ກະຊວງ ຖວທ ເລັ່ງຟື້ນຟູການທ່ອງທ່ຽວລາວ
ປັດຈຸບັນ ລັດຖະບານ ໄດ້ມີນະໂຍບາຍຕ່າງໆ ເພື່ອຊ່ວຍຫລຸດຜ່ອນຜົນກະທົບຕໍ່ເສດຖະກິດລາວ ໂດຍສະເພາະຕໍ່ຂະແໜງການທ່ອງທ່ຽວ ຊຶ່ງລັດຖະບານໄດ້ອອກຂໍ້ແນະນໍາໃຫ້ບັນດາຫົວໜ່ວຍທຸລະກິດທ່ອງທ່ຽວກ່ຽວກັບມາດຕະການຮອງຮັບນັກທ່ອງທ່ຽວເພື່ອຟື້ນຟູການທ່ອງທ່ຽວ ພາຍຫລັງໂຄວິດ-19 ໂດຍສົມທົບກັບຂະແໜງສາທາລະນະສຸກຂັ້ນສູນກາງ ແລະ ທ້ອງຖິ່ນ, ຊຸກຍູ້ພາກທຸລະກິດ ສ້າງລາຍການທ່ອງທ່ຽວໃຫ້ຫລາກຫລາຍ ເພື່ອສົ່ງເສີມການທ່ອງທ່ຽວແບບ “ລາວທ່ຽວລາວ”.
ທ່ານ ອຸ່ນທວງ ຂາວພັນ ຮອງລັດຖະມົນຕີ ກະຊວງຖະແຫ່ງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ລາຍງານໃຫ້ຮູ້ໃນວັນທີ 1 ກໍລະກົດ 2020 ນີ້ວ່າ: ເພື່ອຊຸກຍູ້ສົ່ງເສີມການທ່ອງທ່ຽວລາວໃຫ້ກັບຄືນສູ່ສະພາບປົກກະຕິໂດຍໄວ ແລະ ກະຕຸ້ນການທ່ອງທ່ຽວແບບ “ລາວທ່ຽວລາວ” ກະຊວງ ຖວທ ກໍຄືລັດຖະບານ ໄດ້ຊຸກຍູ້ພາກທຸລະກິດຮ່ວມກັນສ້າງລາຍການທ່ອງທ່ຽວໃຫ້ຫລາກຫລາຍ, ມີສ່ວນຫລຸດຫລາຍຮູບແບບ ເປັນຕົ້ນສ່ວນຫລຸດລາຍການທ່ອງທ່ຽວ, ສ່ວນຫລຸດໂຮງແຮມ, ເຮືອນພັກ, ຮ້ານອາຫານ-ເຄື່ອງດື່ມ ແລະ ອື່ນໆ, ຊຸກຍູ້ໃຫ້ແຕ່ລະແຂວງ ຫລື ຕົວເມືອງທ່ອງທ່ຽວສ້າງກິດຈະກໍາການທ່ອງທ່ຽວທີ່ຕິດພັນກັບວັດທະນະທໍາ, ຮີດຄອງປະເພນີຂອງທ້ອງຖິ່ນ, ວິຖີຊີວິດຂອງທ້ອງຖິ່ນ, ຫັດຖະກໍາທ້ອງຖິ່ນ, ອາຫານທ້ອງຖິ່ນ ແລະ ການທ່ຽວຊົມທໍາມະຊາດ. ຟື້ນຟູຄວາມເຊື່ອໝັ້ນຂອງນັກທ່ອງທ່ຽວພາຍໃນ ແລະ ຕ່າງປະເທດ ໃນນີ້ເນັ້ນໃສ່ດ້ານມາດຕະການດ້ານຄວາມປອດໄພ, ວິທີການຮັກສາສຸຂະອະນາໄມ, ການກະກຽມການປ້ອງກັນຕົນເອງກ່ອນການ ເດີນທາງ, ກ່ຽວກັບບັນຫາດ້ານສຸຂະອະນາໄມ ແລະ ຄວາມປອດໄພຂອງນັກທ່ອງທ່ຽວ ຜູ້ໃຫ້ບໍລິການຂອງພາກລັດ ແລະ ພາກທຸລະກິດ ໃນຂະແໜງການທ່ອງທ່ຽວ ພ້ອມສົ່ງເສີມຜະລິດຕະພັນການທ່ອງທ່ຽວທີ່ໂດດເດັ່ນຂອງລາວ ເພື່ອໃຫ້ຄົນລາວອອກເດີນທາງທ່ອງທ່ຽວ ພາຍໃນ “ລາວທ່ຽວລາວ”.
ພ້ອມດຽວກັນນັ້ນ, ຍັງຈະຊຸກຍູ້ ແລະ ສົ່ງເສີມ ບັນດາແຂວງໃນທົ່ວປະເທດ ຈັດກິດຈະກຳ ເພື່ອສົ່ງເສີມການທ່ອງທ່ຽວລາວ ເຊັ່ນ: ງານບຸນປະເພນີຂອງແຕ່ລະທ່ອງຖິ່ນ, ງານເທດສະການອາ ຫານແຕ່ລະພາກ, ເທດສະການດື່ມຊາ 400 ປີ, ເທດສະການກາເຟລາວ, ເທດສະການອາຫານພື້ນບ້ານ, ງານວາງສະແດງ ແລະ ຂາຍສິນຄ້າເຄື່ອງຫັດຖະກຳ. ພ້ອມນັ້ນ, ຍັງຈະສ້າງວີດີໂອສັ້ນ ເພື່ອໂຄສະນາການທ່ອງທ່ຽວ ພາຍຫລັງສິ້ນສຸດການລະບາດຂອງພະຍາດໂຄວິດ-19 ແລ້ວໂພດຕາມສື່ອອນລາຍຕ່າງໆ ເຊັ່ນ: FB, Twitter, IG, Tik Tok, Wechat ແລະ Youtube, ພ້ອມທັງຈະຈັດກິດຈະກໍາ ຮ່ວມກັບປະເທດໃກ້ຄຽງ ເພື່ອກະຕຸ້ນການທ່ອງທ່ຽວ ເຊັ່ນ: ຂີ່ລົດຖີບ, ງານວາງສະແດງຜະ ລິດຕະພັນການທ່ອງທ່ຽວ ແລະ ອື່ນໆ.
