ແອເອເຊຍໄດ້ຮັບລາງວັນລະດັບໂລກຫລາຍທີ່ສຸດ

ເມື່ອບໍ່ດົນມານີ້, ແອເອເຊຍ ຖືກລົງຄະແນນສຽງໃຫ້ເປັນສາຍການບິນທີ່ມີລາຄາຖືກຊັ້ນນຳຂອງອາຊີເປັນປີທີ 5 ໃນລາງວັນ The world Travel Awards, ພ້ອມນີ້ ຍັງໄດ້ຮັບລາງ ວັນພະນັກງານບໍລິການດີເລີດຢູ່ເທິງເຮືອບິນເປັນປີທີ 2, ຊຶ່ງສາມາດເອົາຊະນະຄູ່ແຂ່ງຈາກ 9 ສາຍການບິນໃນທົ່ວໂລກ, ລາງວັນດັ່ງກ່າວນີ້ເປັນໜຶ່ງໃນລາງວັນທີ່ມີຊື່ສຽງຢ່າງກ້ວງຂວາງ ແລະ ທຸກສາຍການບິນໄຝ່ຫາ, ໂດຍພິທີມອບລາງວັນດັ່ງກ່າວແມ່ນໄດ້ຈັດຂຶ້ນຢູ່ຊຽງໄຮ້, ປະເທດຈີນ.

ຜູ້ຮ່ວມກໍ່ຕັ້ງ ແລະ ຫົວໜ້າຜູ້ບໍລິຫານກຸ່ມສາຍການບິນແອເອເຊຍ ກ່າວວ່າ: ລາງວັນນີ້ ແມ່ນໄຊຊະນະຂອງພວກເຮົາ, ເນື່ອງຈາກວ່າມັນສະແດງອອກເຖິງຄວາມພະຍາຍາມຂອງພະນັກງານ ແລະ ຄະນະຜູ້ບໍລິຫານທຸກຄົນຂອງສາຍການບິນ ທີ່ຍາມໃດກໍຕັ້ງໜ້າເຮັດການບໍລິການໃຫ້ອອກມາດີ ແລະ ດີທີ່ສຸດຢູ່ສະເໝີ, ຊຶ່ງໃນປີນີ້ ສາຍການບິນແອເອເຊຍ ກໍສຸມໃສ່ການປັບປຸງລະບົບການແຈ້ງປີ້ ເພື່ອເຮັດໃຫ້ລູກຄ້າມີຄວາມສະດວກສະບາຍຂຶ້ນໄປເລື້ອຍໆ.

ປະທານ ແອເອເຊຍ ເຂດອາຊີເໜືອ ກ່າວວ່າ: ພວກເຮົາຮູ້ສຶກເປັນກຽດທີ່ສຸດທີ່ໄດ້ຮັບລາງວັນຍ້ອງຍໍຊົມເຊີຍອີກຄັ້ງ, ນັບວ່າເປັນເວລາ 16 ປີແລ້ວທີ່ພວກເຮົາໄດ້ຮັບຟັງການຕັກເຕືອນຕ່າງໆຈາກລູກຄ້າ, ພ້ອມທັງມີການປັບປຸງຕົນເອງຢ່າງຕໍ່ເນື່ອງ, ເພື່ອໃຫ້ສາຍການບິນຂອງພວກເຮົາມີຄຸນນະພາບສູງ.

AirAsia ເປັນຜູ້ໃຫ້ບໍລິການສາຍການບິນລາຄາຖືກ ແລະ ຊັ້ນນຳໃນອາຊີໃນການຂົນສົ່ງຜູ້ໂດຍສານ, ມີເຄືອຂ່າຍກວ້າງຂວາງ ແລະ ມີຈຸດໝາຍປາຍທາງຫຼາຍກວ່າ 120 ແຫ່ງ, ນັບແຕ່ເລີ່ມຕົ້ນດຳເນີນງານມາແຕ່ປີ 2001, AirAsia ໄດ້ບໍລິການຂົນສົ່ງຜູ້ໂດຍສານຫຼາຍກວ່າ 330 ລ້ານເທື່ອຄົນ ແລະ ຈຳນວນເຮືອບິນກໍ່ໄດ້ເຕີບໃຫຍ່ຈາກສອງລຳຂຶ້ນເປັນ 200 ກວ່າລຳ. ສາຍການບິນມີຄວາມພາກພູມໃຈທີ່ໄດ້ເປັນສາຍການບິນຂອງອາຊຽນ ດ້ວຍການດຳເນີນທຸລະກິດທີ່ໄດ້ສ້າງຕັ້ງປະຈຳຢູ່ໃນມາເລເຊຍ, ອິນໂດເນເຊຍ, ໄທ, ຟີລິບປິນ, ອິນເດຍ ແລະ ຍີປຸ່ນ, ໃຫ້ການບໍລິການດ້ວຍການຂະຫຍາຍເຄືອຂ່າຍທົ່ວອາຊີ, ອົດສະຕາລີ ແລະ ນີວຊີແລນ, ຕາເວັນອອກກາງ ແລະ ສະຫະລັດ. AirAsia ໄດ້ຮັບຊື່ວ່າເປັນສາຍການບິນລາຄາຖືກດີທີ່ສຸດຂອງໂລກດ້ວຍການໄດ້ຮັບລາງວັນສາຍການບິນໂລກ Skytrax ປະຈຳປີແປດຄັ້ງຕິດຕໍ່ກັນນັບແຕ່ປີ 2009 ຮອດ 2016 ແລະ AirAsia ຍັງໄດ້ຮັບລາງວັນສາຍການບິນລາຄາຖືກຊັ້ນນຳຂອງໂລກເປັນປີທີສີ່ຕິດຕໍ່ກັນໃນການປະກາດລາງວັນທ່ອງທ່ຽວໂລກປີ 2016, ເຊິ່ງທາງສາຍການບິນຍັງຊະນະຜູ້ໃຫ້ບໍລິການຮອບດ້ານ ທີ່ເປັນຜູ້ໃຫ້ບໍລິການລາຄາຖືກຕະຫຼອດການຜູ້ທຳອິດທີ່ຊະນະການບໍລິການໃນຖ້ຽວບິນຊັ້ນນຳຂອງໂລກ.