ລັດຖະບານຍີ່ປຸ່ນ ເບີກຈ່າຍເງິນໃຫ້ປະຊາຊົນໄປທ່ອງທ່ຽວພາຍໃນປະເທດ

ລັດຖະບານຍີ່ປຸ່ນກຳລັງຫາຊ່ອງທາງຟື້ນຟູຂະແໜງການທ່ອງທ່ຽວ ຊຶ່ງເປັນຂະແໜງການຜັກດັນທີ່ສຳຄັນໃຫ້ເສດຖະກິດທີ່ຖືກຜົນກະທົບໜັກຈາກໂຄວິດ-19, ດ້ວຍວິທີການເບີກຈ່າຍເງິນໃຫ້ປະຊາຊົນໄປທ່ອງທ່ຽວພາຍໃນປະເທດ.

ໂດຍຫົວຄິດປະດິດສ້າງທີ່ວ່າ “Go to travel”(ມີຄວາມໝາຍວ່າ ກັບສູ່ການທ່ອງທ່ຽວ), ລັດຖະບານຍິ່ປຸ່ນໄດ້ອູດໜູນເງິນໃຫ້ປະຊາຊົນ 20.000 ເຢັນ(yen) ຫຼື 185 USD/ວັນໃຫ້ປະຊາຊົນໄປທ່ອງທ່ຽວ. ເຄິ່ງໜຶ່ງຂອງຮ່ວງເງິນດັ່ງກ່າວຈະເປັນຄ່າເດີນທາງ ໂດຍຜ່ານການເຮັດສັນຍາຫຼຸດລາຄາກັບບັນດາຫ້າງຮ້ານ, ຮ້ານຄ້າ ແລະ ຮ້ານອາຫານທີ່ໃກ້ກັບແຫຼ່ງທ່ອງທ່ຽວ.

ແນວຄວາມຄິດດັ່ງກ່າວຈະຖືກຈັດຕັ້ງປະຕິບັດໃນເດືອນກໍລະກົດທີ່ຈະມາເຖິງ ຊຶ່ງຈະປະຕິບັດກັບປະຊາຊົນຜູ້ທີ່ໄດ້ຈອງທົວກັບບັນດາບໍລິສັດທ່ອງທ່ຽວຂອງຍິ່ປຸ່ນ ຫຼື ໄດ້ຈອງໂຮງແຮມ, ບ້ານພັກໄວ້ແລ້ວ.

ເງິນຮ່ວງນີ້ມີປະມານ 1.350 ຕື້ເຢັນໃນຮ່ວງອູດໜູນສຸກເສີນທັງໝົດ 200.000 ຕື້ເຢັນ ຂອງລັດຖະບານຍີ່ປຸ່ນ ທີ່ໃຊ້ຈ່າຍເຂົ້າໃນໂຄງການ “Go To Travel”.

ຂະແໜງການທ່ອງທ່ຽວກໍແມ່ນຂະແໜງການໜຶ່ງທີ່ໄດ້ຮັບຜົນກະທົບໜັກຈາກພະຍາດໂຄວິດ-19, ເຮັດໃຫ້ປະຊາຊົນຍິ່ປຸ່ນຈຳຕ້ອງໄດ້ຢູ່ແຕ່ໃນເຮືອນ ແລະ ຄວາມຫວັງທີ່ວ່າຈະມີນັກທ່ອງທ່ຽວຕ່າງຊາດເປັນຈຳນວນຫຼວງຫຼາຍເຂົ້າມາຍິ່ປຸ່ນໃນລະດູແລ້ງປີນີ້ ກໍຖືກພັງທະລາຍໄປ ໃນເມື່ອງານມະຫາກຳກິລາOlympic Tokyo ຖືກເລື່ອນອອກໄປ, ພ້ອມດຽວກັນນັ້ນຍີ່ປຸ່ນກໍໄດ້ວາງມາດຕະການກັນຫ້າມຊາວຕ່າງປະເທດເຂົ້າມາໃນຍີ່ປຸ່ນ ຫຼາຍກວ່າ 100 ປະເທດໃນໂລກ.

ອີງຕາມຕົວເລກທາງການຂອງສະຖາບັນຄົ້ນຄວ້າຂອງ Tokyo Shoko ໃຫ້ຮູ້ວ່າ ມີ 31 ບໍລິສັດທຸລະກິດກ່ຽວກັບບ້ານພັກ ໂຮງແຮມໃນປະເທດນີ້ ໄດ້ປະກາດລົ້ມລະລາຍ ຫຼື ກຳລັງຢື່ນໃບສະເໜີຂໍລົ້ມລະລາຍໃນ 4 ເດືອນທີ່ຜ່ານມາ ທີ່ໄດ້ຮັບຜົນກະທົບຈາກໂຄວິດ-19.

ນາຍົກລັດຖະມົນຕີ Shinzo Abe, ວັນທີ 25 ພຶດສະພາຜ່ານມາ ໄດ້ປະກາດຍົກເລີກສະຖານະການສຸກເສີນຢູ່ໃນນະຄອນຫຼວງ Tokyo ແລະ 4 ແຂວງຕື່ມອີກ ຊຶ່ງຍິ່ປຸ່ນໄດ້ປະກາດພາວະສຸກເສີນມາແຕ່ວັນທີ 7 ເມສາ ແລະ ໄດ້ຍົກເລີກທົ່ວທັງປະເທດໃນຂະນະນີ້ ອັນໄດ້ເຮັດໃຫ້ປະຊາຊົນໄດ້ກັບຄືນມາດຳລົງຊີວິດຕາມປົກກະຕິ.

ຂ່າວ: ລູກເມືອງພວນ(ແຫຼ່ງຂ່າວ baotintuc.vn)