ນາຍົກລັດຖະມົນຕີ ຫງວຽນຊວັນຟຸກ ຫວຽດນາມກ່າວວ່າ:ບໍ່ຈຳກັດຖ້ຽວບິນທີ່ເອົາຄົນຄົບເງື່ອນໄຂເຂົ້າມາຫວຽດນາມ

ໃນຂະນະທີ່ເປັນປະທານກອງປະຊຸມຄະນະສະເພາະກິດສະກັດກັ້ນ ແລະ ຕ້ານພະຍາດໂຄວິດ-19 ຂອງລັດຖະບານ ໃນຕອນເຊົ້າຂອງວັນທີ 9 ມີຖຸນານີ້ ທ່ານກ່າວວ່າ: ບໍ່ຈຳກັດຖ້ຽວບິນທີ່ເອົາຄົນຄົບເງື່ອນໄຂເຂົ້າມາຫວຽດນາມ.

ລັດຖະບານຈະອະນຸມັດໃຫ້ເປີດສາຍການບິນການຄ້າລະຫວ່າງ ຫວຽດນາມ ກັບ ບັນດາປະເທດຈຳນວນໜຶ່ງທີ່ມີການຄວບຄຸມພະຍາດໂຄວິດ-19 ໄດ້ແລ້ວ, ພ້ອມດຽວກັນນັ້ນຈະບໍ່ຈຳກັດບັນດານັກຊ່ຽວຊານ, ນັກລົງທຶນຕ່າງປະເທດ ແລະ ຊາວຫວຽດນາມຢູ່ຕ່າງປະເທດທີ່ຢາກກັບຄືນປະເທດ ໂດຍການຕົກລົງຂອງ ນາຍົກລັດຖະມົນຕີ ຫງວຽນຊວັນຟຸກ ໃນກອງປະຊຸມຄະນະສະເພາະກິດສະກັດກັ້ນ ແລະ ຕ້ານພະຍາດໂຄວິດ-19.

ເພື່ອກະກຽມໃຫ້ແກ່ການເປີດສາຍການບິນໄປຍັງບາງປະເທດນັ້ນ, ທ່ານ ຫງວຽນຊວັນຟຸກ ໄດ້ມອບໝາຍໃຫ້ຄະນະຊີ້ນຳລະດັບຊາດເພື່ອປ້ອງກັນ ແລະ ຕ້ານພະຍາດໂຄວິດ-19 ປະກາດເຂດປອດໄພໂຄວິດ-19 ພາຍໃນ 30 ວັນທີ່ຜ່ານມາທີ່ບໍ່ມີຜູ້ຕິດເຊື້ອໂຄວິດ-19 ລາຍໃໝ່. ໃນນັ້ນ, ກ່ອນອື່ນໝົດແມ່ນໃຫ້ເອົາໃຈໃສ່ເປີດສາຍການບິນກັບມັນທົນ ກວ່າງໂຈ່ວ ຂອງຈີນ. ໂຕກຽວ ຍີ່ປຸ່ນ, ເຊອູນ ເກົາຫຼີໃຕ້, ໄຕ້ຫວັນທີ່ຂຶ້ນກັບຈີນ, ລາວ ແລະ ກຳປູເຈຍ. ຄະນະຊີ້ນຳກໍຕ້ອງໄດ້ວາງທິດທາງແຜນການເພື່ອກວດກາ, ຄວບຄຸມດ້ານສາທາລະນະສຸກຕໍ່ແຕ່ລະເປົ້າໝາຍ ເພື່ອຮັບປະກັນບໍ່ໃຫ້ແຜ່ເຊື້ອໄປໃສ່ຊຸມຊົນ. ທ່ານນາຍົກເນັ້ນວ່າ: ເມື່ອມາເຖິງຈຸນີ້ແລ້ວ, ຫວຽດນາມບໍ່ສາມາດທີ່ຈະສືບຕໍ່ປິດສາຍການບິນກັບພາຍນອກຕໍ່ໄປໄດ້ອີກ ແຕ່ກໍບໍ່ສາມາດທີ່ຈະເປີດປະຕູໂດຍບໍ່ມີການຄວບຄຸມ.

ສຳລັບຊາວຫວຽດນາມຈຳນວນ 26.000 ຄົນທີ່ຢູ່ຫຼາຍປະເທດໃນໂລກ, ໃນນັ້ນມີຫຼາຍກວ່າ 12.000 ຄົນມີຈຸດປະສົງຢາກກັບປະເທດກໍກັບໄດ້ ແຕ່ຕ້ອງຮັບປະກັນຄົບເງື່ອນໄຂທີ່ວາງອອກ. ນອກນີ້, ທ່ານນາຍົກລັດຖະມົນຕີ ຍັງໄດ້ມອບໃຫ້ບັນດາກະຊວງທີ່ກ່ຽວຂ້ອງຈົ່ງເຮັດສຸດຄວາມສາມາດເພື່ອໃຫ້ຈຳພວກຄົນດັ່ງກ່າວໄດ້ກັບມາຫວຽດນາມ.

