IATA ຊີ້ ໂຄວິດເຮັດໃຫ້ສາຍການບິນທົ່ວໂລກ ຂາດທຶນ 8.400 ລ້ານໂດລາ
ສະມາຄົມຂົນສົ່ງທາງອາກາດລະຫວ່າງປະເທດ (IATA) ເຜີຍ ໂຄວິດ-19 ເຮັດໃຫ້ສາຍການບິນທົ່ວໂລກປີນີ້ ຂາດທຶນສູງ 8.400 ລ້ານໂດລາ.
ທ່ານ ໄບຣອັນ ເພຍ ຫົວໜ້ານັກເສດຖະສາດຂອງສະມາຄົມຂົນສົ່ງທາງອາກາດສາກົນ (IATA) ເປີດເຜີຍໃນການໃຫ້ສຳພາດຕໍ່ສຳນັກຂ່າວ CNBC ວ່າ: ສາຍການບິນຕ່າງໆອາດຈະຂາດທຶນ 8.400 ລ້ານໂດລາ ໃນປີ 2020 ຫລັງຈາກການເດີນທາງທາງອາກາດຫລຸດລົງຢ່າງໜັກເຖິງ 98% ໃນເດືອນເມສາຜ່ານມາ ເມື່ອທຽບໃສ່ປີກ່ອນ ເນື່ອງຈາກປະເທດຕ່າງໆປິດຊາຍແດນ ເພື່ອສະກັດກັ້ນການແຜ່ລະບາດຂອງໂຄວິດ-19.
ທັງນີ້ ປະເທດຕ່າງໆເຊັ່ນ: ຈີນ, ອາເມລິກາ ແລະ ອິນໂດເນເຊຍ ໄດ້ເລີ່ມເປີດການເດີນທາງທາງອາກາດພາຍໃນປະເທດແລ້ວ.
ທ່ານ ຄີ ເມສັນ ຫົວໜ້າສູນບໍລິຫານການຂົນສົ່ງທາງອາກາດ ຢູ່ມະຫາວິທະຍາໄລແຄຣນຟິລ ກ່າວວ່າ: ການຊ່ວຍເຫລືອຈາກລັດຖະບານເປັນປັດໄຈສຳຄັນໃນການຮັບປະກັນການຢູ່ລອດຂອງສາຍການບິນຕ່າງໆ.
ຂະນະດຽວກັນ ບາງສາຍການບິນປະສົບບັນຫາດ້ານການເງິນຢ່າງໜັກເຊັ່ນ: ສາຍການບິນຟລາຍບີໃນອັງກິດ, ເວີຈິນ ອົດສະຕຣາລີ ແລະ ທຣານ ສະເຕດ ແອລາຍ ໃນອາເມລິກາ.
