ມີຜູ້ເສຍຊີວິດຈາກໄຂ້ຍຸງລາຍເພີ່ມອີກ 1 ຄົນ
ອີງຕາມການລາຍງານສູນຂ່າວສານການແພດສຸຂະສຶກສາ ກະຊວງສາທາລະນະສຸກແຈ້ງໃຫ້ຮູ້ວ່າ: ໃນວັນທີ 8 ມິຖຸນາ 2020 ມີຜູ້ຕິດເຊື້ອໄຂ້ຍຸງລາຍເພີ້ມ 35 ກໍລະນີ ແລະ ເສຍຊີວິດເພີ້ມອີກ 1 ກໍລະນີ, ເຊິ່ງຄົນເຈັບທີ່ເສຍຊີວິດ ແມ່ນຄົນແຂວງຫລວງນໍ້າທາ. ການເຝົ້າລະວັງພະຍາດໄຂ້ຍຸງລາຍ ນັບແຕ່ວັນທີ 28 ທັນວາ 2019 ຫາ 8 ມິຖຸນາ 2020 ທົ່ວປະເທດ ມີຜູ້ຕິດເຊື້ອໄຂ້ຍຸງລາຍ 1.676 ກໍລະນີ ແລະ ເສຍຊີວິດເປັນ 5 ກໍລະນີ.
ນະຄອນຫລວງວຽງຈັນ, ໄດ້ຈັດເປັນອັນດັບທີ່ພົບຜູ້ຕິດເຊື້ອໄຂ້ຍຸງລາຍຫລາຍກວ່າໝູ່ ຢູ່ທີ່ 391 ກໍລະນີ ແລະ ເສຍຊີວິດ 1 ຄົນ, ຮອງລົງມາແມ່ນແຂວງວຽງຈັນ 235 ກໍລະນີ, ອັດຕະປື 231 ກໍລະນີ, ບໍລິຄຳໄຊ 174 ກໍລະນີ, ເສຍຊີວິດ 1 ຄົນ, ຄຳມ່ວນ 149 ກໍລະນີ, ເສຍຊີວິດ 1 ຄົນ, ສະຫວັນນະເຂດ 113 ກໍລະນີ, ສາລະວັນ 98 ກໍລະນີ, ໄຊຍະບູລີ 92 ກໍລະນີ, ເສຍຊີວິດ 1 ຄົນ, ເຊກອງ 48 ກໍລະນີ, ຫລວງນໍ້າທາ 39 ກໍລະນີ, ໄຊສົມບູນ 32 ກໍລະນີ, ອຸດົມໄຊ 32 ກໍລະນີ, ຫລວງພະບາງ 29 ກໍລະນີ, ບໍ່ແກ້ວ 15 ກໍລະນີ, ຈຳປາສັກ 10 ກໍລະນີ, ຜົ້ງສາລີ 5 ກໍລະນີ ແລະ ຫົວພັນ 1 ກໍລະນີ. ຍັງພຽງແຕ່ແຂວງຊຽງຂວາງເທົ່ານັ້ນ ທີ່ຍັງບໍ່ພົບກໍລະນີຜູ້ຕິດເຊື້ອໄຂ້ຍຸງລາຍດັ່ງ ກ່າວ.
ດັ່ງນັ້ນ, ໃຫ້ທຸກພາກສ່ວນຕ້ອງມີສ່ວນຮ່ວມ ພ້ອມໃຈກັນສະກັດກັ້ນ ແລະ ຕ້ານພະຍາດໄຂ້ຍຸງລາຍ ໂດຍການນຳໃຊ້ມາດຕະການທີ່ສຳຄັນ ໃນການຄວບຄຸມພະຍາດ ກໍຄື ການຫັນເອົາຊຸມຊົນເປັນກຸນແຈສຳຄັນໃນການປ້ອງກັນ ແລະ ຄວບຄຸມພະຍາດດັ່ງກ່າວ ເປັນຕົ້ນການມີສ່ວນຮ່ວມຂອງບຸກຄົນ, ຄອບຄົວ ໃນການປະຕິບັດມາດຕະການ 5ປ ດ້ວຍຕົນເອງ ໂດຍຂະແໜງສາທາລະນະສຸກເປັນຜູ້ເຜີຍ ແຜ່ ແລະ ແນະນຳວິທີການປະຕິບັດ ສໍາລັບການປະຕິບັດຕົວຈິງ ແມ່ນພາລະໜ້າທີ່ຂອງທຸກຄອບຄົວ ຕ້ອງເປັນເຈົ້າການໃນການປະຕິບັດດ້ວຍຕົນເອງ ເພາະຍຸງລາຍເກີດ ແລະ ແພ່ພັນຢູ່ນຳເຮືອນປະຊາ ຊົນ “ບໍ່ມີໜອນນ້ຳກໍຈະບໍ່ມີຍຸງລາຍ”.
