ມາເລເຊຍກຽມເປີດກິດຈະກຳທາງເສດຖະກິດອີກຄັ້ງ ພາຍໃຕ້ມາດຕະການຄວບຄຸມທີ່ເຂັ້ມງວດ
ວັນທີ 7 ມິຖຸນາ 2020 ສຳນັກຂ່າວຮອຍເຕີລາຍງານວ່າ: ທ່ານ ມູຢິດດິນ ຢັດຊິນ(Muhyiddin Yassin ) ນາຍົກລັດຖະມົນຕີ ມາເລເຊຍ ໄດ້ຖະແຫລງການທາງໂທລະສັບວ່າ: ລັດຖະບານມາເລເຊຍປະສົບຄວາມໃນການຄວບຄຸມການແຜ່ລະບາດຂອງເຊື້ອໄວຣັສໂຄວິດ-19 ແລ້ວ ແລະ ຈະເລີ່ມຜ່ອນຜັນມາດຕະການລ໊ອກດາວເພື່ອເລີ່ມຕົ້ນຟື້ນຟູເສດຖະກິດຂອງປະເທດອີກຄັ້ງ, ຈະມີການອະນຸຍາດໃຫ້ປະຊາຊົນສາມາດໄປມາລະຫວ່າງເມືອງໄດ້ຕັ້ງແຕ່ວັນທີ 10 ມິຖຸນາເປັນຕົ້ນໄປ ໂດຍທ່ານ ຢັດຊຸິນ ໄດ້ກ່າວວ່າ: “ສະຖິຕິກະຊວງສາທາລະນາສຸກສະແດງວ່າອັດຕາການຕິດເຊື້ອຂອງປະຊາຊົນມີທ່າອ່ຽງຫລຸດລົງ ແລະ ສະຖານະການດັ່ງກ່າວຢູ່ພາຍໃຕ້ການຄວບຄຸມແລ້ວ”.
ພາຍໃຕ້ນະໂຍບາຍຟື້ນຟູເສດຖະກິດຂອງປະເທດມາເລເຊຍ ທາງລັດຖະບານຈະຍັງບໍ່ອະນຸຍາດໃຫ້ກຸ່ມທຸລະກິດບັນເທິງຕ່າງໆເຊັ່ນ: ສວນສະນຸກ, ສະໜາມກິລາ ແລະ ໄນຄັບ ຫລື ກິດຈະກຳທີ່ກ່ຽວຂ້ອງກັບການລວມໂຕກັນຂອງຜູ້ຄົນຈຳນວນຫລາຍ ຍັງຕ້ອງຢຸດໃຫ້ບໍລິການອີກໄລຍະໜຶ່ງ. ທາງລັດຖະບານມາເລເຊຍ ມີແຜນທີ່ຈະທຸ້ມງົບປະມານຫລາຍກວ່າ 69.000 ລ້ານໂດລາສະຫະລັດ ເພື່ອຟື້ນຟູເສດຖະກິດຂອງປະເທດທີ່ໄດ້ຮັບຜົນກະທົບຢ່າງໜັກຈາກໂຄວິດ-19.
ສຳລັບສະຖານະການການແຜ່ລະບາດຂອງເຊື້ອໄວຣັສໂຄວິດ-19 ໃນເມເລເຊຍລ່າສຸດ ມີຜູ້ຕິດເຊື້ອ 8.322 ຄົນ ເສຍຊີວິດ 117 ຄົນ ແລະ ຮັກສາຫາຍແລ້ວ 6.674 ຄົນ.
