‘ຈີນ’ ພົບໄຂ້ຫວັດໝູສາຍພັນໃໝ່
“ນັກວິໄຈຈີນ” ພົບໄຂ້ຫວັດໝູ ຊະນິດໃໝ່ຊື່ “G4” ມີປະສິດທິພາບປັບຕົວແຜ່ຄົນສູ່ຄົນ ແລະ ສ້າງພະຍາດລະບາດໃຫຍ່ໄດ້.
ມີລາຍງານຜົນການສຶກສາໃນວາລະສານ Proceedings of the National Academy of Sciences ລະບຸວ່າ: ນັກວິທະຍາສາດຢູ່ສູນຄວບຄຸມ ແລະ ປ້ອງກັນພະຍາດ (CDC) ຂອງຈີນ ແລະ ມະຫາວິທະຍາໄລຫລາຍແຫ່ງຢູ່ຈີນ ຄົ້ນພົບໄວຣັສໄຂ້ຫວັດໝູ (swine flu) ຊະນິດໃໝ່ຊື່ G4 EA H1N ຫລື G4 ສືບສາຍພັນທຸກຳຈາກໄວຣັສ H1N1 ທີ່ເຄີຍສ້າງພະຍາດລະບາດໃຫຍ່ (pandemic) ໃນປີ 2009 ເຖິງວ່າຍັງບໍ່ແມ່ນໄພຄຸກຄາມສະເພາະໜ້າເວລານີ້, ແຕ່ເຊື້ອຊະນິດໃໝ່ມີລັກສະນະຄົບຖ້ວນທີ່ຈະປັບຕົວສູ່ການແຜ່ເຊື້ອຈາກຄົນສູ່ຄົນ ແລະ ກາຍເປັນພະຍາດລະບາດໃຫຍ່ໄດ້.
ຜ່ານມາ ພົບຜູ້ຕິດເຊື້ອຄ້າຍຄືໄວຣັສໃໝ່ຢືນຢັນ 2 ຄົນ ໃນປີ 2016 ກັບ 2019 ອາຍຸ 46 ປີກັບ 9 ປີ ແລະ ຜົນສຳຫລວດທາງລະບາດວິທະຍາພົບວ່າຜູ້ປ່ວຍທັງສອງຄົນ ມີເພື່ອນບ້ານລ້ຽງໝູ ບົ່ງວ່າ: ເຊື້ອ G4 ສາມາດແຜ່ຈາກໝູສູ່ຄົນໄດ້ ແລະ ອາດນຳໄປສູ່ການຕິດເຊື້ອຮຸນແຮງ ຫລື ອາດເຖິງຂັ້ນເສຍຊີວິດ. ນັກວິໄຈບໍ່ໄດ້ລົງລາຍລະອຽດເລື່ອງອາການ ເນື່ອງຈາກຍັງບໍ່ໄດ້ແຜ່ໃນຄົນວົງກວ້າງ.
ແຕ່ຈາກການທົດລອງກັບຕົວເຟີເຣດ ທີ່ມັກໃຊ້ໃນການສຶກສາໄຂ້ຫວັດໃຫຍ່ເພາະເປັນສັດທີ່ສະແດງອາການໃກ້ຄຽງກັບມະນຸດເຊັ່ນ: ເປັນໄຂ້, ໄອ ແລະ ຈາມ ພົບວ່າ: ໄວຣັສໄຂ້ຫວັດໝູ G4 ຕິດເຊື້ອ ແລະ ແບ່ງຕົວໃນຈຸລັງມະນຸດໄດ້ງ່າຍ ແລະ ອາການໃນເຟີເຣດຮຸນແຮງກວ່າໄວຣັສໄຂ້ຫວັດໃຫຍ່ຊະນິດອື່ນ.
ທັງນີ້ ຈາກການສຸ່ມກວດປ້າຍດັງໝູຈາກໂຮງງານຂ້າສັດ 3 ໝື່ນໂຕ ໃນ 10 ມົນທົນຂອງຈີນ ແລະ ຢູ່ໂຮງໝໍສັດ 1 ແຫ່ງ ໄລຍະປີ 2011-2018 ເພື່ອສຶກສາຄວາມສ່ຽງຂອງໄວຣັສໄຂ້ຫວັດໝູຕໍ່ຄົນ, ນັກວິໄຈພົບໄວຣັສໄຂ້ຫວັດໝູ 179 ຊະນິດ ແລະ ນັບຈາກປີ 2016 ເປັນຕົ້ນມາ ພົບວ່າສ່ວນຫລາຍເປັນໄວຣັສທີ່ສາມາດແຜ່ສູ່ຄົນ ແລະ ສ້າງພະຍາດລະບາດໄດ້.
ນອກຈາກນີ້ ຜົນກວດຕົວຢ່າງເລືອດ 300 ຕົວຢ່າງຈາກກະສິກອນຜູ້ລ້ຽງໝູຢູ່ຟາມ 15 ແຫ່ງ ພົບວ່າມີພຽງ 10,4% ເທົ່ານັ້ນທີ່ມີສານພູມຄຸ້ມກັນ ຫລື ແອນຕິບໍດີໄວຣັສ G4 ເຊິ່ງໝາຍຄວາມວ່າມີໂອກາດສູງທີ່ໄວຣັສຊະນິດນີ້ຈະແຜ່ລະບາດໃນຄົນໄດ້. ນັກວິໄຈແນະນຳວ່າ: ຄວນຟ້າວດຳເນີນມາດຕະການຄວບຄຸມໄວຣັສໃນໝູ ສອດຄ່ອງອາການແຮງງານໃກ້ຊິດກັບໝູ ເພື່ອຢັບຢັ້ງການລະບາດໃນອະນາຄົດໄດ້ຢ່າງວ່ອງໄວ.
