ເຈົ້າໜ້າທີ່ພາສີຂົວມິດຕະພາບລາວ-ໄທ 1 ທໍາລາຍສິນຄ້ານໍາເຂົ້າບໍ່ຖືກຕ້ອງຫລາຍກ່ວາ 1.000 ກິໂລກຣາມ

ໃນວັນທີ 22 ມິຖຸນານີ້, ເຈົ້າໜ້າທີ່ດ່ານພາສີຂົວ ມິດຕະພາບລາວ-ໄທ 1 ທີ່ນະຄອນຫລວງວຽງຈັນ ໄດ້ທຳລາຍພຶດຜັກ, ໝາກເລັ່ນ ແລະ ສິນຄ້າຕ້ອງຫ້າມຕ່າງໆ ທີ່ນຳເຂົ້າບໍ່ຖືກຕ້ອງ ລວມນ້ຳໜັກຫລາຍກ່ວາ 1 ພັນ ກິໂລກຣາມ. ຢູ່ ສະຖານນີກັກກັນພຶດ ບ້ານ ດົງໂພສີ ເມືອງ ຫາດຊາຍຟອງ ພາຍຫລັງເຈົ້າໜ້າທີ່ພາສີມີມາດຕະການເຂັ້ມງວດໃນການກວດສອບສິນຄ້ານຳ ເຂົ້າຈາກປະເທດເພື່ອນບ້ານ, ໂດຍຜ່ານດ່ານດັ່ງກ່າວ, ແຕ່ກໍຍັງພົບເຫັນແມ່ຄ້າ-ພໍ່ຄ້າຈຳນວນໜຶ່ງສວຍໂອກາດລັກລອບນຳເຂົ້າສິນຄ້າຕ້ອງຫ້າມດັ່ງກ່າວ.

ພ້ອມດຽວກັນເຈົ້າຫນ້າທີ່ກໍໄດ້ດຳເນີນການສຶກສາອົບຮົມ ແລະ ຕັກເຕືອນຜູ້ກະທຳຜິດລັກລອບ ນຳເຂົ້າສິນຄ້າດັ່ງກ່າວ ແລະ ປັບໃໝຕາມລະບຽບກົດໝາຍ.