EU ຫ້າມນັກເດີນທາງຈາກອາເມລິກາ, ເບຣຊິນ ແລະ ຣັດເຊຍ ຫລັງກຽມເປີດຊາຍແດນຮັບຄົນນອກເອີຣົບ 1 ກໍລະກົດນີ້
ວັນທີ 26 ມິຖຸນາ ນັກການທູດຕົວແທນປະເທດສະມາຊິກສະຫະພາບເອີຣົບ ຫລື EU ທັງ 27 ປະເທດ ປະຊຸມຫາລືກັນກ່ຽວກັບຂໍ້ຕົກລົງໃນການເປີດຮັບນັກເດີນທາງຈາກປະເທດນອກເອີຣົບ ຫລື ນອກສະມາຊິກ EU ທີ່ມີຄວາມສ່ຽງຕໍ່ການແຜ່ໂຄວິດ-19 ຕໍ່າ.
ໂດຍມີການປະກາດຫ້າມນັກເດີນທາງຈາກອາເມລິກາ, ເບຣຊິນ ແລະ ຣັດເຊຍ ຊົ່ວຄາວ ເພາະສະຖານະການການແຜ່ລະບາດຂອງໂຄວິດ-19 ໃນປະເທດເຫລົ່ານີ້ຍັງຮຸນແຮງ ພົບຜູ້ຕິດເຊື້ອ ແລະ ຜູ້ເສຍຊີວິດເພີ່ມສູງຂຶ້ນຢ່າງຕໍ່ເນື່ອງຕະຫລອດຫລາຍອາທິດຜ່ານມາ.
EU ກຽມເປີດຊາຍແດນຕ້ອນຮັບນັກເດີນທາງຈາກປະເທດນອກເອີຣົບນັບແຕ່ວັນທີ 1 ກໍລະກົດນີ້ ຫລັງທະຍອຍເປີດຊາຍແດນລະຫວ່າງປະເທດສະມາຊິກ EU ນຳກັນນັບແຕ່ວັນທີ 15 ມິຖຸນາຜ່ານມາ. ຫລ້າສຸດ ອາເມລິກາ, ເບຣຊິນ ແລະ ຣັດເຊຍ ຖືເປັນປະເທດທີ່ພົບການລະບາດຂອງໂຄວິດ-19 ຮຸນແຮງທີ່ສຸດ 3 ອັນດັບທຳອິດ ໂດຍທັງ 3 ປະເທດມີຜູ້ຕິດເຊື້ອສະສົມລວມກັນປະມານ 4,4 ລ້ານຄົນ, ປິ່ນປົວດີແລ້ວປະມານ 2 ລ້ານຄົນ, ເສຍຊີວິດແລ້ວເກືອບ 1,9 ແສນຄົນ.
