ຜູ້ນຳຝຣັ່ງປະກາດໄຊຊະນະເໜືອໂຄວິດ-19 ຍົກທຳອິດ
ປະທານາທິບໍດີ ເອມາດູແອລ ມາຄຣົງ ຂອງຝຣັ່ງ ປະກາດໄຊຊະນະເໜືອໂຄວິດ-19 ຍົກທຳອິດ ແລະ ຈະເລັ່ງຟື້ນຟູເສດຖະກິດ.
ນັບແຕ່ວັນທີ 15 ມິຖຸນາເປັນຕົ້ນໄປ ຝຣັ່ງຈະຫລຸດຜ່ອນຂໍ້ຈຳກັດໃຫ້ຮ້ານອາຫານ ແລະ ຮ້ານກາເຟ ທັງໃນ ແລະ ອ້ອມຮອບນະຄອນຫລວງປາຣີສ ສາມາດເປີດພື້ນທີ່ນັ່ງໃນຮົ່ມໄດ້ອີກ. ເຖິງຢ່າງໃດກໍຕາມ, ໃນການຖະແຫລງຜ່ານທາງໂທລະພາບ ໃນວັນທີ 14 ມິຖຸນາ ຜູ້ນຳຝຣັ່ງກ່າວວ່າ: ການຕໍ່ສູ້ກັບພະຍາດລະບາດຍັງບໍ່ຈົບ ເຖິງວ່າຈະສາມາດຄວບຄຸມການລະບາດໃນປະເທດໄດ້ເປັນສ່ວນໃຫຍ່ແລ້ວກໍຕາມ.
ປະທານາທິບໍດີ ມາຄຣົງ ໄດ້ກ່າວເຖິງການຊ່ວຍເຫລືອອຸດສາຫະກຳ ແລະ ແຮງງານທີ່ໄດ້ຮັບຄວາມເດືອດຮ້ອນຈາກການລະບາດ ໂດຍກ່າວວ່າ: ລັດຖະບານຝຣັ່ງຈັດສັນງົບປະມານຊ່ວຍເຫລືອໄວ້ແລ້ວ 500.000 ລ້ານເອີໂຣ ແລະ ເນັ້ນວ່າ: ຝຣັ່ງຕ້ອງສ້າງເສດຖະກິດໃໝ່ທີ່ແຂງແຮງ ແລະ ຍືນຍົງ ເພື່ອທົດແທນໜີ້ພາກລັດທີ່ກຳລັງເພີ່ມຂຶ້ນໃນໄລຍະທີ່ພະຍາຍາມນຳພາປະເທດໃຫ້ຟື້ນຈາກການລະບາດຂອງພະຍາດ.
ຜູ້ນຳຝຣັ່ງລະບຸວ່າ: ຝຣັ່ງຈະດຳເນີນນະໂຍບາຍທີ່ອີງໃສ່ສິ່ງແວດລ້ອມເປັນຫລັກ ແລະ ໃຫ້ຄຳໝັ້ນວ່າ: ຈະສ້າງແຜນສະເພາະອອກມາໃນເດືອນກໍລະກົດ ເພື່ອກອບກູ້ເສດຖະກິດກັບມາໃໝ່.
