‘ອາເມລິກາ’ ປະກາດ ‘ຫົວເຫວີຍ’ ເປັນໄພຄວາມໝັ້ນຄົງ ເລັ່ງຂັບໄລ່ອອກນອກຕະຫລາດລົງທຶນ
“ອາເມລິກາ” ປະກາດ “ຫົວເຫວີຍ” ເປັນໜຶ່ງໃນສອງບໍລິສັດຈີນຍັກໃຫຍ່ ເປັນໄພຄວາມໝັ້ນຄົງ ເລັ່ງຂັບໄລ່ອອກຈາກຕະຫລາດລົງທຶນເຕັກໂນໂລຊີ.
ຄະນະກຳມະການກາງຄວບຄຸມກິດຈະການສື່ສານຂອງອາເມລິກາ (FCC) ປະກາດວ່າ: ບໍລິສັດ ຫົວເຫວີຍ ເຕັກໂນໂລຊີ ແລະ ບໍລິສັດ ແຊດທີອີ (ZTE Corp) ເປັນໄພຄຸກຄາມຕໍ່ຄວາມໝັ້ນຄົງຂອງປະເທດ ເຊິ່ງເປັນມາດຕະການອີກຂັ້ນໜຶ່ງທີ່ຈະຊຸກດັນໃຫ້ສອງບໍລິສັດດັ່ງກ່າວຂອງຈີນອອກໄປຈາກຕະຫລາດອາເມລິກາ. ຂະນະທີ່ຜູ້ປະກອບການເຄືອຂ່າຍຂະໜາດນ້ອຍໃນຊົນນະບົດຂອງອາເມລິກາອາໄສອຸປະກອນເຄືອຂ່າຍລາຄາຖືກຈາກຫົວເຫວີຍ ແລະ ແຊດທີອີ.
FCC ເປີດເຜີຍວ່າ: ການປະກາດດັ່ງກ່າວຈະສົ່ງຜົນໃຫ້ຜູ້ປະກອບການເຄືອຂ່າຍຂະໜາດນ້ອຍຈຳນວນຫລາຍໃນຊົນນະບົດຂອງອາເມລິກາ ບໍ່ສາມາດໃຊ້ເງິນຊ່ວຍເຫລືອຂອງລັດຖະບານກາງໃນການຊື້ ຫລື ບຳລຸງຮັກສາອຸປະກອນທີ່ຜະລິດໂດຍຫົວເຫວີຍ ແລະ ແຊດທີອີ ອີກຕໍ່ໄປ.
“ຫົວເຫວີຍ ແລະ ແຊດທີອີ ມີການພົວພັນໃກ້ຊິດກັບພັກກອມມູນິດ ແລະ ກອງທັບຂອງຈີນ, ພວກເຮົາກຳລັງສົ່ງສານທີ່ຈະແຈ້ງວ່າ: ລັດຖະບານອາເມລິກາ ໂດຍສະເພາະ FCC ບໍ່ສາມາດ ແລະ ຈະບໍ່ຍອມໃຫ້ພັກກອມມູນິດຈີນເຂົ້າມາຫາຜົນປະໂຫຍດຈາກຊ່ອງວ່າງໃນເຄືອຂ່າຍການສື່ສານຂອງອາເມລິກາ”.
ປະທານ FCC ກ່າວວ່າ: ອາເມລິກາເຊື່ອວ່າ ລັດຖະບານຈີນອາດໃຊ້ອຸປະກອນຂອງຫົວເຫວີຍໃນການຈາລະກຳຂໍ້ມູນ. ຂະນະທີ່ຫົວເຫວີຍປະຕິເສດຫລາຍເທື່ອວ່າ: ບໍລິສັດບໍ່ໄດ້ເປັນຄວາມສ່ຽງດ້ານຄວາມໝັ້ນຄົງ ແລະ ຢືນຢັນວ່າ: ບໍລິສັດເປັນອິດສະຫລະຈາກລັດຖະບານຈີນ.
ກຳມາທິການ FCC ລະບຸໃນຖະແຫລງການໃນວັນທີ 30 ມິຖຸນາວ່າ: ຍັງມີອຸປະກອນທີ່ບໍ່ໜ້າເຊື່ອຖືຢູ່ໃນອາເມລິກາ ແລະ ຮຽກຮ້ອງໃຫ້ FCC ດຳເນີນໂຄງການປ່ຽນອຸປະກອນເຫລົ່ານັ້ນ ໂດຍທ່ານລະບຸວ່າ: “ຍັງມີເລື່ອງທີ່ຕ້ອງດຳເນີນອີກຫລາຍ”.
ເຖິງຢ່າງໃດກໍຕາມ, ຕີລາຄາໃນປີຜ່ານມາແລ້ວວ່າ: ຜູ້ປະກອບການເຄືອຂ່າຍສື່ສານໃນຊົນນະບົດຂອງອາເມລິກາປະມານ 48 ແຫ່ງໄດ້ຮັບເງິນຊ່ວຍເຫລືອຈາກລັດຖະບານກາງອາເມລິກາ ແລະ ໃຊ້ອຸປະກອນຂອງຫົວເຫວີຍ ຫລື ແຊດທີອີ. ນອກຈາກນີ້ FCC ຍັງເປີດເຜີຍວ່າ: ຕົ້ນທຶນສະເລ່ຍໃນການປ່ຽນອຸປະກອນຂອງແຕ່ລະບໍລິສັດນັ້ນ ອາດຈະຢູ່ລະຫວ່າງ 40-45 ລ້ານໂດລາ.
