LOCA ໃຊ້ລະບົບ e-CASS ຂອງທະນາຄານມາຣູຮານ ເຈແປນ ລາວ ໃຫ້ຄົນຂັບເຂົ້າເຖິງເງິນໄດ້ຕະຫຼອດ 24 ຊມ
ການນຳໃຊ້ລະບົບຊຳລະສະສາງແບບອັດຕະໂນມັດກາຍເປັນສິ່ງຈຳເປັນຫຼາຍຂຶ້ນໃນປັດຈຸບັນ ເນື່ອງຈາກຊ່ວຍອຳນວຍຄວາມສະດວກໃຫ້ກັບບັນດາຫົວໜ່ວຍທຸລະກິດຕ່າງໆໃນການຈັດການດ້ານການເງິນ ໂດຍສະເພາະກໍແມ່ນການຊຳລະຕ່າງໆ ແລະ ດ້ວຍເຫດຜົນນີ້ເອງຈຶ່ງເກີດມີລະບົບ e-CASS ຂຶ້ນມາ.
ລະບົບ e-CASS (e-Commerce Auto Settlement Solution) ຂອງທະນາຄານ ມາຣູຮານ ເຈແປນ ລາວ ເປັນລະບົບຊຳລະສະສາງທີ່ມາຊ່ວຍຕື່ມເຕັມໃນເລື່ອງດັ່ງກ່າວ ແລະ LOCA ບໍລິການເອີ້ນລົດຮັບສົ່ງແບບອອນລາຍເຊິ່ງປັດຈຸບັນໃຫ້ບໍລິການໃນນະຄອນຫຼວງວຽງຈັນ ແລະ ຫຼວງພະບາງ ມີລົດໃນເຄືອຂ່າຍຫຼາຍກວ່າ 400 ຄັນ ກໍເປັນບໍລິສັດທຳອິດທີ່ໄດ້ນຳໃຊ້ລະບົບດັ່ງກ່າວຂອງທະນາຄານ ໂດຍມີພິທີເຊັນສັນຍາເມື່ອວັນທີ 1 ກໍລະກົດ 2020 ທີ່ສຳນັກງານໃຫຍ່ ທະນາຄານ ມາຣູຮານ ເຈແປນ ລາວ ນະຄອນຫຼວງວຽງຈັນ.
ທ່ານ ສຸລິໂຍ ວົງດາລາ ຜູ້ອຳນວຍໃຫຍ່ ບໍລິສັດ ໂລກາ ຈຳກັດ ກ່າວວ່າ ຈຸດປະສົງການຮ່ວມມືໃນຄັ້ງນີ້ ກໍເພາະວ່າ LOCA ເປັນບໍລິສັດທີ່ເຕັກໂນໂລຊີໃນການເຊື່ອມຕໍ່ບໍລິການລົດໂດຍສານ ເຮັດໃຫ້ຄົນຂັບເຂົ້າເຖິງຜູ້ໃຊ້ໄດ້ ແຕ່ວ່າຄົນຂັບເອງກໍມີຂໍ້ຫຍຸ້ງຍາກໃນການເຂົ້າເຖິງເງິນທີ່ໄດ້ຈາກການໃຫ້ບໍລິການຂອງຕົນເອງ. ການທີ່ມາເຊື່ອມກັບລະບົບຂອງທະນາຄານ ຈະເປັນການສ້າງຄວາມໝັ້ນໃຈໃຫ້ກັບຄົນຂັບ ໃຫ້ສາມາດເຂົ້າເຖິງເງິນຂອງຕົນເອງໄດ້ຕະຫຼອດ 24 ຊົ່ວໂມງ ບໍ່ຈຳເປັນຕ້ອງຖ້າເປັນອາທິດ ຫຼື ເປັນເດືອນຈຶ່ງຈະໄດ້ຮັບເງິນ ແລະ ບໍລິສັດກໍບໍ່ຕ້ອງຖືເງິນຄົນຂັບໄວ້. ນີ້ເປັນການສ້າງຄວາມໂປ່ງໃສ, ມາດຕະຖານ ແລະ ຄວາມປອດໄພ ເຊິ່ງລະບົບດັ່ງກ່າວຂອງທະນາຄານມີໝົດແລ້ວ.
ທ່ານ ແອນໂທນີ ຊິນ ຜູ້ອຳນວຍການໃຫຍ່ຂອງ ທະນາຄານ ມາຣູຮານ ເຈແປນ ລາວ ກ່າວວ່າ ເພື່ອເຮັດໃຫ້ທະນາຄານເປັນທີ່ໄວ້ວາງໃຈ ພວກເຮົາຕ້ອງໃຫ້ບໍລິການທີ່ສະດວກສະບາຍ, ງ່າຍດາຍ ແລະ ວ່ອງໄວ. ສິ່ງທີ່ທາງທະນາຄານຕ້ອງການຈະບັນລຸແມ່ນການມອບຄວາມສະດວກສະບາຍໃຫ້ກັບບັນດາທຸລະກິດຕ່າງໆ ແລະ ແນ່ນອນວ່າ ພ້ອມດຽວກັນກໍຕ້ອງການທີ່ຈະມອບສິ່ງດັ່ງກ່າວນີ້ໃຫ້ກັບຜູ້ຊົມໃຊ້ເຊັ່ນກັນ. “ສຳລັບການຮ່ວມມືກັບ LOCA ນັ້ນ ກໍເພື່ອຊ່ວຍພວກເຂົາໃນການແກ້ໄຂບັນຫາ ເຊິ່ງບັນຫາຂອງ LOCA ກໍຄືການຊຳລະເງິນໃຫ້ກັບຄົນຂັບ ເຊິ່ງດ້ວຍລະບົບ e-CASS ຄົນຂັບຈະສາມາດຖອນເງິນຈາກບໍລິສັດໄດ້ດ້ວຍຕົນເອງ ຕາມທີ່ຕ້ອງການຢ່າງງ່າຍດາຍ ແລະ ວ່ອງໄວ ບໍ່ວ່າຈະຢູ່ໃສ ຫຼື ເວລາໃດ ໂດຍບໍ່ຈຳເປັນຕ້ອງເຂົ້າໄປດຳເນີນການຢູ່ບໍລິສັດ. ສະນັ້ນ ຈຸດປະສົງຫຼັກແມ່ນເພື່ອສ້າງຄວາມສະດວກສະບາຍ, ງ່າຍດາຍ ແລະ ໂປ່ງໃສ. ພ້ອມນີ້ກໍຍັງເປັນການຫັນເປັນການບໍ່ນຳໃຊ້ເງິນສົດ ໂດຍການຊຳລະສາມາດເຮັດໄດ້ແບບອອນລາຍ.”
