອມໂຊມໃນສະພາບແວດລ້ອມທາງທຳມະຊາດເຊັ່ນ: ການເຊື່ອມສະພາບຂອງດິນ, ການຫາຜົນປະໂຫຍດຈາກສັດປ່າ, ການໃຊ້ຊັບພະຍາກອນທຳມະຊາດ ແລະ ສະພາບອາກາດປ່ຽນແປງ.
(ໜັງສືພິມລາວພັດທະນາ)
ໃນແຕ່ລະປີພົບວ່າມີປະຊາກອນທົ່ວໂລກຫລາຍກວ່າ 2 ລ້ານຄົນ ທັງໃນລະດັບຜູ້ມີລາຍໄດ້ປານກາງ ແລະ ລາຍໄດ້ໜ້ອຍ ທີ່ເສຍຊີວິດຍ້ອນພະຍາດຕິດເຊື້ອຈາກສັດສູ່ຄົນເຊັ່ນ: ພະຍາດແອນແທຣກ, ວັນນະໂຣກ ແລະ ພະຍາດວໍ້ ເຊິ່ງຫລາຍປະເທດທົ່ວໂລກລະເຫລີງໃຫ້ຄວາມສົນໃຈ.
ການລະບາດຂອງພະຍາດຕິດເຊື້ອຈາກສັດສູ່ຄົນທີ່ເພີ່ມຂຶ້ນ ຍັງພົບການເຊື່ອມໂຍງມາຈາກບັນຫາອື່ນໆເຊັ່ນ: ຄວາມໃກ້ຊິດກັບສັດປ່າ ແລະ ການອາໄສສັດສູງຂຶ້ນທຸກປີ ເຫັນໄດ້ຈາກອຸດສາຫະກຳການຜະລິດຊີ້ນສັດທີ່ເພີ່ມຂຶ້ນກວ່າ 260% ໃນໄລຍະ 50 ປີຜ່ານມາ.
ເຖິງຢ່າງໃດກໍຕາມ, ລາຍງານສະບັບນີ້ຍັງໄດ້ນຳສະເໜີຍຸດທະສາດ ເພື່ອປ້ອງກັນການລະບາດຂອງພະຍາດຕິດເຊື້ອຈາກສັດສູ່ຄົນໃນອະນາຄົດເຊັ່ນ: ການສ້າງແຮງຈູງໃຈໃຫ້ມີການບໍລິຫານແກ້ໄຂດິນແບບຍືນຍົງ, ການພັດທະນາຄວາມຫລາກຫລາຍທາງຊີວະພາບ ແລະ ການລົງທຶນດ້ານການວິໄຈທາງວິທະຍາສາດໃຫ້ຫລາຍຂຶ້ນ.
(ໜັງສືພິມລາວພັດທະນາ)
