ລາວອອກພັນທະບັດ ເພື່ອແກ້ໄຂສະພາບເງິນເຟີ້

ໃນວັນທີ 25 ມິຖຸນານີ້, ທ່ານ ສອນໄຊ ສິດພະໄຊ ຜູ້ວ່າການທະນາຄານແຫ່ງ ສປປ ລາວ ໄດ້ລາຍງານຕໍ່ກອງປະຊຸມສະໄໝສາມັນເທື່ອທີ 9 ຂອງສະພາແຫ່ງຊາດ ຊຸດທີ 8 ນີ້ວ່າ: ເນື່ອງຈາກວ່າອັດຕາເງິນເຟີ້ຢູ່ປະເທດເຮົາໃນປັດຈຸບັນໄດ້ມີທ່າອ່ຽງເພີ່ມຂຶ້ນຢ່າງຕໍ່ເນື່ອງ ນັບແຕ່ທ້າຍປີ 2018 ເປັນຕົ້ນມາ ແລະ ຮ້າຍແຮງທີ່ສຸດແມ່ນໃນໄລຍະເດືອນຕຸລາ 2019 ຈາກ 5,34% ໄດ້ເພີ່ມຂຶ້ນສູງສຸດຮອດ 6,94% ໃນເດືອນມັງກອນ 2020, ສາເຫດຫລັກແມ່ນຍ້ອນການເພີ່ມຂຶ້ນສູງຂອງດັດຊະນີລາຄາໝວດອາຫານ ແລະ ເຄື່ອງດື່ມທີ່ບໍ່ແມ່ນເຫລົ້າ ສົ່ງຜົນໃຫ້ລາຄາຊີ້ນ, ເຂົ້າສານ, ປາ ກໍເພີ່ມສູງຂຶ້ນ ບວກກັບການລະບາດຂອງພະຍາດສັດ ເຮັດໃຫ້ການສະໜອງສະບຽງອາຫານບໍ່ພຽງພໍກັບຄວາມຕ້ອງການຂອງສັງຄົມທີ່ມີລະດັບສູງ ໂດຍສະເພາະໃນໄລຍະບຸນປີໃໝ່ຂອງຊາວຈີນ ແລະ ຫວຽດນາມໃນຜ່ານມາ. ນອກຈາກນີ້, ດັດຊະນີລາຄາໝວດສິນຄ້າ ແລະ ການບໍລິການອື່ນໆ ກໍໄດ້ປັບສູງຂຶ້ນຕາມການອ່ອນຄ່າຂອງເງິນກີບທຽບກັບເງິນໂດລາ ແລະ ເງິນບາດ ແລະ ການເພີ່ມຂຶ້ນສູງຂອງລາຄາຄຳໃນໄລຍະຕົ້ນປີນີ້ ແລະ ຕໍ່ມາໄດ້ມີທ່າອ່ຽງຫລຸດລົງເລັກນ້ອຍ, ລາຄານໍ້າມັນຢູ່ສາກົນ ແລະ ພາຍໃນທີ່ໄດ້ຫລຸດລົງ ສົມທົບກັບລາຄາສະບຽງອາຫານຈຳນວນໜຶ່ງທີ່ໄດ້ປັບຫລຸດລົງ ແລະ  ສະພາບການລະບາດຂອງພະຍາດໂຄວິດ-19 ໄດ້ສົ່ງຜົນໃຫ້ດັດຊະນີລາຄາໝວດຮ້ານອາຫານ, ໂຮງແຮມ, ລາຄາຫມວດເຫລົ້າ ແລະ ຢາສູບກໍໄດ້ປັບຫລຸດລົງເຊັ່ນກັນ.

ຜູ້ວ່າການທະນາຄານແຫ່ງ ສປປ ລາວ ໃຫ້ຮູ້ວ່າ: ຈາກອັດຕາແລກປ່ຽນ ແລະ ອັດຕາເງິນເຟີ້ດັ່ງກ່າວນັ້ນ, ເພື່ອຫລຸດຜ່ອນຜົນກະທົບທີ່ຈະເປັນສິ່ງທ້າທາຍຕໍ່ກັບການຮັກສາສະຖຽນລະພາບເງິນຕາແຫ່ງຊາດ ໃນເງື່ອນໄຂຂອງປະເທດຄືດັ່ງໃນປັດຈຸບັນ, ທະນາຄານແຫ່ງ ສປປ ລາວ ໄດ້ຈັດຕັ້ງປະຕິບັດນະໂຍບາຍເງິນຕາ ແລະ ອັດຕາແລກປ່ຽນໃຫ້ໄດ້ຕາມກຳນົດໄວ້ ເວົ້າສະເພາະກໍຮັບປະກັນໃຫ້ປະລິມານເງິນຂະຫຍາຍຕົວຢູ່ໃນຈັງຫວະທີ່ເສດຖະກິດສາມາດຮັບໄດ້ ບໍ່ສ້າງແຮງກົດດັນໃຫ້ເງິນເຟີ້ເພີ່ມຂຶ້ນອີກ, ທັງສາມາດປະກອບສ່ວນຊຸກຍູ້ການຂະຫຍາຍຕົວຂອງເສດຖະກິດ ແລະ ສອດຄ່ອງກັບກົນໄກຕະຫລາດ. ທະນາຄານແຫ່ງ ສປປ ລາວ ຈະປະສານສົມທົບກັບ ກະຊວງການເງິນ ອອກພັນທະບັດຄັງເງິນ ໂດຍຜ່ານການປະມູນຢູ່ ທະນາຄານ ແຫ່ງ ສປປ ລາວ ເພື່ອດຸ່ນດ່ຽງງົບປະມານ, ກົນໄກດັ່ງກ່າວນີ້ຈະສາມາດຫລຸດຜ່ອນຜົນກະທົບ-ຄວາມກົດດັນຕໍ່ກັບຄວາມສ່ຽງອັດຕາແລກປ່ຽນ ແລະ ອັດຕາເງິນເຟີ້ທີ່ອາດຈະເພີ່ມສູງຂຶ້ນນັ້ນໄດ້.