‘BP’ ປົດພະນັກງານ 10.000 ຄົນທົ່ວໂລກ ຍ້ອນພິດໂຄວິດ-19
ບໍລິສັດ BP ເຊິ່ງເປັນບໍລິສັດນ້ຳມັນຂອງອັງກິດ ຖະແຫລງໃນວັນທີ 8 ມິຖຸນາວ່າ: ທາງບໍລິສັດຈະປົດພະນັກງານຈຳນວນ 10.000 ຄົນທົ່ວໂລກພາຍໃນປີນີ້ ຫລັງຈາກບໍລິສັດໄດ້ຮັບຜົນກະທົບຈາກການແຜ່ລະບາດຂອງໄວຣັສໂຄວິດ-19.
ທັງນີ້ ທ່ານ ເບີນາດ ລູນີ ປະທານເຈົ້າໜ້າທີ່ບໍລິຫານຂອງ BP ກ່າວວ່າ: ການປົດພະນັກງານສ່ວນຫລາຍຈະເກີດຂຶ້ນໃນທ້າຍປີນີ້ ເຊິ່ງຜູ້ຈະໄດ້ຮັບຜົນກະທົບເປັນພະນັກງານທີ່ເຮັດວຽກຢູ່ສຳນັກງານ.
ທ່ານ ລູນີ ກ່າວວ່າ: ອຸດສາຫະກຳນ້ຳມັນໄດ້ຮັບຜົນກະທົບຈາກການຫລຸດລົງຂອງເສດຖະກິດຈາກການແຜ່ລະບາດຂອງໄວຣັສໂຄວິດ-19. ຂະນະທີ່ລາຄານ້ຳມັນຫລຸດລົງຕໍ່າກວ່າລະດັບທີ່ບໍລິສັດສາມາດສ້າງກຳໄລໄດ້.
ທ່ານ ລູນີ ຍັງກ່າວວ່າ: ໜີ້ສິນຂອງບໍລິສັດເພີ່ມຂຶ້ນ 6.000 ພັນໂດລາ ໃນໄຕມາດທຳອິດ ເຮັດໃຫ້ບໍລິສັດຈຳເປັນຕ້ອງຫລຸດຄ່າໃຊ້ຈ່າຍ 25% ໃນປີນີ້ ເຊິ່ງຄິດເປັນເງິນ 3.000 ລ້ານໂດລາ. ຂະນະທີ່ BP ມີພະນັກງານຫລາຍກວ່າ 70.000 ຄົນໃນ 80 ປະເທດທົ່ວໂລກ.
