‘ອິນເດຍ’ ຈຳໜ່າຍຢາ Remdesivir ຊະນິດສັກ ໃຊ້ປິ່ນປົວຜູ້ຕິດເຊື້ອໂຄວິດຮຸນແຮງ
“ອິນເດຍ“ ຈຳໜ່າຍຢາ Remdesivir ຊະນິດສັກ ໃຊ້ປິ່ນປົວຜູ້ຕິດເຊື້ອໂຄວິດຮຸນແຮງ ເຊັ່ນດຽວກັບຢູ່ປາກິດສະຖານ ຫລັງ Gilead Sciences ບໍລິສັດການຢາສັນຊາດອາເມລິກາ ໃນຖານະຜູ້ພັດທະນາຢາເຣມເດສຊິເວຍ ຂະຫຍາຍການອະນຸຍາດໃຫ້ໃຊ້ສິດໂດຍບໍ່ຈຳກັດ.
ບໍລິສັດ Cipla ການຢາສັນຊາດອິນເດຍ ປະກາດວາງຈຳໜ່າຍຢາເຣມເດສຊິເວຍ (Remdesivir) ແບບສັກ ຂະໜາດ 100 ມິນລິກຣາມ ເພື່ອປິ່ນປົວຜູ້ຕິດເຊື້ອໂຄວິດ-19 ທີ່ມີອາການຮຸນແຮງ.
ສຳນັກຂ່າວຊິນຮົວລາຍງານວ່າ: Gilead Sciences ບໍລິສັດຊີວະການຢາສັນຊາດອາເມລິກາ ແລະ ຜູ້ພັດທະນາຢາເຣມເດສຊິເວຍ ໄດ້ຂະຫຍາຍການອະນຸຍາດໃຫ້ໃຊ້ສິດໂດຍບໍ່ຈຳກັດຈຳນວນຜູ້ຮັບອະນຸຍາດ ເພື່ອເປີດທາງໃຫ້ບໍລິສັດອິນເດຍ ແລະ ປາກິດສະຖານຈຳນວນໜຶ່ງສາມາດຜະລິດ ແລະ ຈັດຈຳໜ່າຍຢາຊະນິດນີ້.
ທັງນີ້ Cipla ເປີດເຜີຍວ່າ: ບໍລິສັດຈະຈຳໜ່າຍຢາເຣມເດສຊິເວຍ ຜ່ານຮ້ານຄ້າຂອງຕົນເອງ ແລະ ຮ້ານຄ້າຂອງຫຸ້ນສ່ວນ ແລະ ຈະຈັດສັນຢາຜ່ານຊ່ອງທາງຂອງລັດຖະບານ ແລະ ຕະຫລາດເສລີ ເພື່ອຮັບປະກັນວ່າ ການກະຈາຍຢາຊະນິດໃໝ່ນີ້ຈະເປັນໄປແບບເທົ່າທຽມ.
ເຖິງຢ່າງໃດກໍຕາມ, ໃນອາທິດຜ່ານມາ Glenmark Pharmaceuticals ບໍລິສັດການຢາຂອງອິນເດຍ ໄດ້ຈັດຈຳໜ່າຍຢາຟາວິພິຣາເວຍ (Favipiravir) ໃນປະເທດດ້ວຍລາຄາ 1,35 ໂດລາສະຫະລັດຕໍ່ເມັດ ເພື່ອປິ່ນປົວຜູ້ຕິດເຊື້ອໂຄວິດ-19 ທີ່ມີອາການບໍ່ຮຸນແຮງຈົນເຖິງອາການປານກາງ.
