ພະແນກໂຍທາທິການ-ຂົນສົ່ງ ແຂວງບໍ່ແກ້ວ ເຂັ້ມງວດປະຕິບັດມາດຕະການປ້ອງກັນ COVID-19
ທ່ານ ວົງເພັດ ສຸຂະວົງ ຮອງຫົວໜ້າພະແນກໂຍທາທິການ ແລະ ຂົນສົ່ງ ແຂວງບໍ່ແກ້ວ ໃຫ້ຮູ້ວ່າ: ແຂວງບໍ່ແກ້ວ ໄດ້ເປີດໃຫ້ບໍລິການການຂົນສົ່ງທາງບົກໃນທ້າຍເດືອນພຶດສະພາ 2020 ຢູ່ສະຖານີໂດຍສານເພັດອາລຸນ ແລະ ສະຖານີຂົນສົ່ງໂດຍສານແກ້ວຈຳປາ ເຊິ່ງການເປີດໃຫ້ບໍລິການນັ້ນ ແມ່ນຕິດພັນກັບການເອົາໃຈໃສ່ປະຕິບັດບັນດາມາດຕະການປ້ອງ COVID-19 ໂດຍມີການຕັ້ງຈຸດວັດແທກອຸນຫະພູມໃຫ້ກັບຜູ້ໂດຍສານ ທີ່ຈະຢູ່ເຂົ້າໄປນຳໃຊ້ບໍລິການສະຖານີ ຖ້າວັດແທກອຸນຫະພູມຜູ້ໃດກາຍ 37,5 ອົງສາ ແມ່ນຈະສົ່ງໃຫ້ສູນ ພ້ອມນັ້ນ ທາງສະຖານີຍັງມີເຈວລ້າງມື ເຫຼົ້າຂ້າເຊື້ອ ສຳລັບຜູ້ທີ່ຈະເຂົ້າໃຊ້ບໍລິການໃນສະຖານີຂົນສົ່ງໂດຍສານ ເອົາໃຈໃສ່ຈັດສັນບ່ອນນັ່ງ ຫຼື ເວັ້ນໄລຍະຫ່າງກັນ 1 ແມັດ ພ້ອມນັ້ນຍັງສະໜອງອ່າງລ້າງມືດ້ວຍສະບູ ຖັງໃສ່ຂີ້ເຫຍື້ອ ແລະ ມີຝາປິດ ຢູ່ຕາມສະຖານທີ່ຂອງສະຖານີ ຫ້ອງນ້ຳ ແລະ ຈັດໃຫ້ຖືກຫຼັກອະນາໄມ ທຸກຄົນທີ່ຢູ່ໃນສະຖານີ ຫຼື ຜູ້ໂດຍສານ ຕ້ອງໃສ່ຜ້າອັດປາກ-ດັງ.
ສຳລັບໂຊເຟີ້ ແລະ ແອັດລົດ ກໍຕ້ອງປະຕິບັດຕາມມາດຕະການຢ່າງເຂັ້ມງວດ ກ່ອນຈະຂັບລົດສົ່ງຜູ້ໂດຍສານ ຕ້ອງອະນາໄມລົດ ພ້ອມທັງສີດຢາຂ້າເຊື້ອໄວ້ກ່ອນ ຈຶ່ງມາຮັບຜູ້ໂດຍສານ ສ່ວນລົດເມແຕ່ລະຄັນທີ່ສາມາດຮັບຜູ້ໂດຍສານເຕັມສ່ວນໄດ້ 45 ບ່ອນນັ່ງ ແຕ່ອະນຸຍາດໃຫ້ໄດ້ພຽງ 23 ບ່ອນນັ່ງ ສຳລັບລົດຕູ້ໂດຍສານ ກໍມີການປະຕິບັດເຊັ່ນກັນ ເຊິ່ງສາມາດຮັບຜູ້ໂດຍສານໄດ້ພຽງແຕ່ 7-8 ຄົນ ພ້ອມທັງແນະນຳໃຫ້ຜູ້ໂດຍສານໃສ່ຜ້າອັດປາກ-ດັງຕະຫຼອດເວລາ ໃນລົດຕ້ອງມີນ້ຳຢາຂ້າເຊື້ອ ຫຼື ເຈວລ້າງມື ພ້ອມດ້ວຍເຈ້ຍອະນາໄມຖົງຢາງໃສ່ຂີ້ເຫຍື້ອ ກ່ອນຖິ້ມໃສ່ຖັງ ເວລາຮອດລົດຕ້ອງເປີດປະຕູ ຫຼື ແວ່ນຂ້າງເພື່ອລະບາຍອາກາດເສຍກ່ອນ.
