ໄທຄາດວ່າຈະນຳສະເໜີ 3 ວິທີການເຂົ້າເຖິງດ້ານຕ່າງໆພາຍຫຼັງໂຄວິດ-19ຕໍ່ກອງປະຊຸມລະດັບສູງ ອາຊຽນ

ແຫຼ່ງຂາວຈາກ TTXVN ໃຫ້ຮູ້ວ່າ ນາຍົກລັດຖະມົນຕີ, ລັດຖະມົນຕີກະຊວງປ້ອງກັນປະເທດຂອງໄທ ປາຢຸດ ຈັນໂອຊາ ຈະເຂົ້າຮ່ວມກອງປະຊຸມລະດັບສູງອາຊຽນ ຄັ້ງທີ 36 ແລະ ກອງປະຊຸມລະດັບສູງອື່ນໆທີ່ກ່ຽວຂ້ອງຊຶ່ງຈະໄຂຂຶ້ນໃນວັນທີ 26 ມີຖຸນານີ້ ດ້ວຍຮູບແບບທາງໄກ.

ລັດຖະບານໄທ ໃຫ້ຮູ້ວ່າ ກອງປະຊຸມລະດັບສູງອາຊຽນຄັ້ງທີ່ 36 ເປັນກອງປະຊຸມລະດັບສູງທຳອິດໃນປະຫວັດສາດທີ່ຈັດຂຶ້ນດ້ວຍຮູບແບບທາງໄກ ໂດຍການເປັນປະທານຂອງນາຍົກລັດຖະມົນຕີຂອງຫວຽດນາມ ຫງວຽນຊວັນຟຸກ  ໃນນາມປະທານອາຊຽນ 2020 ພາຍໃຕ້ຫົວຂໍ້ “ເພື່ອຄວາມສຳພັນ ແລະ ການປັບຕົວ”.

ກອງປະຊຸມຄັ້ງນີ້ມີຈຸດປະສົງ ເພື່ອຊຸກຍູ້ການຮ່ວມມືລະຫວ່າງບັນດາປະເທດສະມາຊິກອາຊຽນໃນການຮັບມືກັບການລະບາດຂອງພະຍາດໂຄວິດ-19 ແລະ ຈະປຶກສາຫາລືກ່ຽວກັບການສ້າງຮ່າງແຜນການຟື້ນຟູພາຍຫຼັງໂຄວິດ-19.

ໃນກອງປະຊຸມຄັ້ງນີ້, ນາຍົກລັດຖະມົນຕີໄທ ຈະນຳສະເໜີ 3 ວິທີການເຂົ້າເຖິງ ໂຄວິດ-19 ເພື່ອແນໃສ່ຍົກບົດບາດຂອງອາຊຽນ, ຊຶ່ງໃນນັ້ນລວມມີ: ຊຸກຍູ້ການສຳພັນທີ່ແທ້ຈິງຂອງອາຊຽນ ໂດຍຜ່ານການຍູ້ແຮງບັນດາໜ້າວຽກທີ່ວາງໄວ້ໃນແຜນການລວມ ກ່ຽວກັບຄວາມສຳພັນອາຊຽນປີ 2025(MPAC 2025), ເພີ່ມທະວີກຳລັງແຮງຂອງອາຊຽນໂດຍຈາກພາຍໃນເພື່ອເຊື່ອມໂຍງເສດຖະກິດ ແລະ ການລົງທຶນໂຄງລ່າງເຕັກນິກດີຈິຕອນ ແລະ ຊຸກຍູ້ການຄຸ້ມກັນພະຍາດຂອງອາຊຽນ ກ່ຽວກັບການກໍ່ສ້າງແຜນການຟື້ນຟູພາຍຫຼັງໂຄວິດ-19 ເພື່ອເຮັດໃຫ້ສຸຂະພາບຂອງຊຸມຊົນມີຄວາມໝັ້ນຄົງ, ອາຫານ ແລະ ຄວາມໝັ້ນຄົງຂອງມວນມະນຸດຈະໄດ້ຮັບການປັບປຸງ.

ນາຍົກລັດຖະມົນຕີ ປາຢຸດ ຈັນໂອຊາ ຍັງຈະນຳສະເໜີຕໍ່ກອງປະຊຸມອາຊຽນກ່ຽວກັບສັດຈະທຳເສດຖະກິດພໍພຽງ(SEP) ເພື່ອຄຸ້ມກັນພະຍາດ, ໄປພ້ອມກັບການຊຸກຍູ້ໂຄງການວາລະກອງປະຊຸມໃນປີ 2030 ເພື່ອການພັດທະນາທີ່ຍືນຍົງ.

ນອກຈາກການເຂົ້າຮ່ວມກອງປະຊຸມລະດັລສູງອາຊຽນແລ້ວ, ນາຍົກລັດຖະມົນຕີໄທ ຍັງຈະເຂົ້າຮ່ວມກອງປະຊຸມພິເສດຂອງບັນດາຜູ້ນຳອາຊຽນກ່ຽວກັບການຍົກສູງບົດບາດຂອງແມ່ຍິງໃນຍຸກດີຈິຕອນ ແລະ ການສົນທະນາລະຫວ່າງຜູ້ນຳອາຊຽນ ແລະ ສະພາປະຊາຄົມອາຊຽນ(AIPA), ຊາວໜຸ່ມອາຊຽນ ແລະ ສະພາ ທີ່ປຶກສາທຸລະກິດອາຊຽນ(ASEAN-BAC) ຕື່ມອີກ.

ຂ່າວ: ລູກເມືອງພວນ