ທະນາຄານໂລກ(WB) ພະຍາກອນວ່າເສດຖະກິດໂລກຈະຫຼຸດລົງ 5,2% ໃນປີ 2020 ນີ້

ວັນທີ 8 ມີຖຸນານີ້, ທະນາຄານໂລກໄດ້ປະກາດແຈ້ງການອະນາຄົດເສດຖະກິດໂລກໃນເດືອນມີຖຸນາ 2020 ນີ້ວ່າ ເສດຖະກິດໂລກຈະອ່ອນຕົວລົງໃນລະດັບ 5,2% ໃນປີນີ້ ອັນເນື່ອງມາຈາກການລະບາດຂອງພະຍາດໂຄວິດ-19 ຊຶ່ງຫຼາຍປະເທດໄດ້ປິດປະຕູເສດຖະກິດເພື່ອສະກັດກັ້ນການແຜ່ລະບາດຂອງເຊື້ອພະຍາດ.

ບັນຫາດັ່ງກ່າວ ໄດ້ກາຍເປັນຂີດໝາຍແຫ່ງການຖອຍຫຼັງທີ່ຮ້າຍແຮງທີ່ສຸດນັບແຕ່ສົງຄາມໂລກຄັ້ງທີ II ເປັນຕົ້ນມາ.

ນັກຂ່າວ TTXVN ຂອງຫວຽດນາມ ປະຈຳຢູ່ ສະຫະລັດອາເມລິກາໃຫ້ຮູ້ວ່າ ທະນາຄານໂລກໄດ້ມີການຄາດຄະເນການເຄື່ອນໄຫວທາງດ້ານເສດຖະກິດຂອງບັນດາປະເທດທີ່ພັດທະນາແລ້ວຈະຕົກຢູ່ທີ່ 7% ໃນປີ 2020 ນີ້ ຍ້ອນການຕອບສະໜອງ ແລະ ຄວາມຕ້ອງການ, ການຄ້າ ແລະ ການເງິນພາຍໃນປະເທດ ຖືກສະງັກງັນຢ່າງຮ້າຍແຮງ. ເສດຖະກິດທີ່ກຳລັງພັດທະນາ ແລະ ກຸ່ມຕະຫຼາດທຶນໃໝ່(EMDE)ຈະຕົກຢູ່ທີ່ 2,5% ໃນປີນີ້. ລາຍຮັບຕໍ່ຫົວຄົນຄາດວ່າຈະຫຼຸດລົງ 3,6% ຊຶ່ງຈະເຮັດໃຫ້ນັບລ້ານໆຄົນຕົກທຸກໄດ້ຍາກໃນປີນີ້.

ບັນດາປະເທດທີ່ມີພະຍາດລະບາດຮ້າຍແຮງ ກໍຄື ບັນດາປະເທດທີ່ຂຶ້ນກັບການຄ້າຂອງໂລກ, ຂຶ້ນກັບການທ່ອງທ່ຽວ, ການສົ່ງອອກສິນຄ້າ ແລະ ການເງິນ ຈະໄດ້ຮັບຜົນກະທົບໜັກໜ່ວງກວ່າໝູ່ ແຕ່ການທີ່ໄດ້ຮັບຜົນກະທົບນັ້ນ ຈະແຕກຕ່າງກັນອອກໄປໃນແຕ່ລະຂົງເຂດ ແຕ່ເວົ້າລວມແລ້ວ ກຸ່ມຕະຫຼາດທຶນໃໝ່ ລ້ວນແຕ່ໄດ້ຮັບຜົນກະທົບເຊັ່ນດຽວກັນ.

ທ່ານ ນາງ CeylaPazarbasioglu ຮອງປະທານກຸ່ມ ຈະເລີນເຕີບໂຕເສດຖະກິດສະເໝີພາບ, ການເງິນ ແລະ ສະຖາບັນຕ່າງໆຂອງ ທະນາຄານໂລກ ໃຫ້ຮູ້ວ່າ  ສິ່ງເຫຼົ່ານັ້ນແມ່ນໜ້າເປັນຫ່ວງ. ທ່ານກ່າວຢໍ້າວ່າ ສິ່ງທີ່ສຳຄັນກ່ອນອື່ນໝົດ ຕ້ອງແກ້ໄຂບັນຫາເສດຖະກິດ ແລະ ສຸຂະພາບຄ່ອງໃນທົ່ວໂລກ. ນອກຈາກນີ້ ນານາຊາດຈະຕ້ອງສາມັກຄີກັນ ເພື່ອຊອກຫາຊ່ອງທາງ ຟື້ນຟູເສດຖະກິດໃຫ້ກັບຄືນມາແຂງແຮງ ເພື່ອປ້ອງກັນບໍ່ໃຫ້ມີຄົນຕົກງານ ແລະ ທຸກຍາກລຳບາກຕໍ່ໄປ.

ຖ້າຫາກສະພາບການລະບາດຂອງພະຍາດຜ່ອນຄາຍລົງ ຄາດວ່າເສດຖະກິດຈະກັບມາຟື້ນຕົວໄດ້ໃນກາງປີນີ້ ຫຼັງຈາກນັ້ນກໍແມ່ນກຸ່ມຕະຫຼາດທຶນໃໝ່EMDE. ຜົນກະທົບທົ່ວໂລກຈະຫຼຸດລົງໃນ 6 ເດືອນທ້າຍປີນີ້, ຄວາມສັບສົນຂອງຕະຫຼາດການເງິນຈະບໍ່ແກ່ຍາວ, ການຈະເລີນເຕີບໂຕທາງດ້ານເສດຖະກິດໂລກຄາດວ່າຈະກັບຄືນມາຢູ່ທີ່ 4,2% ໃນປີ 2021 ໃນຂະນະທີ່ການຈະເລີນເຕີບໂຕທາງເສດຖະກິດເພີ່ມຂຶ້ນ 3,9% ແລະ ກຸ່ມຕະຫຼາດທຶນໃໝ່ເພີ່ມຂຶ້ນ 4,6% ແຕ່ບໍ່ມີຄວາມແນ່ນອນ ແລະ ມີຄວາມສ່ຽງທີ່ສຸດ.

ຂ່າວ: ລູກເມືອງພວນ(ແຫຼ່ງຂ່າວ baotintuc.vn/)