ສປປ ລາວ ສາມາດຄວບຄຸມເຊື້ອໂຄວິດ-19 ໄດ້ແລ້ວພາຍຫຼັງປິ່ນປົວຜູ້ຕິດເຊື້ອຫາຍດີທັງໝົດ
ວັນທີ 9 ມິຖຸນານີ້, ທ່ານ ບຸນກອງ ສີຫາວົງ ລັດຖະມົນຕີກະຊວງ ສາທາລະນະສຸກ, ພ້ອມດ້ວຍຄະນະອຳນວຍການແພດໝໍໂຮງໝໍມິດຕະພາບ 150 ຕຽງ ໄດ້ຈັດພິທີສົ່ງຜູ້ຕິດເຊື້ອໂຄວິດ-19 ປົວຫາຍດີ ອອກໂຮງໝໍ ເປັນຄົນສຸດທ້າຍ ຊຶ່ງເປັນເພດຊາຍ. ຜູ້ຕິດເຊື້ອຄົນນີ້ແມ່ນໜຶ່ງໃນຈຳນວນ 19 ຄົນຕິດເຊື້ອ ແລະ ແມ່ນຜູ້ສຸດທ້າຍໃນຈຳນວນ 16 ຄົນ ທີ່ນອນປິ່ນປົວຢູ່ໂຮງໝໍມິດຕະພາບ ຊຶ່ງໄດ້ຮັບການປິ່ນປົວຄົບກຳນົດ ແລະ ຫາຍດີເປັນປົກກະຕິ ໂດຍຜ່ານການກວດວິເຄາະບໍ່ພົບເຊື້ອ 2 ຄັ້ງຕິດຕໍ່ກັນໃນໄລຍະຫ່າງ 24 ຊົ່ວໂມງ.
ໂອກາດນີ້, ທ່ານ ລັດຖະມົນຕີ ໄດ້ກ່າວສະແດງຄວາມຍ້ອງຍໍຊົມເຊີຍຕໍ່ໂຮງໝໍມິດຕະພາບ ແລະ ຖັນແຖວແພດໝໍ ທີ່ໄດ້ອຸທິດເຫື່ອແຮງສະຕິປັນຍາ ເຂົ້າໃນການປິ່ນປົວຄົນເຈັບໄດ້ຮັບຜົນສຳເລັດເປັນຢ່າງດີ, ພ້ອມຍັງໃຫ້ທິດຊີ້ນຳວ່າ: ເຖິງວ່າຈະບໍ່ມີຄົນເຈັບນອນປິ່ນປົວແລ້ວກໍຕາມ ແຕ່ໂຮງໝໍຍັງຈະສືບຕໍ່ພາລະບົດບາດ ໃນການເຝົ້າລະວັງ, ຄັດກອງຄົນເຈັບ ແລະ ກຽມພ້ອມຮັບຄົນເຈັບຖ້າມີກໍລະນີເກີດຂຶ້ນໃໝ່ໃນຕໍ່ໜ້າ.
ທ່ານ ລັດຖະມົນຕີ ກະຊວງສາທາລະນະສຸກ ໃຫ້ຮູ້ວ່າ: ພວກເຮົາຕີລາຄາວ່າສະພາບການລະບາດຢູ່ປະເທດເຮົາ ແລະ ປະເທດທີ່ມີຊາຍແດນຕິດຈອດກັບ ສປປ ລາວ ແມ່ນຜ່ອນຄາຍລົງຫຼາຍແລ້ວ. ສະເພາະຢູ່ ສປປ ລາວ 58 ມື້ແລ້ວ ບໍ່ມີຜູ້ຕິດເຊື້ອໃໝ່, ຜູ້ຕິດເຊື້ອສະສົມ 19 ຄົນ ແລະ ປິ່ນປົວດີ ແລ້ວ19 ຄົນ. ຜົນສຳເລັດໃນເບື້ອງຕົ້ນນີ້ ຍ້ອນມີການຊີ້ນຳ ນຳພາທີ່ດີຂອງການນຳຂັ້ນສູງພັກ-ລັດ ກໍຄືອຳນາດການປົກຄອງທຸກຂັ້ນ, ຍ້ອນມີການຮ່ວມແຮງຮ່ວມໃຈຈາກປະຊາຊົນບັນດາເຜົ່າ, ມີການສະໜັບສະໜູນຈາກບັນດາປະເທດເພື່ອນມິດ, ອົງການຈັດຕັ້ງສາກົນ, ຄູ່ຮ່ວມພັດທະນາ, ພາກທຸລະກິດ ແລະ ອົງການຈັດຕັ້ງທາງສັງຄົມທຸກພາກສ່ວນ ເຊິ່ງຈະເປັນບົດຮຽນອັນລໍ້າຄ່າໃຫ້ແກ່ພວກເຮົາໃນການກຳນົດນະໂຍບາຍ, ແຜນປະຕິບັດງານ ໃນຕໍ່ໜ້າ ເພື່ອສະກັດກັ້ນ ແລະ ແກ້ໄຂການລະບາດຂອງພະຍາດ COVID-19 ກໍຄືພະຍາດຕິດຕໍ່ອື່ນໆ.
