ນຳ້ຂີງມີປະໂຫຍດຫລາຍກ່ວາທີ່ທ່ານຄິດ

ທ່ານຮູ້ຫລືບໍ່ວ່ານຳ້ຂີງມີປະໂຫຍດແນວໃດ ? ຂີງເປັນພືດສະໝຸນໄພຊະນິດໜຶ່ງທີ່ຫລາຍຄົນຮູ້ຈັກກັນດີ ແລະ ຄົນສ່ວນຫລາຍຈະນິຍົມເອົາຂີງມາປະກອບເຂົ້າໃນການປຸງແຕ່ງອາຫານ ຫລື ເຮັດເປັນເຄື່ອງດື່ມ ເຊິ່ງເຄື່ອງດື່ມທີ່ນິຍົມກັນກໍແມ່ນ ນຳ້ຂີງ ເຊິ່ງຂີງນັ້ນກໍມີປະໂຫຍດທາງການແພດຫລວງຫລາຍ ບໍ່ວ່າຈະຊ່ວຍຫລຸດຜ່ອນອາການວິນຫົວ, ປຸ້ນທ້ອງ, ປວດຮາກ ຈາກອາການເມົາລົດ – ເມົາເຮືອບິນ – ເມົາເຮືອ ເພາະວ່າໃນນຳ້ຂີງນັ້ນມີສານຢູ່ 2 ຊະນິດທີ່ຊື່ວ່າ : ສານຈິງເຈີຣອລ (6-gingerol)ແລະ ສານໂຊກາອອລ(6-shogaol)ເຊິ່ງສານທັງ 2 ຊະນິດນີ້ ມີລິດຕໍ່ສະໝອງໃນພາກສ່ວນການຄວບຄຸມອາການປວດຮາກ ແລະ ນຳ້ຂີງເມື່ອດື່ມເຂົ້າໄປມັນຈະໄປຊ່ວຍກະຕຸ້ນການບິດໂຕຂອງກະເພາະອາຫານ ແລະ ລຳໄສ້ອ່ອນ ເຮັດໃຫ້ຊ່ວຍເພີ່ມປະສິດທິພາບໃນການຍ່ອຍອາຫານ, ການດູດຊຶມອາຫານ, ຫລຸດອາການຍື່ງທ້ອງ, ຊ່ວຍໄລ່ລົມໄດ້.

ບໍ່ພຽງເທົ່ານີ້, ການດື່ມນຳ້ຂີງສຳລັບບາງຄົນອາດຈະເປັນການເພີ່ມຄວາມຢາກອາຫານ ຫລື ຊ່ວຍໃຫ້ຈະເລີນອາຫານໄດ້ນຳ. ສັບພະຄຸນຂອງນຳ້ຂີງຍັງບໍ່ໝົດພຽງເທົ່ານີ້ ມັນຍັງຊ່ວຍຫລຸດຜ່ອນອາການປວດຕ່າງໆ ບໍ່ວ່າຈະແມ່ນໄມເກຣນ, ເຈັບຫົວເບື້ອງດຽວ, ເຈັບທ້ອງປວດປະຈຳເດືອນ ເຊິ່ງເປັນແບບນີ້ກໍຍ້ອນວ່າໃນນຳ້ຂີງມີສານ ພຣອດສະຕາແກຣນດິນ (Prostaglandin)ເຊິ່ງເປັນສານຮໍໂມນທີ່ຊ່ວຍລະງັບຄວາມເຈັບປວດໄດ້ ແລະ ປະໂຫຍດຂອງມັນກໍຍັງບໍ່ໝົດພຽງເທົ່ານີ້ ນຳ້ຂີງຍັງຊ່ວຍການແກ້ອາການແໜ້ນຜົ້ງດັງ, ຫລຸດຜ່ອນອາການປວດເມື່ອຍກ້າມຊີ້ນ, ຊ່ວຍໄລ່ເຫື່ອ, ຊ່ວຍໃນການຫລຸດຄໍເລສເຕີໂຣນ, ຫລຸດອາການບວມ ແລະ ປວດຂອງຄົນປ່ວຍຂໍ້ອັກເສບ, ປະດົງຂໍ້ ເປັນຕົ້ນ ເຊິ່ງວິທີການເຮັດນຳ້ຂີງນັ້ນກໍງ່າຍໆ ໂດຍມີວິທີດັ່ງນີ້ :

ຂັ້ນຕອນທຳອິດໃຫ້ເອົາຂີງມາລ້າງໃຫ້ສະອາດ ຈາກນັ້ນຊອຍເປັນແຜ່ນ ຫລື ຈະທຸບກໍໄດ້. ຈາກນັ້ນ ຈຶ່ງເອົາໄປຕົ້ມໃຫ້ຟົດ ເມື່ອນຳ້ຟົດແລ້ວກໍຕົ້ມຕໍ່ອີກ 10 – 15 ນາທີ ໂດຍໃຊ້ໄຟອ່ອນໆ ແລະ ເມື່ອຄົບກຳໜົດເວລາແລ້ວກໍເອົານຳ້ຂີງໄປແຍກອອກຈາກກັນ ຫລື ໃຜທີ່ມັກຫວານກໍອາດຈະໃສ່ນຳ້ເຜິ້ງຕື່ມ ເພື່ອໄປເພີ່ມຄວາມຫວານໄດ້ ພຽງເທົ່ານີ້ກໍໄດ້ນຳ້ຂີງມາດື່ມກັນແລ້ວ.  ເຖິງວ່ານຳ້ຂີງຈະມີປະໂຫຍດ,  ແຕ່ສຳລັບຄົນປ່ວຍບາງພະຍາດກໍຫ້າມດື່ມ ເຊັ່ນ : ຄົນປ່ວຍທີ່ມີບັນຫາກ່ຽວກັບລະບົບຍ່ອຍອາຫານ, ຄົນປ່ວຍທີ່ເປັນພະຍາດເບົາຫວານ ຫລື ຜູ້ທີ່ກຳລັງຈະເຂົ້າຮັບການຜ່າຕັດ ເພາະວ່າຂີງຈະໄປເຮັດໃຫ້ເລືອດກ້າມ ແລະ ການດື່ມນຳ້ຂີງກໍຄວນດື່ມຕອນເຊົ້າ ເພາະວ່າໃນນຳ້ຂີງມີກາເຟອີນເລັກໜ້ອຍ ເມື່ອດື່ມໃນຕອນເຊົ້າຈະຊ່ວຍກະຕຸ້ນໃຫ້ຮ່າງກາຍຕື່ນໂຕ ແລະ ສົດຊື່ນນຳອີກ.