ຄະນະຄຸ້ມຄອງເຂດເສດຖະກິດພິເສດ ນະຄອນຫລວງວຽງຈັນ ລົງແກ້ໄຂບັນຫາເລື່ອງສິ່ງແວດລ້ອມ ຂອງ ບໍລິສັດ ຄວາມຫວັງໃໝ່.

ເມື່ອບໍ່ດົນມານີ້, ຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ ໄດ້ຈັດກອງປະຊຸມປຶກສາຫາລື ເພື່ອແກ້ໄຂບັນຫາສິ່ງແວດລ້ອມ ເຊັ່ນ: ບັນຫາກິ່ນເໝັນ, ສຽງດັງ ແລະ ການບໍລິຫານຈັດການຂີ້ເຫຍື້ອ ຂອງ ບໍລິສັດ ຄວາມຫວັງໃໝ່ລາວ ຈຳກັດ ທີ່ຕັ້ງຢູ່ ເຂດພັດທະນາ ເມືອງໄຊເສດຖາ ນະຄອນຫຼວງວຽງຈັນ ໂດຍການເປັນປະທານຂອງ ທ່ານ ສົມກຽດ ສີຫາລາດ ຮອງຫົວໜ້າຄະນະຄຸ້ມຄອງເຂດເສດຖະກິດພິເສດ ນະຄອນຫຼວງວຽງຈັນ (ຜູ້ຊີ້ນຳວຽກງານທີ່ດິນ ແລະ ສິ່ງແວດລ້ອມ) ພ້ອມນັ້ນ ຄະນະຜູ້ເຂົ້າຮ່ວມກອງປະຊຸມ ກໍໄດ້ລົງກວດພື້ນທີ່ຕົວຈິງຂອງບັນຫາດັ່ງກ່າວ.
ກອງປະຊຸມໄດ້ປືກສາຫາລືກັນຢ່າງກົງໄປກົງມາ ແລະ ສະຫຼຸບໄດ້ ດັ່ງນີ້: ໃຫ້ບໍລິສັດມີມາດຕະການໃນການກຳຈັດບັນຫາດັ່ງກ່າວ ເປັນຕົ້ນແມ່ນ: ສ້າງຫ້ອງເກັບສຽງເພື່ອບໍ່ໃຫ້ມີສຽງດັງເກີນມາດຕະຖານ, ໃຫ້ວິຊາການຄົ້ນຄວ້າຊອກວິທີເພື່ອກຳຈັດກິ່ນເໝັນ ແລະ ບໍລິຫານຈັດການຂີ້ເຫຍື້ອ ບໍລິເວນຂອງບໍລິສັດຕົນ.