ນະຄອນຫລວງວຽງຈັນ ແລະ KOICA ຫາລືຍຸດທະສາດ ການກຳຈັດຂີ້ເຫຍື້ອ

ທ້າຍອາທິດຜ່ານມາ, ນະຄອນຫລວງວຽງຈັນ ແລະ ອົງການ KOICA ໄດ້ຮ່ວມປຶກສາຫາລືກ່ຽວກັບຍຸດທະສາດການບໍລິຫານຈັດການຂີ້ເຫຍື້ອແບບຍືນຍົງຢູ່ນະຄອນຫລວງວຽງຈັນ ໂດຍການເປັນປະທານຂອງທ່ານ ພູຂົງ ບັນນະວົງ ຮອງເຈົ້າຄອງນະຄອນຫລວງ,  ມີຜູ້ຕາງໜ້າອົງການກອຍກາປະຈຳລາວ ແລະ ຕາງໜ້າສະຖາບັນເຕີບໂຕສີຂຽວສາກົນ (GGGI) ປະຈຳລາວ.        ທ່ານຮອງເຈົ້າຄອງ ໃຫ້ຮູ້ວ່າ: ປັດຈຸບັນສະພາບຂີ້ເຫຍື່ອຈາກຄົວເຮືອນ, ຕະຫລາດ, ສໍານັກງານອົງການ ແລະ ໂຮງຈັກໂຮງງານຕ່າງໆ ຢູ່ນະຄອນຫລວງວຽງຈັນແມ່ນນັບມື້ນັບຫລາຍຂຶ້ນ ສະເລ່ຍມື້ຫນຶ່ງມີປະລິມານຂີ້ເຫຍື້ອ 500-600 ໂຕນ ແຕ່ຂະນະດຽວກັນພວກເຮົາສາມາດເອົາໄປບຳບັດຢູ່ຫລັກ 32 ໄດ້ພຽງແຕ່ 300-350 ໂຕນຕໍ່ມື້ເທົ່ານັ້ນ ສ່ວນທີ່ເຫລືອກໍແມ່ນຖືກຖິ້ມຊະຊາຍລົງຕາມແຄມນ້ຳ, ຕາມຖະໜົນຫົນທາງ ແລະ ຮ່ອງລະບາຍນ້ຳຕ່າງໆ. ດັ່ງນັ້ນ ນະຄອນຫລວງວຽງຈັນຈິ່ງໄດ້ວາງຍຸດທະສາດໄວ້ວ່າ: ເຮັດແນວໃດເພື່ອໃຫ້ຂີ້ເຫຍື້ອກາຍເປັນເງິນເປັນຄຳ ແລະ ສຳລັບຮ່າງແຜນຍຸດທະສາດນີ້, ຖືວ່າມີຄວາມສຳຄັນຫລາຍ ເພື່ອເປັນບ່ອນອີງໃນການສືບຕໍ່ສ້າງລະບຽບການຄຸ້ມຄອງ ແລະ ກຳຈັດຂີ້ເຫຍື້ອໃນຕໍ່ໜ້າໃຫ້ມີປະສິດທິຜົນ. ເພື່ອນຳໄປແກ້ໄຂບັນຫາຂີ້ເຫຍື້ອໃນຕົວເມືອງທີ່ມີປະລິມານເພີ່ມຂຶ້ນໃນແຕ່ລະປີໃຫ້ຫລຸດໜ້ອຍຖອຍລົງ.