ຫລາຍພື້ນທີ່ຢູ່ ປັກກິ່ງ ຖືກລອກດາວ ຫລັງພົບເຫັນຜູ້ຕິດເຊື້ອໂຄວິດ-19 ຫລາຍກ່ວາ 50 ຄົນ

ຫລັງຈາກບໍ່ພົບກໍລະນີ ຜູ້ຕິດເຊື້ອໂຄວິດ19ໃຫມ່ ຢູ່ປັກກິ່ງເປັນເວລາເກືອບ 2 ເດືອນ. ຫລ້າສຸດ ຈີນ ໄດ້ພົບເຫັນຈຸດໜຶ່ງທີ່ອາດຈະເປັນສູນກາງການລະບາດ ໃໝ່ ໃນຕະຫຼາດຂາຍສົ່ງອາຫານ ສົ່ງຜົນໃຫ້ເຈົ້າໜ້າ ທີ່ຕ້ອງໄດ້ປິດລ້ອມຫຼາຍພື້ນທີ່ຢ່າງເຂັ້ມງວດ ທ່າມກາງຄວາມກັງວົນວ່າການລະບາດຄັ້ງທີສອງຈະເກີດຂື້ນໃນປະເທດຈີນ

ຜູ້ທຳອິດທີ່ໄດ້ຕິດເຊື້ອໂຄວິດ-19 ໃນປັກກິ່ງ ໄດ້ຮັບຜົນການກວດເປັນບວກໃນວັນພະຫັດທີ່ຜ່ານມາ (11 ມິຖຸນາ) ເປັນຜູ້ຊາຍອາຍຸ 52 ປີທີ່ໄດ້ເດີນທາງໄປຕະຫຼາດ Xinfadi ເຊິ່ງເປັນຕະຫລາດຂາຍສົ່ງອາຫານທີ່ໃຫຍ່ທີ່ສຸດຂອງປັກກິ່ງໃນເຂດ Fengtai, ຫລັງຈາກນັ້ນ ມີລາຍງານມີຜູ້ຕິດເຊື້ອໃໝ່ ອີກ 6 ຄົນ ເປັນກຳມະກອນ 3 ຄົນທີ່ເຮັດວຽກຢູ່ຕະຫລາດ, 2 ຄົນທີ່ໄດ້ໄປຕະຫຼາດ ແລະ ອີກຄົນຫນຶ່ງແມ່ນພົວພັນກັບຜູ້ໄປຕະຫລາດ. ສົ່ງຜົນໃຫ້ທາງການສົ່ງເຈົ້າໜ້າທີ່ລົງກວດກາປະຊາຊົນໃນທ້ອງຕະຫລາດ ເຊິ່ງພົບຜູ້ຕິດເຊື້ອອີກ 45 ກໍລະນີ ຈາກ 517 ຕົວຢ່າງ ແຕ່ທັງໝົດບໍ່ໄດ້ສະແດງອາການ.

ຫລັງຈາກພົບການລະບາດໃໝ່ ເຈົ້າໜ້າທີ່ ປັກກິ່ງ ໄດ້ປິດລ້ອມເຂດທີ່ຢູ່ອາໄສ 11 ແຫ່ງທີ່ຢູ່ໃກ້ຄຽງ. ຄຽງຄູ່ກັບການກວດສອບການຕິດເຊື້ອພະນັກງານ 10,000 ຄົນໃນຕະຫລາດ, ນອກຈາກນັ້ນ ຍັງມີແຜນທີ່ຈະທົດສອບຢ່າງຈິງຈັງ ສຳລັບຜູ້ທີ່ໄດ້ເດີນທາງໄປຕະຫລາດໃນຫລາຍມື້ທີ່ຜ່ານມາ ລວມທັງຜູ້ທີ່ອາໄສຢູ່ເຂດອ້ອມແອ້ມເຊັ່ນດຽວກັນ.