ສປປ ລາວ ເປັນເຈົ້າພາບ ຈັດກອງປະຊຸມລັດຖະມົນຕີ ສະຫວັດດີການສັງຄົມ ແລະ ການພັດທະນາອາຊຽນ
ທ່ານ ຄຳແພງ ໄຊສົມແພງ ລັດຖະມົນຕີ ກະຊວງແຮງງານ ແລະ ສະຫວັດດີການສັງຄົມ ສປປ ລາວ, ໃນນາມເປັນເຈົ້າພາບ ໄດ້ກ່າວເປີດກອງປະຊຸມທາງໄກສະໄໝພິເສດ ຂອງລັດຖະມົນຕີສະ ຫວັດດີການສັງຄົມ ແລະ ການພັດທະນາອາຊຽນ ພາຍໃຕ້ຫົວຂໍ້: ການຫລຸດຜ່ອນຜົນກະທົບຂອງພະຍາດ ໂຄວິດ-19 (COVID-19) ຕໍ່ກຸ່ມຄົນດ້ອຍໂອກາດໃນອາຊຽນ, ຢູ່ກະຊວງແຮງງານ ແລະ ສະຫວັດດີການສັງຄົມ, ໃນວັນທີ 10 ມິຖຸນາ 2020 ໂດຍຜ່ານ (Video Conference) ເປັນທາງການ, ໂດຍ ມີບັນດາທ່ານລັດຖະມົນຕີ ປະເທດສະມາຊິກອາຊຽນ, ທ່ານເລຂາທິການໃຫຍ່ອາຊຽນ, ພ້ອມດ້ວຍຄະນະຜູ້ແທນກອງປະຊຸມເຂົ້າຮ່ວມ.
ທ່ານ ຄຳແພງ ໄຊສົມແພງ ໄດ້ກ່າວຕໍ່ກອງປະຊຸມຄັ້ງນີ້ວ່າ: ພວກເຮົາຈະໄດ້ພ້ອມກັນ ປຶກສາຫາລືແລກປ່ຽນຄໍາຄິດເຫັນ, ບົດຮຽນໃນລະດັບຊາດ ແລະ ບູລິມະສິດຍຸດທະສາດ ໃນການຈັດຕັ້ງປະຕິບັດວາລະຂອງອາຊຽນ ກ່ຽວກັບການປົກປ້ອງສັງຄົມ ແລະ ສະຫວັດດີການສັງຄົມ ຕໍ່ກຸ່ມຄົນດ້ອຍໂອກາດ ໃນຊ່ວງເວລາ ທີ່ມີການລະບາດຂອງພະຍາດໂຄວິດ-19, ເພື່ອເປັນແນວທາງໃນການຍົກສູງ ພາລະບົດບາດ ການເປັນຈຸດປະສານງານຂອງພາກພື້ນ ໃນການສົ່ງເສີມການປົກປ້ອງສັງຄົມ ແລະ ສະຫວັດດີການສັງຄົມ ສໍາລັບກຸ່ມດ້ອຍໂອກາດໃນການຮັບມື ແລະ ຫລຸດຜ່ອນຜົນກະທົບຂອງການແຜ່ລະບາດຂອງພະຍາດໂຄວິດ-19 ແລະ ຈະໄດ້ພ້ອມກັນພິຈາລະນາຮັບຮອງຮ່າງຖະແຫລງການຮ່ວມ ວ່າດ້ວຍການຫລຸດຜ່ອນຜົນກະທົບຂອງພະຍາດໂຄວິດ-19 ຕໍ່ກຸ່ມຄົນດ້ອຍໂອກາດໃນພາກພື້ນອາຊຽນ ເພື່ອເຮັດໃຫ້ທຸກຄົນໃນສັງຄົມຂອງພວກເຮົາ ໂດຍສະເພາະກຸ່ມຄົນດ້ອຍໂອກາດ ໄດ້ມີສິດເທົ່າທຽມກັນ ໃນການເຂົ້າເຖິງການບໍລິການຕ່າງໆ ໂດຍບໍ່ປະຖິ້ມຜູ້ໃດໄວ້ຂ້າງຫລັງ.
ປະທານກອງປະຊຸມ ກ່າວຕື່ມວ່າ: ການຮັບມືກັບການແຜ່ລະບາດຂອງພະຍາດໂຄວິດ-19 ຍັງມີສິ່ງທ້າທ້າຍຫລາຍດ້ານ ທີ່ຈະຕ້ອງໄດ້ຮັບການຮ່ວມມືກັນຢ່າງໃກ້ຊິດ ເພື່ອການແກ້ໄຂບັນຫາສັງຄົມ ແລະ ການປົກປ້ອງສົ່ງເສີມສິດທິມະນຸດ ໂດຍສະເພາະແມ່ນເດັກນ້ອຍ, ຜູ້ອາຍຸສູງ, ຜູ້ພິການ ແລະ ກຸ່ມຄົນທີ່ດ້ອຍໂອກາດ ເພື່ອຫລຸດຜ່ອນສິ່ງກີດຂວາງ ແລະ ການເຂົ້າເຖິງການບໍລິການຕ່າງໆ ທີ່ເທົ່າທຽມກັນ ຊຶ່ງເປັນບຸລິມະສິດຂອງແຜນຍຸດທະສາດ ວຽກສະຫວັດດີການສັງຄົມ ແລະ ການພັດທະນາອາຊຽນ 2016-2020 ແລະ ຫວັງຢ່າງຍິ່ງວ່າ ສປປ ລາວ ຈະໄດ້ຮັບການສະໜັບສະໜູນ ແລະ ການຮ່ວມມືຢ່າງໃກ້ຊິດຈາກບັນດາທ່ານລັດຖະມົນຕີ ສະຫວັດດີການສັງຄົມ ແລະ ການພັດທະນາອາຊຽນ ໃນໄລຍະທີ່ ສປປ ລາວ ເຮັດໝ້າທີ່ໃນການເປັນປະທານ ເພື່ອເຮັດໃຫ້ການພັດທະນາວຽກສະຫວັດດີການສັງຄົມ ແລະ ການພັດທະນາອາຊຽນ ໄດ້ມີຄວາມຄືບໜ້າ ແລະ ມີຜົນສຳເລັດຫລາຍຂຶ້ນ.
