ຍັກໃຫຍ່ການບິນ ! ‘ແອບັສ’ ກຽມເລີກຈ້າງ 15.000 ຄົນທົ່ວໂລກ ຍ້ອນພິດໂຄວິດ
“ແອບັສ” (Airbus) ຜູ້ຜະລິດເຮືອບິນຍັກໃຫຍ່ເອີຣົບ ປະກາດແຜນຫລຸດພະນັກງານປະມານ 15.000 ຄົນທົ່ວໂລກ ຮັບມືພິດໂຄວິດ-19. ຂະນະທີ່ລັດຖະບານຝຣັ່ງຊີ້ ແອບັສປົດພະນັກງານຫລາຍເກີນໄປ.
ບໍລິສັດແອບັສ ຖະແຫລງໃນວັນທີ 30 ມິຖຸນາວ່າ: ມີແຜນເລີກຈ້າງພະນັກງານລົງປະມານ 15.000 ຄົນທົ່ວໂລກ ຫລື 11% ຂອງຈຳນວນພະນັກງານທັງໝົດ ພາຍໃນໄລຍະລະດູຮ້ອນປີ 2021 ເພື່ອຕອບສະໜອງ “ວິກິດຄັ້ງຮ້າຍແຮງທີ່ສຸດ” ທີ່ອຸດສາຫະກຳການບິນໂລກກຳລັງຜະເຊີນ ຜົນຈາກການລະບາດຂອງໄວຣັສໂຄໂຣນາສາຍພັນໃໝ່ ຕົ້ນຕໍພະຍາດໂຄວິດ-19.
ການເຄື່ອນໄຫວຄັ້ງນີ້ມີຂຶ້ນຫລັງຈາກທຸລະກິດການບິນຫລຸດລົງເກືອບ 40% ໃນໄລຍະບໍ່ເທົ່າໃດເດືອນຜ່ານມາ ຫລັງການລະບາດຂອງໂຄວິດ-19.
“ເນື່ອງຈາກການສັນຈອນທາງອາກາດມີທ່າອ່ຽງຍັງບໍ່ຟື້ນຕົວສູ່ລະດັບກ່ອນວິກິດໂຄວິດ-19 ຈົນຮອດປີ 2023 ແລະ ອາດຍາວຈົນຮອດປີ 2025. ຕອນນີ້ ແອບັສຈຳເປັນຕ້ອງໃຊ້ມາດຕະການເພີ່ມຕື່ມເພື່ອຮັບມືທ່າອ່ຽງອຸດສາຫະກຳການບິນຍຸກຫລັງໂຄວິດ-19” ແອບັສ ຖະແຫລງ.
ຜູ້ຜະລິດເຮືອບິນລາຍນີ້ລະບຸອີກວ່າ: ໃນແຜນເລີກຈ້າງຄັ້ງນີ້ ຈະເປັນການຫລຸດພະນັກງານ 5.000 ຄົນຢູ່ຝຣັ່ງ, 5.100 ຄົນຢູ່ເຢຍລະມັນ, 900 ຄົນຢູ່ສະເປນ, 1.700 ຄົນຢູ່ສະຫະຣາຊະອານາຈັກ ແລະ 1.300 ຄົນທີ່ເຮັດວຽກອື່ນໆຂອງແອບັສທົ່ວໂລກ.
ແອບັສ ເປີດເຜີຍວ່າ: ປັດຈຸບັນ ບໍລິສັດມີແຜນຫາລືກັບສະຫະພາບແຮງງານ ແລະ ຈະໃຊ້ມາດຕະການຕ່າງໆໃນການຫລຸດຈຳນວນພະນັກງານ ເຊິ່ງລວມທັງການລາອອກໂດຍສະໝັກໃຈ, ຮັບບຳນານກ່ອນກຳນົດ ແລະ ໂຄງການໂຈະຈ້າງວຽກບາງສ່ວນໃນໄລຍະຍາວ.
ຂະນະທີ່ກະຊວງເສດຖະກິດຝຣັ່ງຖະແຫລງວ່າ: ຕົວເລກແຜນເລີກຈ້າງຂອງແອບັສນັ້ນ “ຫລາຍເກີນໄປ” ແລະ ຮຽກຮ້ອງໃຫ້ຍັກໃຫຍ່ລາຍນີ້ເຮັດທຸກວິທີທາງເພື່ອຈຳກັດຕົວເລກດັ່ງກ່າວ.
