ທົ່ວປະເທດ ມີຜູ້ຕິດເຊື້ອໄຂ້ຍຸງລາຍ 1.998 ກໍລະນີແລ້ວ
ກະຊວງສາທາລະນະສຸກ ໃຫ້ຮູ້ວ່າ:ປັດຈຸບັນ ເຊື້ອພະຍາດໄຂ້ຍຸງລາຍ ພວມແພ່ລະບາດເປັນວົງກວ້າງໃນທົ່ວປະເທດ ມີຜູ້ຕິດເຊື້ອໄຂ້ຍຸງລາຍ ນັບແຕ່ວັນທີ 28 ທັນວາ 2019 ຫາ ວັນທີ 20 ມິຖຸນາ2020 ມີຜູ້ຕິດເຊື້ອໄຂ້ຍຸງລາຍແລ້ວ 1.998ກໍລະນີ, ເສຍຊີວິດ 5ຄົນ.
ໃນນັ້ນ,ນະຄອນຫລວງວຽງຈັນພົບຜູ້ຕິດເຊື້ອໄຂ້ຍຸງລາຍຫລາຍກວ່າໝູ່434ກໍລະນີ, ເສຍຊີວິດແລ້ວ2ຄົນ, ຮອງລົງມາແມ່ນແຂວງວຽງຈັນ298ກໍລະນີ, ອັດຕະປື 226 ກໍລະນີ, ບໍລິຄຳໄຊ 223 ກໍລະນີ ເສຍຊີວິດແລ້ວ 1 ຄົນ, ຄຳມ່ວນ 167 ກໍລະນີ ເສຍຊີວິດແລ້ວ 1 ຄົນ, ສະຫວັນນະເຂດ 145 ກໍລະນີ, ສາລະວັນ 114 ກໍລະນີ, ໄຊຍະບູລີ 113 ກໍລະນີ ເສຍຊີວິດແລ້ວ 1 ຄົນ, ເຊກອງ 50 ກໍລະນີ, ຫລວງນໍ້າທາ 50 ກໍລະນີ, ໄຊສົມບູນ 36 ກໍລະນີ, ອຸດົມໄຊ 46 ກໍລະນີ, ຫລວງພະບາງ 44 ກໍລະນີ, ບໍ່ແກ້ວ 30 ກໍລະນີ, ຈຳປາສັກ 16 ກໍລະນີ, ຜົ້ງສາລີ 5 ກໍລະນີ,ຫົວພັນ 1 ກໍລະນີ. ສໍາລັບແຂວງຊຽງຂວາງແມ່ນຍັງບໍ່ພົບກໍລະນີຜູ້ຕິດເຊື້ອໄຂ້ຍຸງລາຍ.
ເພື່ອເປັນການປ້ອງກັນພະຍາດໄຂ້ຍຸງລາຍບໍ່ໃຫ້ມີການແຜ່ລາມໄປເປັນວົງກວ້າງແລະບໍ່ໃຫ້ມີກໍລະນີໃໝ່ນັ້ນກະຊວງສາທາລະນະສຸກຮຽກຮ້ອງໃຫ້ທຸກພາກສ່ວນແລະປະຊາຊົນທຸກຄົນຈົ່ງພ້ອມກັນສຸມໃສ່ເພີ່ມທະວີການສະກັດກັ້ນ, ຄວບຄຸມແລະປ້ອງກັນການແພ່ລະບາດຂອງເຊື້ອພະຍາດໄຂ້ຍຸງລາຍໂດຍສະເພາະໃຫ້ເປັນເຈົ້າການໃນປ້ອງກັນບໍ່ໃຫ້ຍຸງລາຍກັດໄປຄຽງຄູ່ກັບການປະຕິບັດຫລັກການ5ປເປັນປະຈຳທັງມີການທຳລາຍແຫລ່ງເພາະພັນໜອນນ້ຳຍຸງລາຍ “ບໍ່ມີໜອນນ້ຳກໍຈະບໍ່ມີຍຸງລາຍ”.
