ຈີນຍົກລະດັບເຕືອນໄພ ຫລັງຈາກພົບກາມະໂຣກລະບາດ
ສໍານັກຂ່າວຣອຍເຕີລາຍງານວ່າ: ເຈົ້າໜ້າທີ່ໃນເຂດປົກຄອງຕົນເອງມອງໂກເລຍໃນຂອງຈີນອອກຄຳເຕືອນໃນທ້າຍອາທິດຜ່ານມາ ເພື່ອຮັບມືການລະບາດຂອງກາລະໂຣກ ໜຶ່ງວັນຫລັງຈາກໂຮງໝໍທ້ອງຖິ່ນລາຍງານພົບກໍລະນີຜູ້ຕ້ອງສົງໄສວ່າອາດເປັນກາລະໂຣກ.
ຄະນະກຳມະການດ້ານສຸຂະພາບຂອງເມືອງບາຍັນນູ ປະກາດການແຈ້ງເຕືອນລະດັບທີ 3 ຈາກທັງໝົດ 4 ລະດັບ ເພື່ອຮັບມືກັບໂອກາດທີ່ຈະມີການລະບາດ.
ການແຈ້ງເຕືອນນີ້ມາພ້ອມກັບຄຳສັ່ງຫ້າມການລ່າສັດ ແລະ ການກິນສັດທີ່ເປັນພາຫະນຳເຊື້ອພະຍາດ ແລະ ຂໍໃຫ້ປະຊາຊົນລາຍງານກໍລະນີສົງໄສວ່າເປັນພະຍາດລະບາດ ຫລື ມີໄຂ້ໂດຍບໍ່ຮູ້ສາເຫດທີ່ຈະແຈ້ງ ແລະ ແຈ້ງໃຫ້ເຈົ້າໜ້າທີ່ຮູ້ຖ້າພົບໂຕມາມອດ (marmots) ບໍ່ສະບາຍ ຫລື ຕາຍ.
ທັງນີ້ ມາມອດເປັນກະຮອກຂະໜາດໃຫຍ່ ພົບຢູ່ພາກຕາເວັນອອກສຽງເໜືອຂອງອາຊີ ລວມທັງຈີນຕອນເໜືອ ແລະ ມອງໂກເລຍ ແລະ ອາດເປັນພາຫະຂອງພະຍາດ ເພາະມີລາຍງານວ່າອ້າຍນ້ອງສອງຄົນໃນພື້ນທີ່ບໍ່ສະບາຍຫລັງຮັບປະທານຊີ້ນມາມອດ.
ທັງນີ້ ພົບຜູ້ເປັນກາມະໂຣກໃນຢູ່ມອງໂກເລຍໃນ 4 ຄົນໃນເດືອນພຶດສະພາປີຜ່ານມາ ເຊິ່ງລວມທັງກາລະໂຣກປອດບວມ 2 ຄົນ ເຊິ່ງເປັນພະຍາດລະບາດຮ້າຍແຮງກວ່າກາລະໂຣກປົກກະຕິ.
ກາລະໂຣກເປັນພະຍາດຕິດເຊື້ອ ແລະ ເປັນອັນຕະລາຍເຖິງຊີວິດທີ່ແຜ່ກະຈາຍໂດຍສັດ. ໃນຍຸກກາງເປັນທີ່ຮູ້ຈັກກັນໃນນາມ “Black Death” ເຊິ່ງຂ້າຊີວິດຄົນຢູ່ເອີຣົບຫລາຍສິບລ້ານຄົນ.
ແຕ່ການລະບາດຂອງກາລະໂຣກບໍ່ແມ່ນເລື່ອງແປກຢູ່ປະເທດຈີນ ເພາະພົບເລື້ອຍໆ, ແຕ່ໄລຍະຫລັງ ການລະບາດໄດ້ເກີດຂຶ້ນໜ້ອຍ ຈາກປີ 2009 ຮອດປີ 2018 ຈີນລາຍງານຜູ້ເປັນກາລະໂຣກ 26 ຄົນ ແລະ ເສຍຊີວິດ 11 ຄົນ.
