ໂຮງແຮມ Hilton ປົດພະນັກງານ 2.100 ຕຳແຫນ່ງ ຫລື 22% ຂອງພະນັກງານທົ່ວໂລກ
Hilton ເຊິ່ງເປັນໂຮງແຮມອີກລະດັບໜຶ່ງທີ່ໃຫຍ່ຂອງໂລກ ກາຍເປັນກຸ່ມໂຮງແຮມລ່າສຸດຂອງອຸດສາຫະກຳນີ້ ທີ່ອອກມາປະກາດປົດພະນັກງານ 2.100 ຕຳແໜ່ງ ຫລື ປະມານ 22% ຂອງພະນັກງານປະຈຳບໍລິສັດ ເຊິ່ງມີພະນັກງານທັງໝົດ 9.600 ຄົນທົ່ວໂລກ.
ຄວາມເຄື່ອນໄຫວຂອງ Hilton ເກີດຂຶ້ນຫລັງຈາກອຸດສາຫະກຳໂຮງແຮມໄດ້ຮັບຜົນກະທົບຢ່າງຮຸນແຮງຈາກການລະບາດໃຫຍ່ທີ່ສຸດຂອງໂຣກໂຄວິດ-19 ໂດຍນັກທ່ອງທ່ຽວຖືກບັງຄັບໃຫ້ຍົກເລິກການຈອງ ແລະ ພັກຢູ່ເຮືອນ ເນື່ອງຈາກລັດຖະບານບັງຄັບໃຫ້ລ໊ອກດາວ.
“ສິ່ງທີ່ເກີດຂຶ້ນເປັນສະຖານະການ Hilton ບໍ່ເຄີຍເຫັນມາກ່ອນໃນປະຫວັດສາດ 101 ປີຂອງບໍລິສັດອຸດສາຫະກຳຂອງເຮົາຕ້ອງພົບກັບວິກິດທົ່ວໂລກ ເຊິ່ງເຮັດໃຫ້ການເດີນທາງທ່ອງທ່ຽວຕ້ອງຢຸດລົງ” ຄຣິສໂຕເຟີ ນາເຊີຕາ ຊີອີໂອຂອງ Hilton ໃຫ້ຮູ້ວ່າ: ຄວາມຈິງແລ້ວ Hilton ເປັນໂຮງແຮມໃນລະດັບໜຶ່ງທີ່ໃຫຍ່ທີ່ສຸດກໍຍັງປົດພະນັກງານເພື່ອຮັກສາທຸລະກິດເຊັ່ນດຽວກັນ ກ່ອນໜ້ານີ້ Marriott ເຊິ່ງເປັນໂຮງແຮງທີ່ໃຫຍ່ທີ່ສຸດຂອງໂລກກໍປົດພະນັກງານບາງສ່ວນໃນເດືອນມີມາທີ່ຜ່ານມາ Marriott ລະບຸວ່າການລະບາດຄັ້ງໃຫຍ່ມີຜົນກະທົບທາງການເງິນທີ່ຮຸນແຮງຕໍ່ທຸລະກິດມາກ່ອນເຫດການ 9/11 ແລະ ວິກິດການທາງການເງິນໃນປີ 2008.
ສ່ວນ Hyatt ໄດ້ປະກາດປົດພະນັກງານ 1.300 ຄົນໃນເດືອນທີ່ຜ່ານມາ ເນື່ອງຈາກຄວາມຕ້ອງການເດີນທາງທີ່ຫລຸດລົງ ແລະ ເບິ່ງວ່າຈະມີການຟື້ນຟູແບບຊ້າໆ.
ຈາກຂໍ້ມູນຂອງ American Hotel and Lodging Association ລະບຸວ່າໂຮງແຮມຢູ່ສະຫະລັດອາເມລິກາໄດ້ສູນເສຍລາຍໄດ້ກວ່າ 3 ໝື່ນລ້ານສະຫະລັດ ແລະ ເກືອບ 6 ໃນ 10 ຫ້ອງຂອງໂຮງແຮມຍັງວາງເປົ່າ ສ່ວນຜູ້ປະກອບການໂຮງແຮມສ່ວນໃຫຍ່ສົ່ງສັນຍານວ່າ ຍອດຈອງທີ່ຫລຸດລົງຈະຢູ່ໃນຈຸດຕ່ຳສຸດໃນໄຕຣມາດທີ 2 ຫລັງຈາກນັ້ນຈະມີການຟື້ນໂຕຢ່າງຊ້າໆ ໂດຍສະເພາະຕະຫລາດສຳຄັນຢູ່ຈີນ ເຊິ່ງເສດຖີກິດທີ່ໃຫຍ່ເປັນອັນດັບ 2 ຂອງໂລກຄ່ອຍໆ ເປີດທຸລະກິດອີກ.
