ໂຄວິດ-19 ລະບາດ ປະຊາຊົນລາວຈະວ່າງງານຫລາຍຂຶ້ນ ແລະ 1 ແສນກວ່າຄົນຈະກາຍເປັນຜູ້ທຸກຍາກຕື່ມອີກ

ໃນວັນທີ 30 ມິຖຸນາ 2020 ກົມພັດທະນາຊົນນະບົດ ແລະ ສະຫະກອນ ໄດ້ຈັດກອງປະຊຸມປຶກສາຫາລືກ່ຽວກັບການຮັບມືຜົນກະທົບຂອງພະຍາດໂຄວິດ-19 ຕໍ່ຄວາມທຸກຍາກຢູ່ຊົນນະບົດ ໂດຍການເຂົ້າຮ່ວມຂອງທ່ານ ລຽນ ທິແກ້ວ ລັດຖະມົນຕີກະຊວງກະສິກຳ ແລະ ປ່າໄມ້, ມີທ່ານ ຈິດ ທະວີໄສ ຜູ້ອຳນວຍການກອງທຶນຫລຸດຜ່ອນຄວາມທຸກຍາກ ກະຊວງກະສິກຳ ແລະ ປ່າໄມ້ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ ເພື່ອເຮັດໃຫ້ບັນດາຂະແໜງການຕ່າງໆ ມີຄວາມເຂົ້າໃຈດີຂຶ້ນກວ່າເກົ່າ ກ່ຽວກັບສະພາບການກະທົບໃສ່ຄວາມທຸກຍາກຢູ່ຊົນນະບົດ, ລະດົມຄວາມຄິດກ່ຽວກັບທິດທາງ ວິທີການໃນການຮັບມືສະກັດກັ້ນແກ້ໄຂ ແລະ ໄດ້ຮັບຜົນດີ.

