ແຟນຂອງລູກຊາຍກົກ ໂດນັລ ທຣຳ ກວດພົບຕິດໂຄວິດ-19
ສຳນັກຂ່າວຕ່າງປະເທດລາຍງານວ່າ: ນາງ ຄິມເບີລີ ກິລຟອຍ ແຟນສາວຂອງ ໂດນັລ ທຣຳ ຈູເນຍ ລູກຊາຍກົກຂອງປະທານາທິບໍດີອາເມລິກາ ໂດນັລ ທຣຳ ໄດ້ກວດພົບການຕິດເຊື້ອຈາກໂຄວິດ-19 ໃນລັດເຊົາດາໂກຕາ ກ່ອນນາງຈະມີກຳນົດເຂົ້າຮ່ວມງານທີ່ຈັດຂຶ້ນຮ່ວມກັບທ່ານ ທຣຳ ຜູ້ເປັນພໍ່.
ເຊຄິໂອ ຈໍ ຫົວໜ້າເຈົ້າໜ້າທີ່ຄະນະກຳມະການດ້ານການເງິນ Trump Victory Finance ເປີດເຜີຍວ່າ: ຫລັງຈາກທີ່ນາງ ກິລຟອຍ ກວດພົບການຕິດເຊື້ອໄວຣັສໂຄໂຣນາ 2019 ນາງກໍໄດ້ແຍກຕົວອອກຈາກຄົນອື່ນໆ ເພື່ອເຂົ້າຮັບການປິ່ນປົວ ແລະ ປ້ອງກັນການແຜ່ເຊື້ອໂດຍທັນທີ.
“ອາການໂດຍລວມຂອງນາງຂ້ອນຂ້າງດີ ແລະ ນາງຈະໄດ້ຮັບການກວດອີກຄັ້ງ ເພື່ອໃຫ້ແນ່ໃຈວ່າຜົນກວດທີ່ອອກມານັ້ນຖືກຕ້ອງ, ເຖິງວ່ານາງຈະບໍ່ສະແດງອາການໃດໆອອກມາກໍຕາມ, ແຕ່ເບື້ອງຕົ້ນໄດ້ມີການຍົກເລີກການເຂົ້າຮ່ວມງານກິດຈະກຳຕ່າງໆຂອງນາງທັງໝົດແລ້ວ”.
ສ່ວນລູກຊາຍກົກຂອງທ່ານ ທຣຳ ເຖິງວ່າຈະບໍ່ກວດພົບການຕິດເຊື້ອໃດໆກໍຕາມ, ແຕ່ກໍໄດ້ເຂົ້າສູ່ຂະບວນການກັກຕົວ ແລະ ຍົກເລີກການເຂົ້າຮ່ວມກິດຈະກຳສາທາລະນະທັງໝົດແລ້ວ.
ສຳລັບນາງ ຄິມເບີລີ ກິລຟອຍ ຖືເປັນໜຶ່ງໃນບຸກຄະລາກອນທີ່ມີສ່ວນສຳຄັນຫລາຍໃນກິດຈະກຳ ແລະ ໂຄງການຫາສຽງເລືອກຕັ້ງຂອງປະທານາທິບໍດີ ທຣຳ ຫລັງຈາກນາງໄດ້ສ້າງຜົນງານຈາກການຮ່ວມກິດຈະກຳເດີນໜ້າລະດົມທຶນໃຫ້ Trump Victory Finance ເຊິ່ງມີການຄາດຄະເນວ່ານາງອາດຈະໄດ້ຮັບມອບຕຳແໜ່ງປະທານຄະນະກຳມະການດ້ານການເງິນ Trump Victory Finance.
