IMF ຫລຸດຄາດຄະເນ GDP ໂລກ ເປັນຕິດລົບ 4,9% ເຕືອນໂຄວິດ-19 ດຶງເສດຖະກິດຫລຸດຖອຍ-ຟື້ນຕົວ ຊ້າກວ່າການຄາດຄະເນ
ກອງທຶນການເງິນສາກົນ (IMF) ຫລຸດຄາດຄະເນເສດຖະກິດໂລກວ່າຈະຫລຸດລົງ 4,9% ໃນປີ 2020 ຈາກການຄາດຄະເນໃນເດືອນເມສາວ່າຈະຕິດລົບ 3% ເນື່ອງຈາກມີທ່າອ່ຽງທີ່ວິກິດການລະບາດຂອງໂຄວິດ-19 ຈະສົ່ງຜົນໃຫ້ເສດຖະກິດຫລຸດຖອຍຮຸນແຮງ ແລະ ຟື້ນຕົວຊ້າກວ່າການຄາດຄະເນໄວ້ໃນຕອນທຳອິດ.
IMF ຄາດຄະເນວ່າ: ການຫລຸດລົງຂອງເສດຖະກິດທົ່ວໂລກໃນປີນີ້ຈະມີຄວາມຮຸນແຮງຫລາຍທີ່ສຸດນັບແຕ່ຍຸກເສດຖະກິດຕົກຕໍ່າຄັ້ງໃຫຍ່ໃນທົດສະວັດ 1930 ຫລື Great Depression.
ສ່ວນໃນປີ 2021 ຄາດວ່າ GDP ທົ່ວໂລກຈະຂະຫຍາຍຕົວພຽງ 5,4% ຈາກທີ່ເຄີຍຕັ້ງເປົ້າໄວ້ 5,8% ສົ່ງຜົນໃຫ້ພາບລວມເສດຖະກິດໂລກຍັງອ່ອນແອກວ່າການຄາດຄະເນໄວ້ ແລະ ຍັງຕໍ່າກວ່າການຂະຫຍາຍຕົວໄລຍະກ່ອນເກີດໂຄວິດ-19 ປະມານ 6,5 ຈຸດ. ເຖິງຢ່າງໃດກໍຕາມ, ອັດຕາການຟື້ນຕົວຍັງຂຶ້ນຢູ່ກັບມາດຕະການກະຕຸ້ນເສດຖະກິດ ເຊິ່ງປັດຈຸບັນລັດຖະບານຫລາຍປະເທດທົ່ວໂລກໄດ້ປະກາດແຜນອັດສີດ ແລະ ຮັກສາເສດຖະກິດດ້ວຍເຄື່ອງມືທາງການເງິນແລ້ວເກືອບ 11 ຕື້ໂດລາສະຫະລັດ.
IMF ລະບຸໃນລາຍງານສະບັບຫລ້າສຸດວ່າ: ພະຍາດລະບາດຄັ້ງນີ້ເຮັດໃຫ້ກິດຈະກຳທາງເສດຖະກິດທົ່ວໂລກຫລຸດລົງໃນແບບທີ່ບໍ່ເຄີຍມີມາກ່ອນ ໂດຍຕະຫລາດແຮງງານທົ່ວໂລກໄດ້ຮັບຜົນກະທົບໃນລະດັບເອີ້ນວ່າ: “ຫາຍະນະ”. ຂະນະທີ່ບໍລິສັດຕ່າງໆໄດ້ຫລຸດການລົງທຶນ ເພື່ອປ້ອງກັນຄວາມສ່ຽງ ເຊັ່ນດຽວກັບການໃຊ້ຈ່າຍເພື່ອການບໍລິໂພກກໍຫລຸດລົງຄືກັນ.
“ໂຄວິດ-19 ສ້າງຜົນກະທົບທາງລົບຕໍ່ກິດຈະກຳທາງເສດຖະກິດໃນໄລຍະເຄິ່ງປີທຳອິດຂອງປີ 2020 ຫລາຍກວ່າທີ່ຄາດຄະເນໄວ້, ສ່ວນການຟື້ນຕົວກໍມີທ່າອ່ຽງຊ້າກວ່າການຄາດຄະເນໄວ້ກ່ອນໜ້ານີ້” IMF ລະບຸ.
ນອກຈາກນີ້ IMF ຍັງເຕືອນກ່ຽວກັບຄວາມບໍ່ແນ່ນອນໃນການຄາດຄະເນທ່າອ່ຽງເສດຖະກິດ ເນື່ອງຈາກຕົວເລກສ່ວນຫລາຍມາຈາກການສົມມຸດ.
ສ່ວນໜີ້ສາທາລະນະທົ່ວໂລກຕໍ່ GDP ຄາດວ່າຈະສູງເຖິງ 101,5% ແລະ 103,2% ໃນປີ 2020 ແລະ 2021 ຕາມລຳດັບ ເນື່ອງຈາກຜົນຂອງມາດຕະການກະຕຸ້ນເສດຖະກິດຂອງລັດຖະບານທົ່ວໂລກ.
ສຳລັບອາເມລິກາ ເຊິ່ງມີຂະໜາດເສດຖະກິດໃຫຍ່ທີ່ສຸດໃນໂລກນັ້ນ IMF ຄາດວ່າ GDP ປີ 2020 ຈະຕິດລົບເຖິງ 8,0% ຈາກທີ່ເຄີຍຄາດຄະເນວ່າຈະຫລຸດລົງ 5,9%, ສ່ວນເຂດໃຊ້ເງິນເອີໂຣຕິດລົບເພີ່ມເປັນ 10,2% ຈາກ -7,5%.
ຕົວເລກຄາດຄະເນເສດຖະກິດຂອງ IMF ຖືວ່າດີກວ່າຂອງທະນາຄານໂລກ ແລະ ອົງການເພື່ອການຮ່ວມມື ແລະ ການພັດທະນາທາງເສດຖະກິດ (OECD) ເຊິ່ງກ່ອນໜ້ານີ້ຄາດວ່າ GDP ທົ່ວໂລກຈະຫລຸດລົງ 5,2% ແລະ 6% ໃນປີ 2020 ກ່ອນຈະຟື້ນຕົວດີຂຶ້ນໃນປີ 2021.