ທ່ານ ລຽນ ທິແກ້ວ ກ່າວວ່າ: ເຖິງວ່າ ສປປ ລາວ ໄດ້ມີຜົນສໍາເລັດໃນການຮັບມືກັບການລະບາດຂອງພະຍາດດັ່ງກ່າວກໍຕາມ, ແຕ່ຜົນກະທົບທາງເສດຖະກິດຍັງໜັກໜ່ວງ ໂດຍສະເພາະແມ່ນການລະບາດຂອງພະຍາດ ໄດ້ເຮັດໃຫ້ຄວາມທຸກຍາກເພີ່ມຂຶ້ນຄືກັນກັບບັນດາປະເທດໃນໂລກ. ຕາມການປະເມີນຂອງອົງການສາກົນ ເຫັນວ່າ: ໂດຍລວມແລ້ວປະຊາຊົນລາວ 120.000 ກວ່າຄົນ ຈະກາຍເປັນຜູ້ທຸກຍາກຕື່ມອີກ ລວມທັງຢູ່ຕົວເມືອງ ແລະ ຊົນນະບົດ; ອັນພົ້ນເດັ່ນແມ່ນບັນຫາວຽກເຮັດງານທໍາທີ່ເກີດຈາກການປິດວິສາຫະກິດ, ຫ້າງຮ້ານ, ຫົວໜ່ວຍທຸລະກິດຢູ່ຕົວເມືອງ ເຮັດໃຫ້ແຮງງານຕ້ອງກັບຄືນບ້ານ ເຊັ່ນດຽວກັບການກັບຄືນບ້ານຂອງແຮງງານລາວຈາກປະເທດໄທ ເຊິ່ງທັງສອງພາກສ່ວນນີ້ລວມເຂົ້າຄາດວ່າມີຫລາຍກວ່າແສນຄົນທີ່ເຂົາເຈົ້າເຄີຍສົ່ງເງິນລ້ຽງຄອບຄົວຂອງຕົນ ແຕ່ດຽວນີ້ກາຍມາເປັນຄົນວ່າງງານກັບຄືນບ້ານສ່ວນໃຫຍ່ຢູ່ເຂດຊົນນະບົດທີ່ຍັງທຸກຍາກ. ດ້ວຍເຫດນັ້ນ, ຈຶ່ງຄາດຄະເນວ່າ ຢູ່ຊົນນະບົດຈະມີຄວາມທຸກຍາກເພີ່ມຂຶ້ນຫລາຍກວ່າຢູ່ຕົວເມືອງ. ເຖິງຢ່າງໃດກໍດີ ແຮງງານດັ່ງກ່າວສາມາດກາຍເປັນກໍາລັງແຮງທີ່ສໍາຄັນໃນການຜະລິດກະສິກໍາ ແລະ ພັດທະນາຊົນນະບົດໃນສະເພາະໜ້າ ແລະ ຍາວນານ, ກົງກັນຂ້າມຖ້າພວກເຮົາບໍ່ມີແຜນການການໂຄງການຊຸກຍູ້ຢ່າງເໝາະສົມຈະເຮັດໃຫ້ກາຍເປັນບັນຫາເສດຖະກິດສັງຄົມ ລວມທັງເກີດປະກົດການຫຍໍ້ທໍ້ທາງສັງຄົມຕ່າງໆຢູ່ຊົນນະບົດທີ່ເປັນເປົ້າໝາຍບູລິມະສິດຂອງການພັດທະນາຂອງພວກເຮົາໃນປັດຈຸບັນ. ດັ່ງນັ້ນ, ລັດຖະບານຈຶ່ງໄດ້ມີ 10 ນະໂຍບາຍ ແລະ 9 ມາດຕະການແກ້ໄຂຜົນກະທົບຂອງການລະບາດພະຍາດຕໍ່ເສດຖະກິດສັງຄົມ; ສໍາລັບກະຊວງກະສິກໍາ ແລະ ປ່າໄມ້ ກໍໄດ້ມີທິດທາງລວມ ປຸກລະດົມກໍາລັງແຮງສັງລວມພາຍໃນຊາດ, ຂຸດຄົ້ນທຸກຄວາມສາມາດບົ່ມຊ້ອນທີ່ມີ, ຫັນວິກິດໃຫ້ເປັນໂອກາດ ເພື່ອຮັບປະກັນຄວາມໝັ້ນຄົງດ້ານສະບຽງອາຫານໃຫ້ມີຄວາມໜັກແໜ້ນ, ຜະລິດສິນຄ້າເພື່ອບໍລິໂພກພາຍໃນໃຫ້ໄດ້ໂດຍພື້ນຖານ, ຍູ້ແຮງການຜະລິດສິນຄ້າທີ່ເປັນທ່າແຮງຕາມທິດກະສິກໍາສະອາດເພື່ອສົ່ງອອກຢ່າງແຂງແຮງ, ປະກອບສ່ວນສ້າງວຽກເຮັດງານທໍາໃຫ້ແກ່ຊາວກະສິກອນແຮງງານລາວທີ່ກັບມາຈາກຕ່າງປະເທດທີ່ຍັງວ່າງງານ, ປະກອບສ່ວນເຂົ້າໃນການຂະຫຍາຍຕົວຂອງເສດຖະກິດແຫ່ງຊາດ ສົມທົບກັບມາດຕະການຂອງແຮງງານ ແລະ ສະຫວັດດີການສັງຄົມ ກໍຄືຂະແໜງອື່ນໆ ເພື່ອຊ່ວຍເຫລືອຜູ້ປະກອບການ, ຜູ້ອອກແຮງງານລາວ ແລະ ຜູ້ດ້ອຍໂອກາດທີ່ທຸກຍາກທີ່ໄດ້ຮັບຜົນກະທົບຈາກການລະບາດຂອງພະຍາດ.

ທ່ານ ລຽນ ທິແກ້ວ ກ່າວຕື່ມວ່າ: ເພື່ອເປັນການປະສານສົມທົບບັນດານະໂຍບາຍ ແລະ ມາດຕະການຕ່າງໆ ໃຫ້ມີຄວາມເອກະພາບເປັນລວງດຽວກັນ, ກອງປະຊຸມໃນຄັ້ງນີ້ ກະຊວງກະສິກໍາ ແລະ ປ່າໄມ້ ທີ່ຮັບຜິດຊອບວຽກງານພັດທະນາຊົນນະບົດລຶບລ້າງຄວາມທຸກຍາກ ຈຶ່ງໄດ້ຈັດກອງປະຊຸມເພື່ອປຶກສາຫາລືແລກປ່ຽນຂໍ້ມູນຂ່າວສານທາງດ້ານນະໂຍບາຍມາດຕະການ, ເພີ່ມທະວີການປະສານງານກັນໃນການແກ້ໄຂບັນຫາດັ່ງກ່າວ ໂດຍສະເພາະແມ່ນສະກັດກັ້ນບໍ່ໃຫ້ຄວາມທຸກຍາກໃນຕົວເມືອງ ກໍຄືຊົນນະບົດເພີ່ມຂຶ້ນ, ສ້າງເງື່ອນໄຂພື້ນຖານອັນດີໃຫ້ແກ່ລະດົມແຫລ່ງທຶນເຂົ້າໃສ່ບັນດາໂຄງການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ໂດຍສະເພາະແມ່ນລຶບລ້າງຄວາມທຸກຍາກແຕ່ນີ້ຫາປີ 2030 ໃຫ້ບັນລຸຕາມຄາດໝາຍທີ່ວາງອອກ.