ຊາຍໜຸ່ມຄົນໜຶ່ງໄດ້ຮັບລົດເກງ ຍ້ອນເກັບມ້ຽນຂີ້ເຫຍື້ອຂອງຜູ້ປະທ້ວງ

Antonio Gwynn Jr ຊາຍໜຸ່ມຊາວອາເມລິກາເກັບມ້ຽນຂີ້ເຫຍື້ອ ຊາກສະຫຼັກຫັກພັງຂອງຜູ້ປະທ້ວງຢູ່ທີ່ເມືອງ Buffalo ໃນນິວຢອກ. Gwynn ອາຍຸ 18 ປີ, ວັນທີ 1 ມີຖຸນານີ້ ໄດ້ເລີ່ມເກັບກວາດຂີ້ເຫຍື້ອ ແລະ ສິ່ງເສດເຫຼືອຈາກຜູ້ປະທ້ວງ ໃຫ້ກັບມາສະອາດເໝືອນເດີມ.

Gwynn ໃຫ້ຮູ້ວ່າ ເຂົາອ່ານພົບໃນໜັງສືພິມສະບັບໜຶ່ງວ່າໃນເມືອງ Buffalo ໃນ ນິວຢອກ ເຕັມໄປດ້ວຍຂີ້ເຫຍື້ອ, ເສດແກ້ວແຕກ ແລະ ສິ່ງເສດເຫຼືອຕ່າງເຕັມໄປໝົດ.

ເມື່ອເຫັນ Gwynn ເກັບມ້ຽນຂີ້ເຫຍື້ອຄົນດຽວ, ຊຸມຊົນເມືອງ ຈຶ່ງໄດ້ສະແດງຄວາມຊາບຊຶ້ງຕໍ່ນໍ້າໃຈຂອງຊາຍໜຸ່ມຄົນດັ່ງກ່າວ. Matt Block ອາຍຸ 27 ປີອ່ານພົບເລື່ອງລາວຂອງຊາຍໜຸ່ມຄົນນີ້ໃນໜັງສືພິມຈຶ່ງໄດ້ຕັດສິນໃຈມອບລົດເກງ ບໍ່ມີຫຼັງຄາສີແດງຄູ່ໃຈຂອງຕົນໃຫ້ກັບຊາຍໜຸ່ມຄົນນີ້.

ນັກທຸລະກິດທ້ອງຖິ່ນຄົນໜຶ່ງເມື່ອຮູ້ຂ່າວດັ່ງກ່າວກໍໄດ້ຕັດສິນໃຈ ໃຫ້ການບຳລຸງຮັກສາລົດໃຫ້ເຂົາໂດຍບໍ່ໄດ້ເສຍຄ່າເປັນເວລາ 1 ປີ.

ຂ່າວ: ລູກເມືອງພວນ (ແຫຼ່ງຂ່າວ vnexpress.net)