ອັງກິດຄົ້ນພົບ ຢາສະເຕຍຣອຍ ເດກຊາເມທາໂຊນ ໃຊ້ປິ່ນປົວຜູ້ຕິດໂຄວິດ-19 ໄດ້ ຫລຸດອັດຕາເສຍຊີວິດກວ່າ 35%
ທີມນັກວິທະຍາສາດອັງກິດ ເປີດເຜີຍການຄົ້ນພົບວ່າຢາເດກຊາເມທາໂຊນ (Dexamethasone) ເຊິ່ງເປັນຢາສະເຕຍຣອຍລາຄາຖືກປະມານ 5 ປອນ ທີ່ໃຊ້ກັນທົ່ວໄປ ແລະ ຊອກຊື້ໄດ້ຕາມຮ້ານຂາຍຢາ ສາມາດນຳມາໃຊ້ປິ່ນປົວຜູ້ຕິດເຊື້ອໂຄວິດ-19 ໄດ້ຢ່າງມີປະສິດທິພາບ.
ສາສະດາຈານ ປີເຕີ ຮໍບີ ນັກລະບາດວິທະຍາ ແລະ ຜູ້ຊ່ຽວຊານພະຍາດຕິດຕໍ່ເກີດໃໝ່ ຈາກມະຫາວິທະຍາໄລອອກຟອດ ຜູ້ນຳທີມວິໄຈທີ່ທົດລອງຢາສະເຕຍຣອຍດັ່ງກ່າວ ປະກາດການຄົ້ນພົບນີ້ໃນການຖະແຫລງປະຈຳວັນຢູ່ທຳນຽບນາຍົກລັດຖະມົນຕີ ໂດຍລະບຸວ່າ: ການຄົ້ນພົບຄັ້ງນີ້ຖືເປັນຄວາມກ້າວໜ້າຄັ້ງສໍາຄັນໃນການປິ່ນປົວຜູ້ຕິດເຊື້ອໂຄວິດ-19.
ທ່ານພົບວ່າຢາເດກຊາເມທາໂຊນສາມາດຊ່ວຍຮັກສາຊີວິດຜູ້ຕິດເຊື້ອໂຄວິດ-19 ໄດ້ຢ່າງມີປະສິດທິພາບ ໂດຍຫລຸດອັດຕາການເສຍຊີວິດສຳລັບຜູ້ຕິດເຊື້ອທີ່ໃຊ້ເຄື່ອງຊ່ວຍຫາຍໃຈໄດ້ປະມານ 35% ແລະ 20% ສໍາລັບຜູ້ຕິດເຊື້ອທີ່ຈຳເປັນຕ້ອງໃຊ້ອົກຊີ.
ໃນໄລຍະ 3 ເດືອນຜ່ານມາ, ທີມວິໄຈໄດ້ສຸ່ມເລືອກຜູ້ຕິດເຊື້ອໂຄວິດ-19 ຫລາຍກວ່າ 11.500 ຄົນ ຈາກໂຮງໝໍ 176 ແຫ່ງທົ່ວອັງກິດເຂົ້າຮ່ວມໂຄງການທົດລອງຢາຊະນິດນີ້ ເຊິ່ງຖືເປັນການທົດລອງທາງຄລີນິກໃຫຍ່ທີ່ສຸດໃນໂລກ ໂດຍສາເຫດທີ່ເລືອກທົດລອງຢາຊະນິດນີ້ ເນື່ອງຈາກຄຸນສົມບັດຊ່ວຍຫລຸດການອັກເສບໃນຮ່າງກາຍ ເຊິ່ງລວມທັງພາຍໃນປອດ. ອີກທັງຍັງມີລາຄາຖືກ, ຊອກຊື້ໄດ້ງ່າຍ ແລະ ມີຄວາມປອດໄພຖ້າໃຊ້ໃນປະລິມານໜ້ອຍ.
ຈາກການທົດສອບປຽບທຽບດ້ວຍການສຸ່ມເລືອກຜູ້ຕິດເຊື້ອ 2.104 ຄົນ ໃຫ້ໃຊ້ຢາເດກຊາເມທາໂຊນວັນລະ 6 ມິນລິກຣາມຕໍ່ເນື່ອງ 10 ວັນ ທຽບໃສ່ກຸ່ມຜູ້ຕິດເຊື້ອທີ່ສຸ່ມເລືອກ 4.321 ຄົນ ທີ່ປິ່ນປົວແບບປົກກະຕິ.
ພົບວ່າອັດຕາເສຍຊີວິດໃນໄລຍະເວລາ 28 ວັນ ສຳລັບກຸ່ມຜູ້ຕິດເຊື້ອທີ່ບໍ່ໄດ້ຮັບຢາເດກຊາເມທາໂຊນ ແລະ ຕ້ອງໃຊ້ເຄື່ອງຊ່ວຍຫາຍໃຈ ມີອັດຕາເສຍຊີວິດສູງສຸດເຖິງ 41%, ສ່ວນຜູ້ຕິດເຊື້ອທີ່ບໍ່ໄດ້ຮັບຢາ ແລະ ຕ້ອງໃຫ້ອົກຊີມີອັດຕາເສຍຊີວິດ 25%. ຂະນະທີ່ຜູ້ຕິດເຊື້ອທີ່ບໍ່ໄດ້ຮັບຢາແຕ່ປອດຍັງເຮັດວຽກໄດ້ດີ ມີອັດຕາເສຍຊີວິດ 13%.
ຜົນການຄົ້ນພົບດັ່ງກ່າວຍັງເຮັດໃຫ້ລັດຖະບານອັງກິດປະກາດຮັບຮອງໃຫ້ສາມາດໃຊ້ຢາຊະນິດນີ້ໃນການປິ່ນປົວຜູ້ຕິດເຊື້ອໂຄວິດ-19 ໄດ້ທັນທີ ແລະ ໃຫ້ລວມຢາຊະນິດນີ້ຢູ່ໃນມາດຕະຖານການປິ່ນປົວສຳລັບຜູ້ຕິດເຊື້ອໂຄວິດ-19 ເຊິ່ງທ່ານ ແມດ ແຮນຄ໊ອກ ລັດຖະມົນຕີສາທາລະນະສຸກອັງກິດ ກ່າວຍ້ອງຍໍຄວາມກ້າວໜ້ານີ້ວ່າ: ເປັນຜົນງານອັນເຫລືອເຊື່ອຂອງນັກວິທະຍາສາດອັງກິດ.
ຂະນະທີ່ ນາຍົກລັດຖະມົນຕີ ບໍຣິສ ຈອນສັນ ຍົກຍ້ອງການຄົ້ນພົບຄັ້ງນີ້ວ່າ: ເປັນຄວາມກ້າວໜ້າໃຫຍ່ທີ່ສຸດໃນການປິ່ນປົວຜູ້ຕິດເຊື້ອໂຄວິດ-19.
