ສະເໜີໃຫ້ລາງວັນຕໍ່ທີມງານແພດໝໍ ທີ່ປິ່ນປົວຜູ້ຕິດເຊື້ອກໍລະນີທີ 91
ຜູ້ຕິດເຊື້ອກໍລະນີທີ 91 ເປັນນັກບິນຂອງ ອັງກິດ, ເຂົ້າຮັບການປິ່ນປົວໃນວັນທີ 18 ມີນາ ຜ່ານມາ, ມາເຖິງຂະນະນີ້ເປັນ 97 ວັນທີ່ນອນປິ່ນປົວຢູ່ໂຮງໝໍ ເຂດຮ້ອນ ແລະ ໂຮງໝໍ ເຈິະໄຣ້ ໃນນະຄອນໂຮ່ຈິມິນ.
ຢູ່ທີ່ກອງປະຊຸມບົ່ງມະຕິພະຍາດແຫ່ງຊາດຄັ້ງທີ 5 ຂອງອະນຸກຳມະການປິ່ນປົວຂອງທ່ານໝໍ ສາດສະດາຈານ, ປອ ເລືອງຫງອກເຄ, ຫົວໜ້າກົມຄຸ້ມຄອງກວດພະຍາດ, ຮອງຫົວໜ້າຄະນະອະນຸກຳມະການປີ່ນປົວ, ຄະນະຊີ້ນຳລະດັບຊາດຕ້ານໂຄວິດ-19 ໄດ້ສະເໜີໃຫ້ລາງວັນຕໍ່ຄະນະທີມແພດໝໍປິ່ນປົວຜູ້ຕິດເຊື້ອໂຄວິດ-19 ກໍລະນີ 91, ຊຶ່ງຄາດວ່າຈະເປັນຈຳນວນເງິນ 500 ລ້ານດົ່ງ.
ທ່ານສາດສະດານານ, ປອ ຫງວຽນຢາບິ່ງ ໃຫ້ຄຳເຫັນວ່າ: “ຜ່ານການປິ່ນປົວເປັນເວລາ 96 ວັນ, ມີຫຼາຍເທື່ອທີ່ພວກເຮົາໄດ້ໝົດຄວາມຫວັງຕໍ່ກັບການປິ່ນປົວຜູ້ຕິດເຊື້ອຄົນນີ້ ແຕ່ຍ້ອນມີສະຕິປັນຍາລວມໝູ່ຂອງທີມແພດໝໍປິ່ນປົວ ໂດຍສະເພາະແມ່ນຄວາມພະຍາຍາມຂອງຖັນແຖວພະນັກງານປິ່ນປົວໂດນກົງຕໍ່ຜູ້ຕິດເຊື້ອຄົນດັ່ງກ່າວໃນໂຮງໝໍເຂດຮ້ອນນະຄອນໂຮ່ຈິມິນ ແລະ ໂຮງໝໍ ເຈິະໄຣ້. ມາເຖິງປັດຈຸບັນບໍ່ສະເພາະແຕ່ສາມາດກູ້ເອົາຊີວິດຂອງເຂົາໄວ້ໄດ້ ແຕ່ຍັງສະແດງໃຫ້ເຫັນນໍ້າໃຈມະນຸດສະທຳໃນການປິ່ນປົວດູແລສຸຂະພາບໃຫ້ຜູ້ປ່ວຍເປັນຄົນຕ່າງປະເທດ”.
ພາຍຫຼັງປິ່ນປົວໄດ້ 94 ວັນ, ມູນຄ່າການປິ່ນປົວຜູ້ຕິດເຊື້ອກໍລະນີ 91 ນັ້ນ ແມ່ນບໍລິສັດປະກັນສັງຄົມເປັນຜູ້ຮັບຜິດຊອບ ໃນວົງເງິນ 3,5 ຕື້ດົງ(ແຕ່ວັນທີ 18 ມີນາ-22 ພຶດສະພາ) ແມ່ນປິ່ນປົວຢູ່ໂຮງໝໍ ເຂດຮ້ອນນະຄອນໂຮ່ຈິມິນ, ແຕ່ວັນທີ 22 ພຶດສະພາມາເຖິງປັດຈຸບັນແມ່ນປິ່ນປົວຢູ່ໂຮງໝໍ ເຈິະໄຣ້ ໄລຍະນີ້ບໍ່ທັນປະເມີນຄ່າໃຊ້ຈ່າຍໄດ້.
ວັນທີ 23 ມີຖຸນານີ້, ທ່ານ ໝໍ ປອ ຫງວຽນວັນວິງເຈົາ , ຜູ້ອຳນວຍການໂຮງໝໍເຂດຮ້ອນນະຄອນໂຮ່ຈິມິນ ໃຫ້ຮູ້ວ່າ: ທາງໂຮງໝໍໄດ້ຮັບໃບບີນສຳລະຄ່າໃຊ້ຈ່າຍຈາກບໍລິສັດປະກັນສັງຄົມຂອງຜູ້ຕິດເຊື້ອກໍລະນີ 91 ແລ້ວ.
ຂ່າວ: ລູກເມືອງພວນ
