ກະຊວງ ປທສ ກຽມຂຶ້ນທະບຽນເລກໝາຍ ໂທລະສັບ ແລະ ຊິມເນັດ ຄືນໃໝ່

ກະຊວງໄປສະນີ ໂທລະຄົມມະນາຄົມ ແລະ ການສື່ສານ(ປທສ) ໄດ້ອອກແຈ້ງການ ໃນວັນທີ 17 ມິຖຸນາ ຜ່ານມານີ້ ຊຶ່ງຈະໄດ້ຂຶ້ນທະບຽນເລກໝາຍໂທລະສັບ ແລະ ຊິມເນັດ ຄືນໃໝ່ໃນທົ່ວປະເທດ ເພື່ອເປັນການຄຸ້ມຄອງການນຳໃຊ້ເລກໝາຍໂທລະສັບ ໃນໄລຍະໃໝ່ໃຫ້ມີຄວາມເປັນລະບຽບຮຽບຮ້ອຍ ໂດຍຈະເລີ່ມຈັດຕັ້ງປະຕິບັດເປັນ 3 ໄລຍະຄື: ໄລຍະທີ 1 ແຕ່ວັນທີ 1/07/-30/11/2020 ໃຫ້ລົງ ທະບຽນເລກໝາຍໂທລະສັບ ແລະ ອິນເຕີເນັດ ທີ່ໄດ້ນຳໃຊ້ຄືນໃໝ່ທັງໝົດ ແລະ ບໍ່ອະນຸຍາດໃຫ້ເລກໝາຍໃໝ່ ທີ່ບໍ່ທັນຂຶ້ນທະບຽນສາມາດນຳໃຊ້ໄດ້ຢ່າງເດັດຂາດ.

ສ່ວນໄລຍະທີ 2 ແຕ່ວັນທີ 1-31/12/2020 ນໍ້າເບີທີ່ຍັງບໍ່ທັນຂຶ້ນເລກໝາຍໂທລະສັບ ແລະ ຊິມເນັດ ແມ່ນຍັງສາມາດຮັບໂທລະສັບໄດ້ ແຕ່ບໍ່ສາມາດໂທອອກໄດ້(ຍົກເວັ້ນເບີສຸກເສີນ) ແລະ ບໍ່ສາມາດຫລິ້ນເນັດໄດ້ ແຕ່ຍັງຈະຮັກສາມູນຄ່າທີ່ຍັງເຫລືອໄວ້ໃນລະບົບ ແລະ ໄລຍະທີ 3 ຫລັງຈາກວັນມີ 31/12/2020 ເປັນຕົ້ນໄປ ນໍ້າເບີທີ່ຍັງບໍ່ທັນຂຶ້ນທະບຽນເລກໝາຍໂທລະສັບ ແລະ ຊິມເນັດ ຈະຖືກລົບອອກຈາກລະບົບຢ່າງຖາວອນ, ແຕ່ບໍລິສັດຜູ້ໃຫ້ບໍລິການ ສາມາດເປີດຄືນໃຫ້ຜູ້ນຳໃຊ້ເລກໝາຍໂທລະສັບ ແລະ ຊິມເນັດ ຄືນໃໝ່ ຖ້າຫາກເບີເລກໝາຍໂທລະສັບ ແລະ ຊິມເນັດ ດັ່ງກ່າວໄດ້ຮັບການຂຶ້ນທະບຽນ ສຳເລັດ.

ດັ່ງນັ້ນ, ຈຶ່ງມອບໃຫ້ບັນດາບໍລິສັດ ໂທລະຄົມມະນາຄົມ ແລະ ອິນເຕີເນັດ ສົມທົບກັບພະແນກ ປທສ ແຂວງ, ນະຄອນຫລວງ ເປັນເຈົ້າການຈັດຕັ້ງປະຕິບັດການຂຶ້ນທະບຽນໝາຍເລກໂທລະສັບ ແລະ ຊິມເນັດໃນຄັ້ງນີ້ ພ້ອມທັງສົ່ງເສີມປຸກລະດົມ, ຊຸກຍູ້, ເຜີຍແຜ່ ແລະ ແຈ້ງໃຫ້ຜູ້ນຳໃຊ້ເລກໝາຍໂທລະສັບ ແລະ ຊິມເນັດ ມາຂຶ້ນທະບຽນໃຫ້ຖືກຕ້ອງຕາມລະບຽບການຂອງ ກະຊວງ ປທສ ໃນເວລາທີ່ກຳນົດໄວ້.