‘ນິວຊີແລນ’ ປະກາດປອດໄວຣັສ ຍົກເລີກເກືອບທຸກມາດຕະການ
ລັດຖະບານນິວຊີແລນຍົກເລີກຂໍ້ຈຳກັດຕ່າງໆເກືອບທັງໝົດທີ່ເຄີຍປະກາດໃຊ້ເພື່ອຄວບຄຸມການລະບາດຂອງເຊື້ອພະຍາດໂຄວິດ-19 ຫລັງຈາກບໍ່ພົບຜູ້ຕິດເຊື້ອຕິດຕໍ່ກັນ 2 ອາທິດ.
ຕໍ່ຈາກນີ້ຜູ້ຄົນຢູ່ນິວຊີແລນບໍ່ຕ້ອງປະຕິບັດຕາມມາດຕະການເວັ້ນໄລຍະຫ່າງທາງສັງຄົມ ແລະ ສາມາດອອກໄປລວມຕົວກັນຢູ່ບ່ອນສາທາລະນະໄດ້ໂດຍບໍ່ມີຂໍ້ຈຳກັດ. ເຖິງຢ່າງໃດກໍດີ, ນິວຊີແລນຈະຍັງບໍ່ເປີດດ່ານຊາຍແດນສຳລັບຜູ້ທີ່ເດີນທາງມາຈາກຕ່າງປະເທດ.
ນິວຊີແລນເລີ່ມໃຊ້ມາດຕະການປິດເມືອງມາແຕ່ວັນທີ 25 ມີນາ ໂດຍແບ່ງອອກເປັນ 4 ໄລຍະ ແລະ ເລີ່ມໃຊ້ມາດຕະການໄລຍະທີ 4 ເປັນອັນດັບທຳອິດ ເຊິ່ງຄືການປິດການດຳເນີນງານຂອງຂະແໜງທຸລະກິດ, ໂຮງຮຽນ ແລະ ຂໍໃຫ້ປະຊາຊົນຢູ່ແຕ່ເຮືອນ ດົນກວ່າ 5 ອາທິດ ຫລັງຈາກນັ້ນໃນເດືອນເມສາ ເລື່ອນມາໃຊ້ມາດຕະການໄລຍະທີ 3 ເຊິ່ງອະນຸຍາດໃຫ້ຮ້ານອາຫານປະເພດສົ່ງເຖິງເຮືອນ ແລະ ທຸລະກິດທີ່ບໍ່ຈຳເປັນບາງປະເພດສາມາດກັບມາດຳເນີນງານໄດ້ ແລະ ເມື່ອພົບວ່າຈຳນວນຜູ້ຕິດເຊື້ອໂຄວິດ-19 ຫລຸດລົງຢ່າງຕໍ່ເນື່ອງ, ນິວຊີແລນຈຶ່ງເລື່ອນໄປໃຊ້ມາດຕະການໄລຍະທີ 2 ເມື່ອກາງເດືອນພຶດສະພາຜ່ານມາ.
ພາຍໃຕ້ກົດໃໝ່ນີ້ ຈະມີການເປີດໂຮງຮຽນ ແລະ ສະຖານທີ່ເຮັດວຽກຕາມປົກກະຕິ. ຂະນະທີ່ບໍລິການຂົນສົ່ງສາທາລະນະ, ບໍລິການຮັບຈັດງານສົບ ແລະ ງານແຕ່ງດອງ ສາມາດເປີດໃຫ້ບໍລິການໄດ້ໂດຍບໍ່ມີຂໍ້ຈຳກັດ ແລະ ບໍ່ໄດ້ມີການຮ້ອງຂໍໃຫ້ປະຊາຊົນເວັ້ນໄລຍະຫ່າງທາງສັງຄົມອີກຕໍ່ໄປ.
ເຖິງຢ່າງໃດກໍດີ, ນິວຊີແລນຍັງກຳນົດໃຫ້ຊາວນິວຊີແລນທີ່ເດີນທາງກັບຈາກຕ່າງປະເທດຈະຕ້ອງກັກຕົວ ຫລື ເຂົ້າຮັບການຄວບຄຸມພະຍາດເປັນເວລາ 14 ວັນ.
ນິວຊີແລນມີຜູ້ຕິດເຊື້ອໄດ້ຮັບການຢືນຢັນ 1.154 ຄົນ ແລະ ເສຍຊີວິດ 22 ຄົນ ນັບແຕ່ເກີດການລະບາດໃນປະເທດເມື່ອທ້າຍເດືອນກຸມພາ. ນິວຊີແລນເປັນປະເທດທີ່ໄດ້ຮັບການຍົກຍ້ອງໃນເລື່ອງການແກ້ໄຂວິກິດນີ້ຢ່າງເຫັນຜົນ.
ຂະນະທີ່ທ່ານ ນາງ ອາເດິນ ກໍໄດ້ຮັບຄວາມຍ້ອງຍໍວ່າເປັນນັກສື່ສານທີ່ດີ ໂດຍການອະທິບາຍເລື່ອງນີ້ກັບປະຊາຊົນຢ່າງຈະແຈ້ງ ເຮັດໃຫ້ປະສົບຜົນສຳເລັດເປັນປະເທດທີ່ມີອັດຕາຜູ້ຕິດເຊື້ອຕໍ່ປະຊາກອນຕໍ່າທີ່ສຸດໃນໂລກປະເທດໜຶ່ງ.
