ຫວຽດນາມເປີດໂຮງແຮມຄຳແຫ່ງທຳອິດຂອງໂລກ ຫວັງດຶງດູດນັກທ່ອງທ່ຽວຫລັງພົ້ນພະຍາດລະບາດ
ຫວຽດນາມເປີດໃຫ້ບໍລິການໂຮງແຮມຫລູທີ່ຕົບແຕ່ງດ້ວຍຄຳແຫ່ງທຳອິດຂອງໂລກ ຫວັງດຶງດູດນັກທ່ອງທ່ຽວໃຫ້ກັບໄປທ່ຽວອີກ ຫລັງທາງການຫລຸດຜ່ອນມາດຕະການລັອກດາວ ເພື່ອສະກັດການລະບາດຂອງພະຍາດໂຄວິດ-19 ດົນກວ່າ 3 ເດືອນ.
ອາຄານສີຄຳຂອງໂຮງແຮມໂດລເຊ ຮ່າໂນ້ຍ ໂກລເດັນ ເລກ (Dolec Hanoi Golden Lake) ຕັ້ງຢູ່ເຂດໃຈກາງນະຄອນຫລວງຮ່າໂນ້ຍ ພາຍໃນຕົບແຕ່ງດ້ວຍກະເບື້ອງເຄືອບຄຳ ແລະ ເຟີນີເຈີເຄື່ອງໃຊ້ທີ່ຫຸ້ມດ້ວຍຄຳ 24 ກະລັດ ບໍ່ວ່າຈະເປັນໂຖຫ້ອງນ້ຳ, ອ່າງລ້າງໜ້າ ແລະ ອ່າງອາບນ້ຳ ຫລື ຈອກກາເຟ.
ໂຮງແຮມຫ້າດາວແຫ່ງນີ້ໃຊ້ເວລາໃນການກໍ່ສ້າງ 11 ປີ ມີຄວາມສູງ 25 ຊັ້ນ ແລະ ມີຫ້ອງພັກໃຫ້ບໍລິການ 400 ຫ້ອງ ໂດຍມີລາຄາເລີ່ມຕົ້ນຄືນລະ 250 ໂດລາສະຫະລັດ.
ຫວຽດນາມໄດ້ຮັບການຍ້ອງຍໍໃຫ້ເປັນໜຶ່ງໃນປະເທດທີ່ປະສົບຜົນສຳເລັດໃນການຄວບຄຸມການລະບາດຂອງເຊື້ອໄວຣັສໂຄໂຣນາສາຍພັນໃໝ່ ໂດຍຂໍ້ມູນຈາກມະຫາວິທະຍາໄລຈອນຮອບກິນ ລະບຸວ່າ: ຫວຽດນາມມີຜູ້ຕິດເຊື້ອໂຄວິດ-19 ພຽງ 355 ຄົນ ແລະ ບໍ່ມີລາຍງານຜູ້ເສຍຊີວິດພຽງແຕ່ຄົນດຽວ. ຜູ້ຊ່ຽວຊານຫລາຍຄົນບອກວ່າ: ຫວຽດນາມເລີ່ມອອກມາດຕະການເພື່ອຄວບຄຸມພະຍາດລະບາດນັບແຕ່ຫົວທີ ແລະ ມີການບັງຄັບໃຊ້ຢ່າງເຂັ້ມງວດ ຈຶ່ງເຮັດໃຫ້ບໍ່ມີຜູ້ຕິດເຊື້ອຫລາຍຄືປະເທດອື່ນໆ.