ຕໍ່ກັບນັກທຸລະກິດຂອງຫວຽດນາມ, ນັກຮຽນ, ນັກສຶກສາ, ຜູ້ເຖົ້າ…ທີ່ຢາກກັບປະເທດ ແຕ່ມາບໍ່ທັນໄດ້ນັ້ນ, ທ່ານນາຍົກໄດ້ຮຽກຮ້ອງໃຫ້ກະຊວງການຕ່າງປະເທດ ຈົ່ງໄດ້ວາງເງື່ອນໄຂມາດຖານລະອຽດ ແລະ ເປີດຊ່ອງທາງໃຫ້ພວກເຂົາເຈົ້າໄດ້ລົງທະບຽນ ນັບທັງຜູ້ຊ່ຽວຊານຫວຽດນາມ ແລະ ຕ່າງປະເທດ. ກະຊວງຄົມມະນາຄົມ ແລະ ຂົນສົ່ງ ຊີ້ນຳຂະແໜງການບິນຈັດຕັ້ງເພີ່ມຖ້ຽວບິນເພີ່ມຂຶ້ນ ເພື່ອເອົາຈຳນວນຄົນເຫຼົ່ານັ້ນກັບຄືນປະເທດບົນຈິດໃຈມະນຸດສະທຳ ແລະ ສ້າງເງື່ອນໄຂອຳນວຍຄວາມສະດວກໃຫ້ພວກເຂົາເຈົ້າ.

ນາຍົກລັດຖະມົນຕີ ຫງວຽນຊວັນຟຸກ ໄດ້ມອບໝາຍໃຫ້ກະຊວງການເງິນ ແລະ ກະຊວງສາທາລະນະສຸກລວບລວມຂໍ້ມູນຂ່າວສານເພື່ອລາຍງານນາຍົກລັດຖະມົນຕີກ່ຽວກັບການໃຊ້ຈ່າຍໃຫ້ແກ່ການຈັດຕັ້ງປະຕິບັດໄລຍະຫ່າງ ໃນໄລຍະທີ່ຜ່ານມາ ເພື່ອຖອນເງິນດັ່ງກ່າວໃຫ້ຖືກຕ້ອງຕາມລະບຽບກົດໝາຍ ເພື່ອໃຫ້ນາຍົກຕົກລົງຈ່າຍງົບປະມານທີ່ມີຄວາມຫຍຸ້ງຍາກໃນປັດຈຸບັນ.

ນາຍົກລັດຖະມົນຕີຍັງໄດ້ມອບໃຫ້ສອງກະຊວງດັ່ງກ່າວວາງແຜນການນຳໃຊ້ກ້ອນເງິນ 2.000 ຕື້ດົງ ທີ່ປະຊາຊົນທັງປະເທດໄດ້ເກັບສົມທົບໃຫ້ແກ່ວຽກງານຄົ້ນຄວ້າ, ປະຕິບັດໄລຍະຫ່າງ ໂດຍສະເພາະແມ່ນບັນດາທ້ອງຖິ່ນທີ່ມີຄວາມຫຍຸ້ງຍາກໃນການຕ້ານພະຍາດ. ນາຍົກລັດຖະມົນຕີ ຈະສົ່ງຈົດໝາຍຂອບໃຈໄປຍັງປະຊາຊົນ ແລະ ນັກຮົບທົ່ວທັງປະເທດທີ່ໄດ້ປະກອບສ່ວນສະໜັບສະໜູນວຽກງານຕ້ານໂຄວິດ-19.

ນາຍົກຍັງໄດ້ອະນຸຍາດໃຫ້ຮ້ານບັນເທີງ, ຮ້ານ ຄາຣາໂອເກະ ໃນທົ່ວປະເທດສາມາດເປີດໃຫ້ບໍລິການໄດ້ ແຕ່ຕ້ອງປະຕິບັດມາດຕະການທີ່ຈຳເປັນໃນການຕ້ານພະຍາດ. ສ່ວນກະຊວງຕຳຫຼວດ ຕ້ອງຄວບຄຸມຢ່າງເຄັ່ງຄັດການນຳໃຊ້ຢາບ້າ ບໍ່ໃຫ້ເກີດປະກົດການບໍ່ດີຄືທີ່ຜ່ານມາ.

ຂ່າວ: ລູກເມືອງພວນ (ແຫຼ່ງຂ່າວ vtv.vn/xa-hoi/)