ປະຊາຊົນ ຣັດເຊຍ ໄປປ່ອນບັດ ປັບປຸງລັດຖະທຳມະນູນ
ສຳນັກຂ່າວສານຂອງຣັດເຊຍ TASS ໃຫ້ຮູ້ວ່າ ບັນດາຫີບບັດຖືກນຳສົ່ງໄປເຂດຫ່າງໄກສອກຫຼີກຂອງຣັດເຊຍແຕ່ວັນທີ 25 ມີຖຸນາ ເພື່ອໃຫ້ປະຊາຊົນໄດ້ໄປປ່ອນຕາມກົດໝາຍ ແລະ ລັດຖະທຳມະນູນ ໃຫ້ໄດ້ທົ່ວເຖິງ ເປັນຕົ້ນແມ່ນເຂດ Kamchatka ແລະ Chukotka.
ປະທານາທິບໍດີ ວະລາດີເມຍ ປູຕີນ, ໃນລະຫວ່າງເດືອນເມສາ ທີ່ຜ່ານມາໃຫ້ຮູ້ວ່າ ການທາບທາມຢັ່ງຫາງສຽງຂອງປະຊາຊົນໃນທົ່ວປະເທດຢ່າງເປັນທາງການແມ່ນຈະເກີດຂຶ້ນໃນວັນທີ 1 ກໍລະກົດ, ແຕ່ຫີບບັດຈະຖືກຈັດສົ່ງໄປແຕ່ວັນທີ 25 ມີຖຸນານີ້ ໃນຂອບເຂດທົ່ວປະເທດ.
ຮ່າງລັດຖະທຳມະນູນສະບັບໃໝ່ນີ້, ຖືກຮ່າງຂຶ້ນພາຍຫຼັງການສະເໜີຂອງປະທານາທິບໍດີ ປູຕີນ ໃນລະຫວ່າງເດືອນມັງກອນ 2020 ໂດຍໄດ້ຜ່ານລັດຖະສະພາ, ສານລັດຖະທຳມະນູນ ແລະ ສະພາທ້ອງຖິ່ນໃນເດືອນ ມີນາ ທີ່ຜ່ານມາ.
ໃນລັດຖະທຳມະນູນສະບັບໃໝ່ນີ້, ຈະມີການປ່ຽນແປງດ້ານອຳນາດໃນຣັດເຊຍ ເຊັ່ນເພີ່ມອຳນາດໃຫ້ແກ່ສະພາ ໃນການຈັດຕັ້ງລັດຖະບານ, ເພີ່ມອຳນາດໃຫ້ແກ່ປະທານາທິບໍດີ ພ້ອມດຽວກັນນີ້ ກໍຈະກຳນົດສະໄໝຄອງອຳນາດຂອງປະທານາທິບໍດີໃຫ້ເປັນ 0, ໝາຍຄວາມວ່າບໍ່ຈຳກັດວາລະຂອງປະທານາທິບໍດີ ຫຼື ເປີດທາງໃຫ້ທ່ານ ວະລາດີເມຍ ປູຕີນ ສາມາດຢູ່ໃນຕຳແໜ່ງໄດ້ອີກ 2 ວາລະ, ພາຍຫຼັງໝົດສະໄໝປັດຈຸບັນ ຊຶ່ງຈະສີ້ນສຸດລົງໃນປີ 2024.
ທ່ານ ປູຕີນ ນຳພາປະເທດຣັດເຊຍ ມາແຕ່ປີ 1999 ແລະ ໄດ້ຜ່ານ 4 ສະໄໝປະທານາທິບໍດີ ແລະ ໜຶ່ງສະໄໝນາຍົກຣັດຖະມົນຕີ. ທ່ານຖືກຕີລາຄາວ່າ ເປັນຜູ້ທີ່ມີບົດບາດແກນກາງໃນການຟື້ນຟູເສດຖະກິດ-ສັງຄົມ, ການເມືອງ, ການຕ່າງປະເທດ ແລະ ການທະຫານຂອງຣັດເຊຍ.
ຂ່າວ: ລູກເມືອງພວນ(ແຫຼ່ງຂ່າວ CAND)
