Google ຈະເພີ່ມການຄົ້ນຫາ ແລະ ລົບວີດີໂອຮຸນແຮງອອກຈາກ Youtube
ກາລິຟໍເນຍ 19 ມິຖຸນາ: Google ບໍລິສັດອິນເຕີເນັດລາຍໃຫຍ່ຂອງອາເມລິກາເປີດເຜີຍວ່າ: ຈະເພີ່ມມາດຕະການໃນການຄົ້ນຫາ ແລະ ລົບວີດີໂອເນື້ອໃນຮຸນແຮງ ຫລື ວີດີໂອຂອງກຸ່ມກໍ່ການຮ້າຍອອກຈາກ Youtube ເວັບໄຊແຊວີດີໂອຊື່ດັງຂອງບໍລິສັດ.
+ ເຟສບຸກຈະໃຊ້ມາດຕະການເພ່ືອປ້ອງກັນ ບໍ່ໃຫ້ຖືກນຳໃຊ້ໂດຍຜູ້ກໍ່ການຮ້າຍ
+ ມາເລເຊຍ, ອິນໂດເນເຊຍ ແລະ ຟີລິບປິນ ຈະຮ່ວມກັນລາດຕະເວນນອກເກາະມິນດາເນົາ
Google ເຜີຍແຜ່ໃນວັນທີ 18 ມິຖຸນາຕາມເວລາອາເມລິກາວ່າ: ຈະເຂັ້ມງວດວີດີໂອປະເພດສະໜັບສະໜູນກຸ່ມໃດກຸ່ມໜຶ່ງ ຫລື ວີດີໂອທີ່ມີເນື້ອໃນຍຸຍົງທາງສາສະໜາ ໂດຍການແຈ້ງເຕືອນ ແລະ ຈະບໍ່ລໍຖ້າໃຫ້ຜູ້ໃຊ້ລາຍອື່ນຮັບຮອງ ເຖິງວ່າວີດີໂອເຫລົ່ານັ້ນບໍ່ລະເມີດນະໂຍບາຍຢ່າງຈະແຈງກໍຕາມ. ຂະນະດຽວກັນຈະເພີ່ມຊັບພະຍາກອນດ້ານວິສະວະກຳ ແລະ ການໃຊ້ເຕັກໂນໂລຊີໃນການຄົ້ນຫາວີດີໂອກຸ່ມຫົວຮຸນແຮງ, ເຝິກອົບຮົມຜູ້ຈຳແນກເນື້ອໃນລາຍໃໝ່ໆໃຫ້ສາມາດຄົ້ນຫາ ແລະ ລົບວີດີໂອເຫລົ່ານີ້ໄດ້ຢ່າງວ່ອງໄວ ເພາະວ່າຫລາຍປີຜ່ານມາ Google ໄດ້ຮ່ວມກັບຫລາຍໜ່ວຍງານຄົ້ນຫາ ແລະ ລົບວີດີໂອທີ່ລະເມີດນະໂຍບາຍ, ແຕ່ຍັງບໍ່ພຽງພໍ. ນອກຈາກນີ້ ຍັງຈະຂະຫຍາຍການຮ່ວມມືກັບກຸ່ມຕໍ່ຕ້ານພວກຫົວຮຸນແຮງໃນການຄົ້ນຫາເນື້ອໃນທີ່ອາດນຳໄປໃຊ້ລ້າງສະໝອງ ແລະ ເກນຄົນໄປຮ່ວມກຸ່ມ ລວມທັງຈະຫາທາງເຂົ້າເຖິງໂຄສະນາອອນລາຍທີ່ກຸ່ມລັດອິສລາມ (IS) ໃຊ້ເປັນເຄື່ອງມືເກນຄົນ ແລ້ວປ່ຽນໃຫ້ເປັນໂຄສະນາຕໍ່ຕ້ານການກໍ່ການຮ້າຍ ເພື່ອປ່ຽນໃຈບຸກຄົນເຫລົ່ານັ້ນ.
ຫລາຍປະເທດຢູ່ເອີຣົບທີ່ຖືກກຸ່ມຫົວຮຸນແຮງກໍ່ເຫດຮ້າຍສ້າງຄວາມສູນເສຍໃນໄລຍະຫລາຍປີຜ່ານມາ ໄດ້ກົດດັນ Google, Facebook, Twitter ແລະ ສື່ສັງຄົມອອນລາຍອື່ນໆ ໃຫ້ລົບເນື້ອໃນໂຄສະນາຊວນເຊື່ອຂອງກຸ່ມຕິດອາວຸດ ແລະ ຂໍ້ຄວາມສ້າງຄວາມຄຽດແຄ້ນ. Facebook ປະກາດໃນອາທິດກ່ອນວ່າ: ໄດ້ເພີ່ມການໃຊ້ປັນຍາປະດິດເຊັ່ນ: ການຈັບຄູ່ພາບ, ການເຂົ້າໃຈໃນພາສາຕ່າງປະເທດ ເພື່ອໃຫ້ສາມາດຄົ້ນຫາ ແລະ ລົບເນື້ອໃນກຸ່ມຫົວຮຸນແຮງໄດ້ຢ່າງວ່ອງໄວ.
