ຮອດ29/06/202 ລາວ ມີຜູ້ເສຍຊີວິດຍ້ອນໄຂ້ຍຸງລາຍ 6 ຄົນ ມີຜູ້ຕິດເຊື້ອສະສົມ 2.223 ຄົນ
ສປປ ລາວ ມີຜູ້ເສຍຊີວິດຍ້ອນໄຂ້ຍຸງລາຍ 6 ຄົນ ມີຜູ້ຕິດເຊື້ອສະສົມ 2.223 ຄົນ
ຕາມການລາຍງານຈາກ ທ່ານ ດຣ. ສີສະຫວາດ ສຸດທານີລະໄຊ ຮອງຫົວໜ້າກົມຄວບຄຸມພະຍາດຕິດຕໍ່ ກະຊວງສາທາລະນະສຸກ ໃນໂອກາດຖະແຫລງຂ່າວຕໍ່ສື່ມວນຊົນ ກ່ຽວກັບສະພາບການແຜ່ລະບາດຂອງພະຍາດໂຄວິດ-19 ວັນທີ 29 ມິຖຸນາ 2020 ນີ້ວ່າ: ປັດຈຸບັນ ຢູ່ ສປປ ລາວ ມີຜູ້ເສຍຊີ ວິດຍ້ອນພະຍາດໄຂ້ຍຸງລາຍແລ້ວ 6 ຄົນ. ໃນນັ້ນຢູ່ນະຄອນຫລວງ 2 ຄົນ, ບໍລິຄຳໄຊ 2 ຄົນ, ຄຳມ່ວນ 1 ຄົນ ແລະ ໄຊຍະບູລີ 1 ຄົນ. ທຸກໆປີເມື່ອກ້າວເຂົ້າສູ່ລະດູຝົນ, ພະຍາດໄຂ້ຍຸງລາຍ ກໍມັກຈະເກີດຂຶ້ນໃນຫລາຍແຂວງ ແລະ ສົ່ງຜົນກະທົບຕໍ່ຊີວິດການເປັນຢູ່ ແລະ ສຸຂະພາບຂອງພໍ່ແມ່ປະຊາຊົນ ໂດຍນັບແຕ່ວັນທີ 01/01/2020-28/06/2020 ມີຜູ້ຕິດເຊື້ອກໍລະນີສະສົມທັງໝົດ 2.223 ຄົນ, ມີລາຍງານກໍລະນີໃນ 17 ແຂວງ, ໃນນັ້ນ ແຂວງທີ່ມີການລາຍງານຫລາຍກວ່າໝູ່ແມ່ນ ນະຄອນຫລວງວຽງຈັນ, ເຊິ່ງມີເຖິງ 499 ຄົນ, ຖັດລົງມາແມ່ນແຂວງວຽງຈັນ 304 ກໍລະນີ, ບໍລິຄຳໄຊ 257 ກໍລະນີ ແລະ ແຂວງອັດຕະປື 230 ກໍລະນີ.
ທ່ານ ດຣ. ສີສະຫວາດ ສຸດທານີລະໄຊ ກ່າວວ່າ: ຕໍ່ສະພາບການດັ່ງກ່າວ, ພວກເຮົາຕ້ອງພ້ອມກັນປະຕິບັດຄຳຂວັນທີ່ວ່າ ບໍ່ມີໜອນນ້ຳຍຸງລາຍກໍ່ບໍ່ມີຍຸງລາຍ ແລະ ບໍ່ມີໄຂ້ເລືອດອອກ, ພ້ອມນັ້ນ ຕ້ອງປະຕິບັດ 5ປ ຢ່າງເຄັ່ງຄັດໃຫ້ເປັນປະຈຳ ຈຶ່ງສາມາດທຳລາຍແຫລ່ງເພາະພັນຂອງຍຸງລາຍໄດ້ ຄື: ປິດ ຝາພາຊະນະທີ່ເກັບນ້ຳໃນເຮືອນ ແລະ ນອກເຮືອນ ເພື່ອບໍ່ໃຫ້ຍຸງລາຍມາໄຂ່ໃສ່; ປ່ຽນນ້ຳໃນພາຊະນະເຊັ່ນ: ເຕົ້າດອກໄມ້, ນ້ຳຮອງຕີນຕູ້, ຖ້ານຮອງຈອກນ້ຳ; ປ່ອຍ ປາຫາງນົກຍຸງເພື່ອກິນໜອນນ້ຳ; ປັບປຸງ ການອະນາໄມສິ່ງແວດລ້ອມອ້ອມເຮືອນບໍ່ໃຫ້ມີກະໂປະກະປ໋ອງ, ຢາງຕີນລົດເກົ່າທີ່ມີນ້ຳຂັງ; ປະຕິບັດໃຫ້ເປັນນິໄສປະຈຳທຸກໆອາທິດ. ຖ້າເປັນໄຂ້ໃຫ້ຮີບຮ້ອນໄປພົບແພດໝໍດ່ວນ, ຫາກທຸກຄົນປະຕິບັດໄດ້ຕາມ 5 ປ ຢ່າງເຂັ້ມງວດກໍ່ຈະສາມາດຫລຸດຜ່ອນ, ປ້ອງກັນການເຈັບເປັນ ແລະ ສະກັດກັ້ນການແຜ່ລະບາດຂອງເຊື້ອພະຍາດໄຂ້ຍຸງລາຍໃຫ້ຫລຸດລົງເທື່ອລະກ້າວ.
