ຍ້ອນຫຍັງຂະແໜງການກະສິກຳເປັນ ຂະແໜງທີ່ແຮງງານລາວຫຼາຍທີ່ສຸດ?

ໂດຍ: ມຶກບໍ່ແຫ້ງ

ໃນທ່າມກາງທີ່ແຮງງານລາວກຳລັງວ່າງວຽກຍ້ອນພິດໂຄວິດນັ້ນພວກເຮົາມາເບິ່ງກັນວ່າການພະຍາກອນຕະຫຼາດແຮງງານລາວນັ້ນຂະແໜງການໃດຍັງຕ້ອງການຫຼາຍ.

ການລະບາດຂອງພະຍາດໂຄວິດ 19 ໄດ້ນຳເອົາຜົນເສຍຫາຍມາສູ່ຕະຫຼາດແຮງງານສົມຄວນ, ຄົນຈຳນວນຫຼວງຫຼາຍຕ້ອງວ່າງວຽກ. ຄວາມຈິງແລ້ວກ່ອນການລະບາດໂຄວິດນັ້ນໄພວ່າງງານໂດຍສະເພາະສຳລັບນັກສຶກສທີ່ຈົບໃໝ່ນັ້ນກໍມີລະດັບໜຶ່ງແລ້ວແຕ່ ການລະບາດຂອງພະຍາດໂຄວິດ 19 ນັ້ນຍິ່ງເພີ່ມທະວີຄວາມຮຸນແຮງຂຶ້ນ.

ຢ່າງໃດກໍຕາມອີງຕາມບົດລາຍງານການພະຍາກອນຕະຫຼາດແຮງງານແຕ່ປີ 2019-2022 ຂອງກະຊວງແຮງງານແລະສະຫວັດດີການສັງຄົມນັ້ນເຫັນວ່າຂະແໜງການກະສິກຳແມ່ນມີຄວາຕ້ອງການຫຼາຍກວ່າໝູ່, ຮອງລົງມາແມ່ນຂະແໜງກໍ່ສ້າງ, ອຸດສາຫະກຳປຸງແຕ່ງ, ການສຶກສາເປັນຕົ້ນ.

ກະສິກຳແມ່ນພື້ນຖານການດຳລົງຊີວິດຂອງປະຊາຊົນລາວມາແຕ່ດຶກດຳບັນແລະຮອດປັດຈຸບັນວຽກງານກະສິກຳຂອງພວກເຮົາຍັງຖືວ່າກວມເອົາກຳລັງແຮງງານຫຼາຍກວ່າຂະແໜງການອື່ນໆ. ແຕ່ການຜະລິດກະສິກຳສ່ວນໃຫຍ່ຂອງລາວຍັງອາໄສທຳມະຊາດ, ຂາດເຕັກນິກການຜະລິດ, ເຮັດໃຫ້ມີຜົນຜະລິດຕໍ່າແລະໃຊ້ກຳລັງແຮງງານຫຼາຍ. ເພາະສະນັ້ນຈຶ່ງເຫັນວ່າຄວນໄດ້ຮັບການປັບປຸງໃນຫຼາຍດ້ານ.

ເຖິງວ່າລູກຫຼານລາວເຄີຍປູກຝັງມາວ່າອາຊີບຊາວກະສິກອນແມ່ນມີຄວາມລຳບາກແລະທຸກຍາກແຕ່ມາຮອດປັດບັນນີ້ ອາຊີບຊາວກະສິກອນໄດ້ມີໂອກາດທີ່ສາມາກສ້າງຊີວິດທີ່ດີແກ່ຄົນລາວໄດ້.

ດ້ວຍແນວທາງຂອງລັດຖະບານທີ່ວ່າຈະຖືເອົາກະສິກຳອິນຊີເປັນທ່າແຮງໃນການເພີ່ມມູນຄ່າໃຫ້ແກ່ ຜົນຜະລິດກະສິກຳໂດຍສອດຄ່ອງກັບຄວາມຕ້ອງການຂອງຕະຫຼາດພາຍໃນແລະຕ່າງປະເທດ, ພ້ອມນັ້ນການສົ່ງເສີມກະສິກຳຍັງຈະສາມາດຕີຕ້ານການນໍາເຂົ້າຊີ້ນປາອາຫານ, ພືດຜັກຕ່າງໆ ຈາກຕ່າງປະເທດຕື່ມອີກ, ສ້າງການຄໍ້າປະກັນສະບຽງອາຫານຂອງຕົນຕື່ມອີກ.

ມັນອາດເປັນໂອກາດທີ່ດີທີ່ສຸດໃນຮອບຫຼາຍສີບປີກໍວ່າໄດ້ ທີ່ ສປປລາວຄວນຫັນເອົາການຜະລິດກະສິກຳເປັນກຳລັງແຮງໜຶ່ງທີ່ສຳຄັນໃນຍູ້ດັນການເຕີບທາງດ້ານເສດຖະກິດ, ການສ້າງວຽກເຮັດງານທຳໃຫ້ແກ່ປະຊາຊົນຜູ້ທີ່ວ່າງງານໃນປັດຈຸບັນຍ້ອນການລະບາດຂອງພະຍາດໂຄວິດ 19.

ການເຮັດກະສິກຳແບບໃໝ່ ແມ່ນເນັ້ນໃສ່ຄຸນນະພາບ, ສ້າງວຽກເຮັດງານທຳທີ່ເໝາະສົມມີຢູ່ມີກິນໃຫ້ໄດ້ ໂດຍນຳໃຊ້ ເຕັກນິກວິຊາການໃໝ່ໆ ໄປຕາມແນວທາງທີ່ຍືນຍົງພໍພຽງ.

ໃນປັດຈຸບັນໂລກຂອງພວກເຮົາກຳລັງຕົກໃນພາວະອຶດຢາກຫຼາຍຂຶ້ນ, ເຂົ້າຢາກໝາກແພງ, ອາຫານຂາດຕະຫຼາດ. ເພາະສະນັ້ນ, ການສົ່ງອອກອາຫານ, ຜົນຜະລິດກະສິກຳຈຶ່ງເປັນທ່າແຮງທີ່ດີແກ່ສປປລາວໂດຍສະເພາະຜົນຜະລິດກະສິກຳທີ່ສະອາດແມ່ນມີຄວາມຕ້ອງການສູງຢູ່ບັນດາປະເທດຕ່າງໆດ້ວຍວ່າທ່າແຮງການຜະລິດຂອງພວກເຮົາໂດຍສະເພາະເນື້ອທີ່ການຜະລິດແລະແຮງງານ.

ເພາະສະນັ້ນ, ການພະຍາກອນແຮງງານຂອງກະຊວງແຮງງານແລະສະຫັວດດີການສັງຄົມນັ້ນແມ່ນອາດມີຄວາມຖືກຕ້ອງທີ່ວ່າວຽກງານກະສິກຳຈະມີບົດບາດທີ່ສຳຄັນຫຼາຍຂຶ້ນໃນການສ້າງວຽກເຮັດງານທຳແລະສ້າງລາຍຮັບທີ່ພໍພຽງໄດ້ໃນອະນາຄົດ.