ຈະເອົາຫວຍ ຫລື ຄົນ

ເພື່ອນຜູ້ອ່ານທີ່ຮັກແພງ, ຫວ່າງອາທິດແລ້ວນີ້ ກອງບັນນາທິການໜັງສືພິມລາວພັດທະນາພວກເຮົາໄດ້ຮັບຄຳສ່ອງແສງ ຜ່ານໂທລະສັບມາວ່າ: ໃນແຕ່ລະປີບໍ່ຮູ້ວ່າລັດເຮົາໄດ້ຮັບເງິນຈາກເບື້ອງເລກເບື້ອງຫວຍນີ້ຫລາຍປານໃດ ແລະ ຕາມສັງເກດເບິ່ງ ແລ້ວຄືເພິ່ນຈະໄດ້ຫລາຍ ເພາະມື້ໃດກໍມີການອອກເລກອອກຫວຍໂດຍຕະຫລອດ ແລະ ປັດຈຸບັນ ລະບາດແຮງທີ່ສຸດແມ່ນຫວຍ ຂູດ ເຊິ່ງກໍແມ່ນເຄືອຂ່າຍໜຶ່ງຂອງຫວຍພັດທະນາເຊັ່ນກັນ, ໄປໃສມາໃສ, ຂຶ້ນເໜືອລົງໃຕ້ໄປທາງໃດກໍມີແຕ່ເຫັນການຂາຍຫວຍ ຂູດ ນັບທັງຕູ້ສີຕູ້ສາ ເຊິ່ງເມື່ອກ່ອນເຄີຍໂອ້ລົມກັນແຕ່ເລື່ອງໄຮ່ເລື່ອງນາ, ເລື່ອງຮົ້ວເລື່ອງສວນ ແຕ່ປັດຈຸບັນເພິ່ນກໍມາໂສເລກັນ ເລື່ອງຫວຍຂູດ, ບາງຄົນຜູ້ເປັນພະນັກງານລັດຖະກອນພໍເງິນເດືອນອອກມາປັບກໍໄປມອບໃຫ້ແມ່ຫວຍທັງນັ້ນ ເພື່ອຫວັງຜົນກຳ ໄລທີ່ບໍ່ມີຮູບປະທຳພໍປານໃດ. ກ່ອນຈະໄດ້ເງິນແສນເງິນລ້ານ, ຝ່າຍຜູ້ຫລິ້ນຫວຍກໍຕ້ອງໝົດໄປຫລາຍໝື່ນ, ກໍ່ໃຫ້ເກີດຄວາມບໍ່ສະ ຫງົບໃນຄອບຄົວ ຜົວຕີເມຍ, ແມ່ຕີລູກ ໃນທີ່ສຸດກໍສົ່ງຜົນໃຫ້ຄອບຄົວແຕກຫັກ ຜົນເສຍພາຍຫລັງຍ້ອນຕິດເລກຕິດເບີດັ່ງກ່າວ ແລະ ບໍ່ຮູ້ວ່າເບື້ອງລັດເຮົາຈະເອົາ ຫວຍ ຫລື ຈະເອົາຄົນ, ເອົາຊັບພະຍາກອນມະນຸດຜູ້ມີຄວາມຮູ້ຄວາມສາມາດມາພັດທະນາປະ ເທດຊາດບ້ານເມືອງໃຫ້ຈະເລີນຮຸ່ງເຮືອງຈະດີກວ່າບໍ ?.

ຜູ້ສ່ອງແສງມາເລົ່າດ້ວຍຄວາມເຈັບປວດວ່າ: ​ເລື່ອງເລກເລື່ອງຫວຍ ໂດຍສະເພາະຫວຍຂູດທີ່ກຳລັງລະບາດແຮງດັ່ງປັດຈຸບັນ ນີ້ ເຊິ່ງມັນບໍ່ພຽງມີແຕ່ຢູ່ວົງການຂອງຜູ້ໃຫຍ່ເທົ່ານັ້ນ ມັນຍັງເຂົ້າເລິກໄປຮອດນັກຮຽນ, ນັກສຶກສາ, ຊາວໜຸ່ມເຍົາວະຊົນອີກ ດ້ວຍ, ບາງຄົນອາຍຸບໍ່ຮອດ 10 ປີກໍຮູ້ໄປຊື້ຫວຍຂູດມາສ່ຽງໂຊກ ແລະ ເຈັບປວດໄປກວ່ານັ້ນແມ່ນ ຍັງມີພຶດຕິດຳລັກເອົາເງິນພໍ່ເງິນ ແມ່ໄປຕິດພັນກັບການສ່ຽງດວງດັ່ງກ່າວ ແລະ ກໍ່ໃຫ້ເກີດສິ່ງຫຍໍ້ທໍ້ ອື່ນໆຕາມມາ.

ເອົາລະເວົ້າມາກໍມີຫລາຍອັນ ແລະ ຜ່ານບົດສ່ອງແສງຂອງເພື່ອນຜູ້ອ່ານນີ້ກໍຫວັງວ່າເບື້ອງລັດເບື້ອງມະຫາພາກເຮົາຄວນຈະ ເບິ່ງ ແລະ ພິຈາລະນາຄືນເລື່ອງເລກເລື່ອງຫວຍວ່າມັນເໝາະສົມແລ້ວບໍ່ ? ເພື່ອພວກ ເຮົາຈະມີທາງອອກທີ່ດີໃຫ້ແກ່ສັງຄົມ.