ແຮງງານລາວຢູ່ໄທ ຖືກນາຍຈ້າງຍິງຕາຍ ເມື່ອຂໍເງິນກັບບ້ານ

ເຈົ້າຂອງສວນຖຸລຽນໄດ້ນາບຂູ່ ແລະ ຍິງແຮງງານລາວເສຍຊີວິດ ເພາະນາຍຈ້າງບໍ່ຢາກໃຫ້ຄົນງານລາວຄົນດັ່ງກ່າວກັບບ້ານ ໃນເມື່ອຄົນງານຄົນນັ້ນຂໍເງິນຄ່າແຮງງານເພື່ອກັບບ້ານ ກໍເລີຍເກີດການຖົກຖຽງກັນຂຶ້ນ. ນາຍຈ້າງຈຶ່ງຈົກປືນສັ້ນອອກມາຍິງເຂົາເສຍຊີວິດກັບທີ່.

ໂທລະພາບຊ່ອງ 3 ຂອງໄທອອກຂ່າວວ່າ: ແຮງງານຍິງຄົນລາວຄົນໜຶ່ງອາຍຸ 30 ປີໄດ້ໄປລາຍງານຕໍ່ເຈົ້າໜ້າທີ່ຕຳຫຼວດໃນນະຄອນສີທຳມະຣາດ ໃນວັນທີ 11 ມີຖຸນານີ້ວ່າ: ຕົນເອງບໍ່ສາມາດທີ່ຈະຕິດຕໍ່ຫາເພື່ອນ 2 ຄົນໄດ້ຊື່ ທ້າວເທືອນ ແລະ ທ້າວອູ້ມ ອາຍຸ 30 ປີ ສັນຊາດລາວ, ປັດຈຸບັນກຳລັງເປັນຄົນງານຮັບຈ້າງຢູ່ສວນຖຸລຽນຂອງ ນາຍ ທິຣະວັດ ວິຣະພັນ ທີ່ ນະຄອນສີທຳມະຣາດ.

ເຈົ້າໜ້າທີ່ກ່ຽວຂ້ອງ ໄດ້ເຂົ້າໄປຄົ້ນບ່ອນທີ່ພວກກ່ຽວເຮັດວຽກ ໄດ້ພົບເຫັນເລືອດ ພ້ອມກັບກະສອບລູກປືນສັ້ນ 0.45mm. ເຈົ້າໜ້ທີ່ໄດ້ຄຸມຕົວເຈົ້າຂອງສວນທັນທີ ເພື່ອໄວ້ສອບສວນ ເພາະເຂົ້າຂ່າຍສົງໄສ.

ພາຍຫຼັງສອບສວນ ນາຍ ທິຣະວັດ ຮັບສາລະພາບວ່າ ໄດ້ຍິງ ທ້າວ ເທືອນແທ້ ໃນຂະນະທີ່ທ້າວອູ້ມ ໄດ້ອະນຸຍາດໃຫ້ກັບບ້ານແຕ່ວັນທີ 10 ມີຖຸນາແລ້ວ.

ອີງຕາມໃຫ້ການຂອງເຈົ້າຂອງສວນ ໃຫ້ຮູ້ວ່າ ຄົນງານລາວ 2 ຄົນນັ້ນ ໄດ້ຂໍເງິນຄ່າແຮງງານຈຳນວນ 8.000 ບາດ ເພື່ອກັບປະເທດ ແຕ່ເຈົ້າຂອງສວນບໍ່ເຫັນດີ ເພາະເຂົາບໍ່ຢາກໃຫ້ຄົນງານລາວກັບບ້ານ ເພາະບໍ່ມີຜູ້ເຮັດວຽກ. ພາຍຫຼັງຖົກຖຽງກັນ ເຈົ້າຂອງສວນໄດ້ຂົ່ມຂູ່ທ້າວເທືອນ ແຕ່ທ້າວເທືອນບໍ່ຢ້ານ ເຂົາຈຶ່ງຈົກເອົາປືນສັ້ນຍິງທ້າວເທືອນຕາຍຄາທີ່. ເມື່ອເຫັນສະຖານະການເປັນຄືແນວນັ້ນທ້າວອູ້ມໄດ້ປົບໜີກັບບ້ານທັນທີ.

ປັດຈຸບັນຄະດີດັ່ງກ່າວກຳລັງດຳເນີນຕາມຂັ້ນຕອນຂອງກົດໝາຍຢູ່.

ຂ່າ: ລູກເມືອງພວນ(ແຫຼ່ງຂ່າວ tapchilaoviet)