ບາງສັນຍານບອກວ່າເຖິງເວລາປ່ຽນຊົງຜົມໃໝ່ແລ້ວ

ບາງເທື່ອເສັ້ນຜົມຂອງເຮົາກໍສົ່ງສັນຍານບາງຢ່າງໃຫ້ເຮົາຮູ້ວ່າເຖິງເວລາຟື້ນຟູເບິ່ງແຍງ ຫລື ປ່ຽນຊົງຜົມໃໝ່ເລີຍກໍມີດັ່ງນີ້ :

1. ຜົມກ້ຽວພັນກັນແໜ້ນ : ບໍ່ວ່າຈະໃຊ້ໂຕຊ່ວຍໃດໆ, ນ້ຳມັນ ຫລື ຄຣີມນວດທີ່ເຮັດໃຫ້ຜົມນຸ້ມມື່ນ, ແຕ່ສຸດທ້າຍເສັ້ນຜົມກໍຍັງກັບມາກ້ຽວພັນກັນຄືເກົ່າ ຍິ່ງຕາກລົມແຮງໆພັດໃສ່ ຍິ່ງກ້ຽວພັນກັນຈົນສາງ ຫລື ແກະບໍ່ອອກ ນີ້ສະແດງວ່າສະພາບເສັ້ນຜົມແຫ້ງ ແລະ ອ່ອນແອຫລາຍແລ້ວ ປ່ອຍໄວ້ກໍມີແຕ່ຈະສ້າງຄວາມລຳຄານໃຫ້ແກ່ທ່ານເທົ່ານັ້ນ ຈຶ່ງຄວນຫັນມາຕັດຜົມ ຫລື ປ່ຽນຊົງໃໝ່ເລີຍດີກ່ວາ.
2. ຍາກຕໍ່ການຈັດແຕ່ງຊົງ : ບໍ່ວ່າຈະແບ່ງ, ມັດ ຫລື ລະ, ໃຊ້ຜະລິດຕະພັນຈັດແຕ່ງຊົງຜົມຊົງໃດ ເສັ້ນຜົມຂອງທ່ານກໍຍັງບໍ່ງາມ, ບໍ່ເປັນຕາເບິ່ງ ທັງຍັງໃຊ້ເວລາດົນໃນການເຮັດໃຫ້ເປັນຮູບເປັນຊົງ.
3. ເສັ້ນຜົມຊີ້ຟູຈົນຈັດແຕ່ງຊົງບໍ່ຢູ່ : ເກີດຈາກເສັ້ນຜົມທີ່ແຫ້ງຫລາຍ ເມື່ອຜົມແຫ້ງກໍພະຍາຍາມໃສ່ນ້ຳມັນ ຫລື ຄຣີມບຳລຸງຊະນິດບໍ່ຕ້ອງລ້າງອອກໃຫ້ຊຸ່ມຊື່ນ ຈຶ່ງກາຍເປັນບັນຫາເສັ້ນຜົມມັນຈັບກັນເປັນກ້ອນ ຍິ່ງໃຊ້ຄວາມຮ້ອນມາຊ່ວຍກໍຍິ່ງເຮັດໃຫ້ແຫ້ງຫລາຍຂຶ້ນກ່ວາເກົ່າ.
4. ເບິ່ງບໍ່ອອກວ່າເປັນຊົງໃດ : ຈາກການຕັດຜົມເທື່ອຫລ້າສຸດທີ່ອາດຈະດົນມາແລ້ວ ຕອນນັ້ນຜົມຂອງທ່ານຈະເບິ່ງເປັນຮູບເປັນຊົງ, ແຕ່ຕອນນີ້ເບິ່ງບໍ່ອອກແລ້ວວ່າມັນເປັນຊົງຫຍັງ ສະນັ້ນຈຶ່ງຄວນຕັດຊົງໃໝ່ດີກ່ວາ.
5. ຕ້ອງການຄວາມປ່ຽນແປງ : ວິທີດີສຸດທີ່ຈະອອກຈາກຄວາມລຶ້ງເຄີຍຂອງຕົນເອງກໍຄືປ່ຽນຊົງຜົມ, ບາງຄົນພຽງແຕ່ຕັດຊົງຜົມໜ້າມ້າກໍເບິ່ງຄືປ່ຽນແລ້ວ, ບາງຄົນຕັດຜົມສັ້ນແລ້ວເບິ່ງສົດໃສຂຶ້ນ, ເບິ່ງອ່ອນກ່ວາອາຍຸຂຶ້ນ, ເບິ່ງຄືມີສະເໜ່ຂຶ້ນກໍມີ, ໃຜຈະຮູ້ວ່າການປ່ຽນແປງດີໆອາດກຳລັງມາຫາທ່ານກໍເປັນໄດ້. ສະນັ້ນ, ເຖິງເວລາໄປຮ້ານຕັດຜົມແລ້ວປ່ຽນຊົງຜົມໃໝ່ແລ້ວ.