ຈີນສົ່ງດາວທຽມ ‘GPS’ ຜະລິດເອງໜ່ວຍສຸດທ້າຍ
ຈີນປະສົບຜົນສຳເລັດໃນການສົ່ງດາວທຽມໜ່ວຍສຸດທ້າຍຂອງລະບົບດາວທຽມນຳທາງ “BeiDou” ໃນຕອນເຊົ້າວັນທີ 23 ມິຖຸນານີ້.
ສູນປ່ອຍດາວທຽມຊີຊາງ ໃນມົນທົນເສສວນ ທາງຕາເວັນຕົກສຽງໃຕ້ຂອງຈີນ ລາຍງານວ່າ: ດາວທຽມໜ່ວຍດັ່ງກ່າວຖືເປັນໜ່ວຍທີ 55 ຂອງຕະກູນ “ເປ່ຍໂຕ” ເຊິ່ງໝາຍເຖິງ “ກຸ່ມດາວກະບວຍໃຫຍ່” (Big Dipper) ຖືກສົ່ງເຂົ້າສູ່ວົງໂຄຈອນທີ່ກຳນົດດ້ວຍຈະຫລວດຂົນສົ່ງລອງມາດ-3ບີ (Long March-3B) ໄດ້ສຳເລັດເມື່ອເວລາ 09:43 ໂມງ ຂອງວັນທີ 23 ມິຖຸນາ ຕາມເວລາທ້ອງຖິ່ນ.
ການສົ່ງດາວທຽມໜ່ວຍຫລ້າສຸດນີ້ຖືເປັນນິມິດໝາຍບົ່ງບອກວ່າ: ລະບົບດາວທຽມນຳທາງເປຍໂຕ ເຊິ່ງເປັນລະບົບນຳທາງທົ່ວໂລກທີ່ຈີນພັດທະນາຂຶ້ນເອງ ມີກຸ່ມດາວທຽມເຂົ້າປະຈຳການຕາມແຜນງານທີ່ວາງໄວ້ຄົບຖ້ວນສົມບູນແລ້ວ.
ທັງນີ້ ການຍິງຈະຫລວດຂົນສົ່ງໃນຄັ້ງນີ້ຖືເປັນພາລະກິດທີ 336 ຂອງຈະຫລວດຂົນສົ່ງຕະກູນລອງມາດ.
ຜູ້ຊ່ຽວຊານເບິ່ງວ່າ: ຄວາມພະຍາຍາມດັ່ງກ່າວຈະຊ່ວຍໃຫ້ຈີນມີເຄືອຂ່າຍນຳທາງຄວບຄຸມທົ່ວໂລກໂດຍສົມບູນ ແລະ ບໍ່ຕ້ອງອາໄສເຕັກໂນໂລຊີ GPS ຂອງອາເມລິກາອີກ.
