ສັງຄົມ ຍັງບໍ່ທັນຮັບຮູ້ເຖິງຄວາມສຳຄັນຂອງການປົກປັກຮັກສາສິ່ງແວດລ້ອມ

ສັງຄົມ ຍັງບໍ່ທັນຮັບຮູ້ເຖິງຄວາມສຳຄັນຂອງການປົກປັກຮັກສາສິ່ງແວດລ້ອມ

ທ່ານ ສົມມາດ ພົນເສນາ ລັດຖະມົນຕີ ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ໄດ້ໃຫ້ສຳພາດເນື່ອງໃນໂອກາດສະເຫລີມສະຫລອງວັນປູກຕົ້ນໄມ້ແຫ່ງຊາດ (1​ ມິຖຸນາ), ວັນສິ່ງແວດລ້ອມແຫ່ງຊາດ ແລະ ວັນສິ່ງແວດລ້ອມໂລກ (5 ມິຖຸນາ), ເມື່ອທ້າຍອາທິດຜ່ານມານີ້ວ່າ: ການປົກປັກຮັກສາທໍາມະຊາດ ແລະ ສິ່ງແວດລ້ອມ ແມ່ນໜ້າທີ່ຂອງໝົດທຸກຄົນ ໂດຍເລີ່ມຈາກການ ຖີ້ມຂີ້ເຫຍື້ອໃສ່ຖັງ ຫລື ບ່ອນທີ່ກຳນົດໄວ້ ແລະ ພະຍາຍາມຫລຸດຜ່ອນການຊົມໃຊ້ປລາດສຕິກໃຫ້ໜ້ອຍທີ່ສຸດເທົ່າທີ່ຈະເຮັດໄດ້ ໃນການດຳລົງຊີວິດປະຈຳວັນ. ທັງນີ້, ກໍເພື່ອເປັນການປະກອບສ່ວນເຮັດໃຫ້ສິ່ງແວດລ້ອມຢູ່ໃນປະເທດເຮົາສະອາດ ແລະ ງາມຕາ.

ເວົ້າລວມແລ້ວ, ການຮັບຮູ້ເຖິງຄວາມສຳຄັນ ຂອງການປົກປັກຮັກສາສິ່ງແວດລ້ອມຂອງສັງຄົມ ໂດຍສະເພາະປະຊາຊົນຈຳນວນໜຶ່ງ ແມ່ນຍັງບໍ່ທັນເຂົ້າໃຈຢ່າງເລິກເຊິ່ງ ແລະ ກວ້າງຂວາງເທົ່າທີ່ຄວນ, ຍົກຕົວຢ່າງເລື່ອງຂີ້ເຫຍື້ອ ໃຜໆກໍເຂົ້າໃຈວ່າ ມີມາແລ້ວກໍຖິ້ມໄປ ໂດຍບໍ່ຮູ້ວ່າມັນໃຊ້ເວລາຈັກປີຈຶ່ງຈະຍ່ອຍສະຫລາຍດ້ວຍຕົວມັນເອງໄດ້. ໃນແຕ່ລະປີ, ກະຊວງຊັບພະຍາກອນທຳມະຊາດ ແລະ ສິ່ງແວດລ້ອມ ກໍຄື ລັດຖະບານ ໄດ້ຈັດພິທີສະເຫລີມສະຫລອງວັນສິ່ງແວດລ້ອມແຫ່ງຊາດ, ພ້ອມກັບວັນສິ່ງແວດລ້ອມໂລກ ໂດຍແນໃສ່ເພື່ອເປັນການສົ່ງເສີມ, ສ້າງຈິດສຳນຶກ ແລະ ຍົກລະດັບຄວາມຕື່ນຕົວ ໃນການປົກປັກຮັກສາສິ່ງແວດລ້ອມ ເພື່ອປະກອບສ່ວນເຮັດໃຫ້ ສປປ ລາວ ຂຽວສະອາດ ແລະ ງາມຕາ.

ສະນັ້ນ, ຈຶ່ງຮຽກຮ້ອງມາຍັງປະຊາຊົນລາວທຸກຖ້ວນໜ້າ ຈົ່ງພ້ອມກັນປັບປ່ຽນພຶດຕິກຳ, ໃຫ້ມີສ່ວນຮ່ວມ ແລະ ເປັນເຈົ້າການຮ່ວມກັນ ໃນການປົກປັກຮັກສາສິ່ງແວດລ້ອມ ແລະ ການອະນຸລັກຊັບ ພະຍາກອນທຳມະຊາດ ເພື່ອຟື້ນຟູທໍາມະຊາດໃຫ້ຄືນສູ່ສະພາບເດີມ ແລະ ມີຄວາມອຸດົມສົມບູນຂຶ້ນກວ່າເກົ່າ ທັງເຮັດໃຫ້ສະພາບສິ່ງແວດລ້ອມສົດໃສ ດັ່ງຄໍາຂວັນ ວັນສິ່ງແວດລ້ອມແຫ່ງຊາດ 5 ມິຖຸນາ 2020 ທີ່ໄດ້ກໍານົດໄວ້ວ່າ: “ເຖິງເວລາແລ້ວ ທີ່ພວກເຮົາຈະຕ້ອງຮ່ວມກັນປົກປັກຮັກສາ ທໍາມະຊາດ ແລະ ສິ່ງແວດລ້ອມ”.